আকৌ এবাৰ পাকিস্তানৰ মাটিত অচিনাক্ত আক্ৰমণকাৰীয়ে লক্ষ্য কৰি লৈছে লস্কৰ-ই-তৈবাৰ শীৰ্ষ নেতাক। লাহোৰৰ এটা নিউজ চেনেলৰ কাৰ্যালয়ৰ বাহিৰত লস্কৰ-ই-তৈবাৰ প্ৰতিষ্ঠাপক সদস্য তথা কুখ্যাত উগ্ৰপন্থী আমিৰ হামজাক লক্ষ্য কৰি নিৰ্বিচাৰ গুলীচালনা কৰে দুষ্কৃতিকাৰীয়ে। বৰ্তমান হামজা চিকিৎসালয়ত গুৰুতৰভাৱে আহত অৱস্থাত চিকিৎসাধীন হৈ আছে, তেওঁৰ অৱস্থা অতি সংকটজনক বুলি জানিব পৰা গৈছে।
আমিৰ হামজা কেৱল লস্কৰ-ই-তৈবাৰ প্ৰতিষ্ঠাপক সদস্যই নহয়, তেওঁ হাফিজ ছইদৰ দীৰ্ঘদিনীয়া ঘনিষ্ঠ সহযোগী আছিল। আশীৰ দশকত আফগান মুজাহিদীনত থাকি যুদ্ধ কৰাৰ অভিজ্ঞতাও তেওঁৰ আছিল।
তেওঁ আছিল লস্কৰ-ই-তৈবাৰ মূল মুখপত্ৰ ‘মাজাল্লা আল-দাৱা’ৰ প্ৰতিষ্ঠাপক সম্পাদক। তেওঁৰ উগ্ৰ ভাষণ আৰু উগ্ৰবাদী মতাদৰ্শৰ প্ৰচাৰ কৰা ‘কাফিলা দাৱত আৰ শ্বাহাদত’ নামৰ গ্ৰন্থখনে উগ্ৰপন্থীক প্ৰেৰণা যোগোৱাত গুৰুত্বপূৰ্ণ ভূমিকা পালন কৰিছিল।
আমেৰিকাৰ কোষাগাৰ বিভাগে তেওঁক ‘গ্ল’বেল টেৰ’ৰিষ্ট’ বুলি ঘোষণা কৰিছে। লস্কৰৰ কেন্দ্ৰীয় সমিতিত তেওঁ উগ্ৰপন্থী নিযুক্তি, ধন সংগ্ৰহ আৰু কাৰাবন্দী উগ্ৰপন্থীক মুক্তিৰ আলোচনাৰ কাম চম্ভালিছিল।
২০১৮ চনত যেতিয়া পাকিস্তান চৰকাৰে লস্কৰৰ সৈতে জড়িত সংগঠন জামাত-উদ-দাৱা আৰু ফালাহ-ই-ইনছানিয়াত ফাউণ্ডেশ্যনক নিষিদ্ধ কৰিছিল, তেতিয়া হামজাই কৌশলগতভাৱে নিজকে আঁতৰাই ৰাখি ‘জীছ-ই-মানকাফা’ নামৰ এটা নতুন গোট গঠন কৰিছিল। অভিযোগ অনুসৰি এই সংগঠনৰ জৰিয়তে তেওঁ জম্মু-কাশ্মীৰত উগ্ৰপন্থী কাৰ্যকলাপ চলাইছিল।
সূত্ৰৰ পৰা জানিব পৰা মতে, বৃহস্পতিবাৰে লাহোৰৰ এটা নিউজ চেনেলৰ কাৰ্যালয়ৰ সন্মুখত পাৰ হৈ যোৱাৰ সময়তে অচিনাক্ত বন্দুকধাৰীয়ে তেওঁলৈ লক্ষ্যকৰি গুলীচালনা কৰে। পাকিস্তানৰ ভূমিত লস্কৰৰ নেতৃত্বৰ বাবে হামজাৰ আক্ৰমণক এক বৃহৎ বিপৰ্যয় হিচাপে বিবেচিত হৈছে।
শেহতীয়াকৈ পাকিস্তানৰ মাটিত ধাৰাবাহিকভাৱে ভাৰত বিৰোধী উগ্ৰপন্থী নেতাৰ ৰহস্যজনক মৃত্যু বা আক্ৰমণ সংঘটিত হৈছে। আমিৰ হামজাৰ ওপৰত কৰা আক্ৰমণ সেই ধাৰাবাহিকৰ অংশ নেকি সেই সন্দৰ্ভত জল্পনা-কল্পনা আৰম্ভ হৈছে। সম্প্ৰতি পাকিস্তানৰ নিৰাপত্তা বাহিনীয়ে ঘেৰি ধৰিছে চিকিৎসালয় চৌহদ। এতিয়ালৈকে কোনো সংগঠনে এই আক্ৰমণৰ দায়িত্ব স্বীকাৰ কৰা নাই।
