নাগৰিকত্ব (সংশোধনী) বিধেয়কৰ বিৰুদ্ধে আৰু দেওবাৰে নলবাৰীত শাসকীয় বিজেপিৰ কৰ্মীয়ে আছু কৰ্মীৰ ওপৰত সংঘটিত কৰা আক্ৰমণৰ প্ৰতিবাদত আছুৰ লখিমপুৰ আৰু উত্তৰ লখিমপুৰ জিলা গোটে তীব্ৰ প্ৰতিবাদ সাব্যস্ত কৰে। প্ৰতিবাদী জিলা আছুৰ কৰ্মীৰ লগতে আৰু শ শ সমৰ্থকে উত্তৰ লখিমপুৰৰ হাতীলুঙত ১৫ নং ৰাষ্ট্ৰীয় ঘাইপথ অৱৰোধ কৰে।
লখিমপুৰ জিলাৰ আছুৰ গোটৰ সভাপতি পুলক বৰা আৰু সম্পাদক ধনমণি দত্ত উত্তৰ লখিমপুৰ গোটৰ সভাপতি প্ৰাঞ্জল গগৈ আৰু পুনমজ্যোতি বুঢ়াগোহাইৰ লগতে ছাত্ৰ সংগঠনটোৰ শ শ সমৰ্থনকাৰীয়ে হাতীলুঙত ১৫নং ৰাষ্ট্ৰীয় ঘাইপথ অৱৰোধ কৰে। অৱৰোধকাৰী প্ৰতিবাদকাৰীসকলে বিতৰ্কিত নাগৰিকত্ব (সংশোধনী) বিধেয়কৰ বিৰুদ্ধে আৰু নলবাৰীত আছু কৰ্মীৰ ওপৰত বিজেপিৰ গুণ্ডাগিৰিৰ বিৰুদ্ধে প্ৰতিবাদ সাব্যস্ত কৰে।
ৰাষ্ট্ৰীয় ঘাইপথ অৱৰোধ কাৰ্যসূচীত আছুৰ কেন্দ্ৰীয় সমিতিৰ বিত্ত সম্পাদক কৃষ্ণ দাস আৰু লখিমপুৰ আছুৰ উপদেষ্টা সঞ্জীৱ কোঁৱৰো উপস্থিত আছিল।
একেই বিষয়ৰ ওপৰত আছুৱে পদ্মনাথ গোহাইবৰুৱা ছোৱালী হাইস্কুলৰ সন্মুখতো আজি অৱস্থান ধৰ্মঘট কাৰ্যসূচী পালন কৰে। এই ধৰ্ণা কাৰ্যসূচীত বিভিন্ন সংগঠনৰ লগতে গণ্য মান্য ব্যক্তিয়ে যোগদান কৰে।