প্ৰধান মন্ত্ৰী নৰেন্দ্ৰ মোদীৰ সপোনৰ ‘ডিজিটেল ইণ্ডিয়া’ক অসম আৰক্ষীয়েনো কিমান গুৰুত্বসহ লৈছে? সমান্তৰালভাৱে ‘ডিজিটেলি’ কিমান ‘স্মাৰ্ট’ অসম আৰক্ষী?
স্বাভাবিকতে মোদীৰ ‘ডিজিটেল ইণ্ডিয়া’ আৰু ‘স্মাৰ্ট পুলিচ’ৰ ধাৰণাক এক প্ৰকাৰ ভেঙুচালি কৰি থকা পৰিলক্ষিত হয় অসমৰ আৰক্ষী বিভাগটোত। ‘ডিজিটেল পৃথিৱী’খনৰ পৰা দূৰৈত থাকিয়েই এতিয়াও যেন ৰাজ্যত সঘনাই ঘটি থকা বিভিন্ন ঘটনা-পৰিঘটনাৰ সৈতে মোকামিলা কৰি আছে অসম আৰক্ষীয়ে। যিটো বিষয়ত গুৰুত্ব নাই অসম চৰকাৰৰ গৃহ বিভাগ আৰু অসম আৰক্ষীৰ বৰমূৰীয়াসকলৰ।
আজিৰ ‘ডিজিটেল’ যুগত যিকোনো কাৰণত যদি তাৎক্ষণিকভাৱে আৰক্ষীৰে যোগোযোগ কৰাৰ প্ৰয়োজন হয় তেতিয়াহ’লে স্বভাৱিকভাৱেই বহুতেই ইন্টাৰনেটৰ সহায় ল’ব। কিন্তু ইন্টাৰনেটত কিমান শুদ্ধ ৰূপত পোৱা যায় অসম আৰক্ষীৰ তথ্য? বা কিমান ‘আপডেটেড’ অসম আৰক্ষীৰ ইন্টাৰনেটত উপলব্ধ তথ্যসমূহ?
আমি প্ৰথমতে আপোনাক তিনিচুকীয়া জিলাৰ তিনিচুকীয়া থানাৰ অন্তৰ্গত পানীতোলা আৰক্ষী চকীৰ খবৰ দিব বিচাৰিছো। এই আৰক্ষী চকীতেই কেইবাবছৰ পূৰ্বে ভাৰপ্ৰাপ্ত বিষয়া আছিল ভাস্কৰ কলিতা। আপোনাৰ নিশ্চয় মনত আছে সেইগৰাকী ভাস্কৰ কলিতাই বৰডুমুচা আৰক্ষী থানাত ভাৰপ্ৰাপ্ত হৈ থাকোতে আলফাৰে হোৱা সংঘৰ্ষত চহিদ হৈছিল।
ভাস্কৰ কলিতা আজি কেইবাবছৰ আগতেই পানীতোলা আৰক্ষী চকীৰ পৰা বৰডুমুচা থানালৈ বদলি হৈছিল আৰু সেইখন থানাত থাকোতেই যোৱা মে’ মাহত আলফাৰ গুলীত প্ৰাণ হেৰুৱাব লগীয়া হৈছিল।
কিন্তু দুৰ্ভাগ্যজনকভাৱে অসম আৰক্ষীৰ ৱেবছাইটত কেইবাবছৰৰ পূৰ্বে পানীতোলা আৰক্ষী চকীৰ ভাৰপ্ৰাপ্ত বিষয়াৰ চকীত থকা ভাস্কৰ কলিতাৰ নাম আজিও তেনেকৈয়ে আছে।
এইবাৰ দ্বিতীয় এটা উদাহৰণ দাঙি ধৰিব বিচাৰিছো। কাৰ্বি আংলং জিলাৰ আৰক্ষীৰ কথা। যোৱা জুন মাহৰ ৭ তাৰিখে জিলাখনৰ ডকমকা থানাৰ অন্তৰ্গত পানজুৰিৰ কছাৰী গাঁৱত সংঘটিত হৈছিল ৰাজ্য কঁপোৱা নীলোৎপল দাস আৰু আভিজিৎ নাথৰ হত্যাকাণ্ড।
এই হত্যাকাণ্ডৰ পাছতেই জিলাখনৰ উপায়ুক্তই তুলুঙা মন্তব্য কৰিছিল, “তেওঁলোকে সেই ঠাইত যোৱাৰ আগতেই আৰক্ষীক জনাই গৈছিল নেকি?” কিন্তু কোনো এজন লোকে অসম আৰক্ষীৰ ৱেবছাইটৰ পৰা যদি ডকমকা থানাৰ নম্বৰ লয়, তেতিয়াহ’লে তেওঁৰ যোগাযোগ সম্ভৱ নোহোৱাটো নিশ্চিত। কিয়নো অসম আৰক্ষীৰ ৱেবছাইটত থকা জিলাখনৰ ডকমকা থানাৰ ০৩৬৭৬-২২৯৮৩৭ নম্বৰটোত যদি কোনোবাই কল কৰে, উত্তৰ পাব, ‘আপুনি কল কৰা নম্বৰটো বৈধ নহয়’। আনহাতে, ৱেবছাইটত উপলব্ধ জিলাখনৰ আৰক্ষীৰ নিয়ন্ত্ৰণ কক্ষৰ ফোন নম্বৰটোত যোগোযোগ কৰিলেও পোৱা যায় একেটাই উত্তৰ।
এই দুটা মাত্ৰ উদাহৰণ হে, ৰাজ্যখনৰ আৰক্ষী বিভাগৰ ৱেবছাইটত উপলব্ধ হোৱা প্ৰায়বোৰ তথ্যই এতিয়া পুৰণি।
ৰাজ্যখনৰ তিনিচুকীয়া, বঙাইগাওঁ, গোলাঘাট, কাৰ্বি আংলং, ধেমাজি, হামৰেন, শোণিতপুৰ, ওদালগুৰি, বাক্সা, কাছাৰ, দৰং, গোৱালপাৰা, নলবাৰী, শদিয়া আদি আৰক্ষী জিলাৰ অসম আৰক্ষীৰ ৱেবছাইটত লাভ কৰা নিয়ন্ত্ৰণ কক্ষৰ ফোন নম্বৰত যোগোযোগ কৰিলে বিফল হোৱাটো খাটাং।
সমান্তৰালভাৱে আমি বৰপেটা আৰু ডিমা হাচাও জিলাৰ আৰক্ষীৰ নিয়ন্ত্ৰণ কক্ষলৈ কেইবাৰো যোগাযোগ কৰিবলৈ চেষ্টা কৰিছিলো যদিও ফোনটো ৰিং হৈ থকাৰ পাছতো নিয়ন্ত্ৰণ কক্ষৰ পৰা সঁহাৰি নাহিল।
হয়তো কোনোবা জিলাৰ নিয়ন্ত্ৰণ কক্ষৰ এই নম্বৰ সলনি হৈছে, কিন্তু সেয়া এইপৰ্যন্ত অসম আৰক্ষীৰ ৱেবছাইটত আপডেইট কৰা হোৱা নাই।
ইয়াৰ উপৰি অসম আৰক্ষীৰ ৱেৱছাইটত উপলব্ধ ৰাজ্যখনৰ থানাসমূহৰ নম্বৰৰ বহুসংখ্যক এতিয়া সেৱাত নাই। একেদৰে থানাসমূহৰ ভাৰপ্ৰাপ্ত বিষয়াসকলৰ নাম ৱেবছাইটত উপলব্ধ যদিও বহুতেই সংশ্লিষ্ট থানাখনৰ পৰা বদলি হৈ অন্য থানালৈ যোৱাৰ ভালেমান দিন হৈ গৈছে। কিন্তু তেওঁলোকৰ নাম ৱেৱছাইটত আপডেইট হোৱা নাই।
এইদৰে অসমৰ আৰক্ষী বিভাগটোৱে হাততে পোৱা ‘অনলাইন’ সুবিধাক গুৰুত্বহীন কৰি ৰখা দেখা গৈছে। যাৰ বাবে হঠাতে যি কোনো অনাকাংক্ষিত ঘটনা সংঘটিত হ’লে আৰক্ষীৰ সৈতে যোগাযোগ কৰিবলৈ চেষ্টা কৰি হাহাকাৰ কৰি থাকিলেও যোগাযোগ সম্ভৱ হৈ নুঠে। যাৰ বাবে সাধাৰণ ৰাইজ বিপদৰ সময়ত পাব লগীয়া আৰক্ষী সেৱাৰ পৰাও বঞ্চিত হ’ব লগীয়া হ’ব পৰে।
এইবোৰৰ পৰা এটা কথা প্ৰমাণিত হয় যে ‘ডিজিটেল ইণ্ডিয়া’ আৰু ‘স্মাৰ্ট পুলিচ’ৰ কথা কোৱা নৰেন্দ্ৰ মোদী নেতৃত্বাধীন বিজেপি চৰকাৰৰ দিনতো অসম মুলুকৰ আৰক্ষীয়ে আজিও ‘ডিজিটেল’ শব্দটোৰ ভুকে পোৱা নাই।