‘নাজিৰা সমষ্টিৰ বাট-পথৰ বাবে প্ৰাক্তন কেন্দ্ৰীয় ৰেল ৰাজ্যমন্ত্ৰী ৰাজেন গোঁহাইয়ে মোক জগৰীয়া কৰাটো হাস্যকৰ। নিৰ্বাচনৰ আগত ঘঁৰিয়ালৰ চকুপানী টুকিবলৈ নাজিৰাত আহিছে।‘ নৰ্থ ইষ্ট নাওলৈ প্ৰেৰণ কৰা এটা ভিডিঅ’ত এইদৰে কয় বিৰোধী দলপতি দেৱব্ৰত শইকীয়াই।
উল্লেখযোগ্য যে, নগাওঁ লোকসভা সমষ্টিৰ প্ৰাক্তন সাংসদ ৰাজেন গোহাঁইয়ে কালি নাজিৰা সমষ্টিলৈ জন-সম্পৰ্ক অভিযানত অংশগ্ৰহণ কৰিবলৈ গৈ নাজিৰা সমষ্টিৰ অনুন্নত ৰাস্তা-পথৰ বাবে জগৰীয়া কৰিছিল বিধায়ক দেবব্ৰত শইকীয়াক।
তাৰ পাছতে প্ৰতিক্ৰিয়া প্ৰকাশ কৰিছে বিৰোধী দলপতি দেবব্ৰত শইকীয়াই।
শইকীয়াই কয়, ‘তেওঁ নিজে এজন প্ৰাক্তন কেন্দ্ৰীয় চৰকাৰৰ মন্ত্ৰী আছিল। গতিকে তেওঁ ভালদৰে জানে চৰকাৰৰ কামকাজ কেনেকৈ পৰিচালিত হয়। ৰাজ্যৰ সামগ্ৰিক বিকাশ তথা উন্নয়নৰ দায়িত্ব শাসনাধিষ্ঠ দল তথা চৰকাৰৰ হাতত থাকে।‘
‘আমি বিৰোধী দলে বিধানসভাত বিভিন্ন উন্নয়নমূলক আলোচনাত ভাগ লও আৰু চৰকাৰে যেতিয়া পুঁজি আৱন্টন বিচাৰে বিভিন্ন উন্নয়নমূলক কামৰ বাবে যেনে- চিকিৎসালয়, শিক্ষানুষ্ঠান, বাট-পথ নিৰ্মাণৰ বাবে, দৰমহা দিবৰ বাবে তথা গাওঁ আৰু নগৰৰ উন্নয়নৰ বাবে আমি সেই পুঁজি সমূহ আলোচনাৰ পিছত চৰকাৰৰ হাতত সপি দিওঁ,‘-শইকীয়াই লগতে কয়।
ইপিনে, বিধায়কে চমজাই দিয়া সেই পুঁজিৰে চৰকাৰী পক্ষই বাট-পথৰ উন্নয়ন কৰিছে নে দুৰ্নীতি কৰিছে সেয়া তেওঁলোকৰ মনোবৃত্তিৰ ওপৰত নিৰ্ভৰ কৰে বুলি মন্তব্য কৰে শইকীয়াই।
শইকীয়াই আৰু কয়, ‘যদিও অসমৰ ৰাইজে ভালকৈ জানে বিকাশৰ নামত গাওঁ অঞ্চলত কেনেকৈ চলি আছে বিনাশৰ অতপালি।‘
মুখ্যমন্ত্ৰীয়ে দুৰ্নীতিমুক্ত অসমৰ কথা কয় যদিও বিজেপি দলৰ বিভিন্ন দুৰ্নীতিৰ খবৰে বাতৰি-কাকতৰ শিৰোনাম দখল কৰে বুলি গুৰুতৰ অভিযোগ তোলে শইকীয়াই।
ৰাজেন গোহাঁই মন্ত্ৰী হৈ থাকোঁতে ২ আগষ্ট,২০১৬ ত নাজিৰা মহকুমাৰ শিমলুগুৰি জংচনটোত ৰাজধানী ৰে’ল নিয়মীয়াকৈ ৰখাব পৰাকৈ এক ব্যৱস্থা কৰাই দিবলৈ পত্ৰ লিখি অনুৰোধ জনোৱা বুলি উল্লেখ কৰে শইকীয়াই।
‘অকল তেওঁয়ে নহয় সাংসদ তপন গগৈ, কামাখ্যা প্ৰসাদ তাছা, মন্ত্ৰী ৰামেশ্বৰ তেলীকো মই পত্ৰ লিখি এই বিষয়ে অনুৰোধ জনাইছিলোঁ । কিন্তু শাসনত থকাৰ পিছতো শিৱসাগৰ জিলাৰ ৰাইজৰ বাবে তেওঁলোকে সেই নূন্যতম কামটোও কৰি দিবলৈ সক্ষম নহ’ল আৰু এতিয়া নিৰ্বাচনৰ আগত উন্নয়নৰ কথা কৈ ঘঁৰিয়ালৰ চকুপানী টুকিবলৈ অহাটো অশোভনীয়,‘-ভিডিঅ’টোত এইদৰে কয় শইকীয়াই।
সেয়েহে উদ্দেশ্য প্ৰৰোচিতভাৱে যিকোনো মন্তব্যৰে মাত্ৰ ৰাজনীতি কৰিবলৈ ইয়ালৈ নাহিবৰ বাবে তেওঁক শইকীয়াই সকীয়াই দিয়ে।
২০২১ৰ বিধানসভাৰ নিৰ্বাচন সমাগত, সেয়েহে এনেদৰেই শাসক-বিৰোধীৰ মাজত বোকা চটিওৱা ৰাজনীতি বা বাক-বিতণ্ডা আৰম্ভ হোৱা পৰিলক্ষিত হৈছে।