গৰু হত্যা কৰাৰ বাবেই কেৰালাৰ ৱায়নাড জিলাত সংঘটিত হৈছে ভয়াৱহ ভূমিস্খলন। এই দাবী ৰাজস্থান বিজেপি নেতা জ্ঞানদেৱ আহুজাৰ।
শনিবাৰে সাংবাদিকৰ সৈতে মুখামুখি হয় জ্ঞানদেৱ আহুজা। তেওঁৰ মতে, কেৰালাৰ প্ৰাকৃতিক দুৰ্যোগৰ মূল কাৰণ হৈছে গো হত্যা। নেতাগৰাকীৰ মতে যিবোৰ অঞ্চলত গো হত্যা নহয়, সেইবোৰ অঞ্চলত এনেকুৱা ঘটনা সংঘটিত নহয়।
বিজেপি নেতা জ্ঞানদেৱ আহুজাই কয়, ‘২০১৮ চনৰ পৰা আমি পৰ্যবেক্ষণ কৰি আহিছো যে গো হত্যা অধিক হোৱা অঞ্চলত এনে দুৰ্যোগ অধিক সংঘটিত হৈছে। উত্তৰাখণ্ড, হিমাচলতো দুৰ্যোগ হৈছে যদিও ইমান ভয়াৱহ নহয়। কেৰেলাই যদি গো হত্যা বন্ধ নকৰে, তেন্তে অনাগত দিনত আৰু ভয়ংকৰ ঘটনা সংঘটিত হ’ব’।
উল্লেখ কৰা প্ৰয়োজন নাই যে অৰ্থহীন কথা কৈ অনাহক বিতৰ্ক সৃষ্টিৰ বাবে বিখ্যাত এইজন বিজেপি নেতা জ্ঞানদেৱ আহুজা। ইয়াৰ পূৰ্বেও এনে ধৰণৰ কথা কোৱাৰ ইতিহাস আছে এইজন নেতাৰ।
সকলোৱে জানে যে যোৱা মঙলবাৰে কেৰালাৰ ৱায়নাড জিলাৰ কেইখনমান গাঁৱত ভূমিস্খলন সংঘটিত হোৱাৰ বাবে ৩৫০ জনৰো অধিক ব্যক্তিয়ে মৃত্যুক আকোৱালি লৈছে। বহু লোক এতিয়াও সন্ধানহীন। সম্প্ৰতি উদ্ধাৰ অভিযান চলাই আছে উদ্ধাৰকাৰী দলে। শ শ লোক হৈ পৰিছে গৃহহীন। ৰাজ্যৰ ১০০ৰো অধিক সাহায্য শিবিৰত ১০ হাজাৰৰো অধিক লোকক আশ্ৰয় দিয়া হৈছে।
বিশেষজ্ঞ সকলে দাবী কৰিছে যে আন্তঃগাঁথনিৰ নামত প্ৰকৃতি ধবংস কৰি ৰিজৰ্ট আৰু হোটেল নিৰ্মাণ কৰাৰ বাবেই কেৰালাত এই ভূমিস্খনলৰ ঘটনাই ভয়াৱহ ৰূপ ধাৰণ কৰিছে। নিৰ্মাণৰ নামত প্ৰকৃতি ধ্বংস নকৰিবলৈ দীৰ্ঘদিন ধৰি সকীয়াই আহিছে প্ৰকৃতি সুৰক্ষা সংগঠনৰ লগতে বিশেষজ্ঞ সকলে। এনে গুৰুতৰ আৰু বেদনাজনক পৰিস্থিতিৰ মাজত ফটুৱামী কৰিবলৈ এৰি দিয়া নাই বিজেপিৰ নেতাই। ভূমিস্খলনত মৃত্যু হোৱা আৰু গৃহহীন হোৱা লোকসকলৰ কাষলৈ গৈ আশ্বাস আৰু সহায়ৰ হাত আগবঢ়োৱাৰ সলনি এই ঘটনাক লৈ গৰুৰ ৰাজনীতিত নামি পৰিছে এইজন নিৰ্লজ বিজেপি নেতা। কেৱল গৰুৰ ৰাজনীতিয়েই নহয় ভূমিস্খলনত মৃত্যু হোৱা শ শ নীৰিহ লোকৰ মৃত আত্মাক গোহত্যাকাৰী সজাই চূড়ান্ত অপমান কৰিছে এইজন ধেমালিতে হোৱা বিজেপি নেতাই।
