উত্তৰ প্ৰদেশৰ মিৰ্জাপুৰত দিনৰ দুপৰতে দুই দুষ্কৃতিকাৰীয়ে এজন অধিবক্তাক গুলীয়াই হত্যা কৰাৰ অভিযোগ উত্থাপন হৈছে। মৃত অধিবক্তাজনৰ নাম ৰাজীৱ সিং। শনিবাৰৰ সমগ্ৰ ঘটনা অঞ্চলটোৰ চিচিটিভি কেমেৰাত বন্দী হৈছিল।
অধিবক্তাক গুলী কৰি পলায়ন কৰিবলৈ লওতেই বাগৰি পৰি যায় দুৰ্বৃত্ত দুজন। যিজন দুস্কৃতিকাৰী বাইক চলাইছিল তেওঁ বহু কষ্ট কৰিও বাইকখন ষ্টাৰ্ট কৰিব নোৱাৰিলে। বহু সময়ৰ চেষ্টা কৰি অৱশেষত বাইকখন ষ্টাৰ্ট কৰি পলায়ন কৰে দুস্কৃতিকাৰী। এই ঘটনাই অঞ্চলটোত ব্যাপক উত্তেজনাৰ সৃষ্টি কৰিছে।
সূত্ৰ অনুসৰি ৰাজীৱ সিঙে প্ৰতিদিনৰ দৰে মৰ্নিং ৱাক কৰিবলৈ ওলাই আহিছিল। সেই সময়ত বাইকত অহা দুজন দুস্কৃতিকাৰীয়ে তেওঁৰ বাট আগুচি ধৰে। তাৰে এজনে বাইকৰ পৰা নামি ৰাজীৱৰ ওপৰত গুলীচালনা কৰে। লগে লগে ৰাজীৱ মাটিত ঢলি পৰে। তেওঁৰ থিতাতে মৃত্যু হয়।
ঘটনাৰ পিছত বাইকখন ষ্টাৰ্ট কৰিবলৈ বহু সময় লাগিছিল। ইফালে স্থানীয় লোকে ঘটনাস্থলীত উপস্থিত হয়। দুষ্কৃতিকাৰীয়ে আগ্নেয়াস্ত্ৰ দেখুৱাই হত্যাৰ ভাবুকি দিয়ে। ফলত দুস্কৃতিকাৰীৰ কাষ চাপিবলৈ কোনোৱে সাহস নকৰিলে। কেইবাবাৰো চেষ্টা কৰাৰ অন্তত অৱশেষত বাইকখন ষ্টাৰ্ট হোৱাত দুষ্কৃতিকাৰীয়ে অঞ্চলটোৰ পৰা পলায়ন কৰে।
ঘটনাৰ খৱৰ লাভ কৰাৰ পিছতে আৰক্ষীয়ে ক্ষীপ্ৰতাৰে সেই স্থানত উপস্থিত হয়। আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। সম্প্ৰতি অঞ্চলটোত আৰক্ষীৰ তহলৰ ব্যৱস্থা কৰা হৈছে। একে সময়তে তদন্তকাৰী দলটোৱে অঞ্চলটোৰ চিচিটিভি ফুটেজ পৰীক্ষা কৰি দুষ্কৃতিকাৰীক চিনাক্ত কৰাৰ চেষ্টা চলাইছে।
আৰক্ষীৰ প্ৰাৰম্ভিক তদন্তৰ পৰা অনুমান কৰা হৈছে যে পুৰণি শত্ৰুতাৰ বাবেই অধিবক্তাজনক হত্যা কৰা হৈছে। মিৰ্জাপুৰ আৰক্ষী প্ৰশাসনে অভিযুক্তক শীঘ্ৰে গ্ৰেপ্তাৰ কৰাৰ আশ্বাস দিছে।
