বিভিন্ন সমস্যাৰে ভাৰাক্ৰান্ত অসম। অসম যাৰ অৰ্থই ‘অসমান’ আৰু এইখন অসমতে এটাৰ পাছত আন এটা সমস্যাই প্ৰতিদিনে গা কৰি উঠা পৰিলক্ষিত হয়।
সেয়া লাগিলে বানপানী গৰাখহনীয়াৰ সমস্যাই হওঁক, ভূমিস্খলন, ডিমা হাচাওত প্ৰকৃতিৰ তাণ্ডৱলীলাই নহওঁক মুঠৰ ওপৰত এশ এবুৰি সমস্যাৰে জৰ্জৰিত অসম।
ঠিক সেইদৰে শেহতীয়াকৈ বটদ্ৰৱা কাণ্ডই কঁপাই তুলিছে অসম। প্ৰথমে আৰক্ষীৰ জিম্মাত মাছ বেপাৰীৰ মৃত্যু, তাৰ পাছত আকৌ উত্তেজিত পৰিয়ালৰ লোকে জ্বলাই দিলে বৰদোৱা আৰক্ষী থানা। তাৰ পাছদিনাই নগাঁও জিলা আৰক্ষী প্ৰশাসনে উচ্ছেদ চলালে বৰদোৱা ছালনাবাড়ীৰ ছফিকুলৰ পৰিয়ালৰ কেইবাটাও বাসগৃহ।
ইতিমধ্যে নগাঁও আৰক্ষীয়ে বহুকেইগৰাকী অভিযুক্তক গ্ৰেপ্তাৰ কৰিছে। তাৰ মাজতে আৰক্ষীৰ গাড়ীৰ পৰা জপিয়াই ৰহস্যজনক দুৰ্ঘটনাত মৃত্যুত আকোৱালি লৈছে আছিকুল নামৰ অভিযুক্তই।
তাৰ পাছতে এই বিষয়টোৱে ৰাজ্যজুৰি চৰ্চা লাভ কৰিছে আৰু তুমূল বিতৰ্কৰো সূচনা কৰিছে।
ৰাজ্যৰ এনে অগ্নিগৰ্ভা অৱস্থাতে আকৌ প্ৰদেশ কংগ্ৰেছৰ সভাপতি ভূপেন বৰা আৰু শাসকীয় দলৰ মন্ত্ৰী পিযুষ হাজৰিকাৰ মাজত কবিতা ৰচনা কৰাৰ প্ৰতিযোগিতা চলিছে।
কিছুদিন পূৰ্বে নিজকে ফায়াৰব্ৰিগেট আখ্যা দি কবিতা ৰচনা কৰি চৰ্চিত হোৱা ভূপেন বৰাই পুনৰ লিখিছে অন্য এটা কবিতা।
কবিতাটোৰ শিৰোনাম
“Extra Judicial Killing”
অগ্নি দেৱতাই থানা দহিছে,
জলদেৱতাই নৈপৰীয়াৰ নিদ্রা হৰিছে।
একাউণ্টাৰ মৃত্যুৰ কিৰীলি হৈ দৌৰি ফুৰিছে,
মৃত্যুৰ যজ্ঞৰ বাবেহে যেন প্রতিযোগিতা চলিছে!
বুলড’জাৰৰ বিকট শব্দত ডলু বাগিছাৰ চৰাইবোৰেও যেন আৰ্তনাদ কৰিছে!
মানৱতাৰ স্খলনৰ স’তে
ডিমা হাছাওৰ ভূমিস্খলনে
ফেপেৰি পাতিছে!!
ভূপেন বৰাৰ এই কবিতাৰ বাবেই যেন অপেক্ষা কৰি আছিল বিজেপি চৰকাৰৰ মন্ত্ৰী পিযুষ হাজৰিকা। বৰাৰ কবিতা শুনি কেনেকৈনো ৰৈ থাকে মন্ত্ৰী হাজৰিকা? কবি নহ’লেও ভূপেন বৰাৰ নাম উচ্চাৰণ নকৰাকৈ মঞ্চত বহি থাকোতেই লিখি উলিয়ালে কবিতা।
মন্ত্ৰী পিযুষ হাজৰিকাৰ কবিতাটো হ’ল :
“সাতটা ইলেকশ্যনত হ’লো মই পৰাস্ত
আঠটাত হাৰি হ’ম সৰ্বশ্ৰান্ত
নাযাওঁ মই প্ৰচাৰত
কৰিম মই কংগ্ৰেছ দল ধ্বংস ।
ৰাজীৱ ভৱনত কমাৰ্চিয়েল কমপ্লেক্স বনাম
টিকট বিক্ৰী কৰাৰ দৰে ৰাজীৱ ভৱনো বিক্ৰী কৰি
লুটি পুটি খাম”।
এনেবোৰ কবিতাই প্ৰকৃততে ৰাজ্যৰ মূল সমস্যাবোৰৰ পৰা জনসাধাৰণক আঁতৰাই ৰখাৰ এক প্ৰকাৰৰ যেন কৌশল লৈছে শাসক-বিৰোধী উভৈ পক্ষৰ কিছুসংখ্যক মন্তব্যই।
যিসময়ত আকাশলঙ্ঘী মূল্যবৃদ্ধিয়ে সৰ্ব সাধাৰণৰ মূৰত মাধমাৰ সোধাইছে, নিবনুৱা সমস্যাই যুৱ চামৰ মাজত হতাশ আনিছে বা চাকৰি হেৰুৱাই কিছু লোক সৰ্বশ্ৰান্ত হৈছে তেনে সময়ত বিৰোধী হিচাপে সবল যুক্তিৰে শাসকগ পক্ষক যুক্তি দাঙি ধৰিব লাগিছিল তেনে সময়ত কবিতা চৰ্চাতহে মনোনিবেশ কৰিছে ভূপেন বৰাই। যি সময়ত ৰাজ্যত কংগ্ৰেছ দলৰ মাজত নেতৃত্বক লৈ খোৱা কামোৰাৰ ফলত দলটোত গৰাখহনীয়া হৈছে তেনে সময়ত ভূপেন বৰাৰ এনে কবিতা কিমান দূৰ সমিচীন বুলিও একাংশই মত পোষণ কৰিছে।
ভূপেন বৰাৰ এই কবিতাৰ অচিলালৈ মূল ইচ্ছুৰ পৰা জনতাক আঁতৰাই ৰাখিবলৈ পুনৰ কবিতা লিখি জনতাক অন্য বিষয়ত ব্যস্ত ৰখাৰ চেষ্টা কৰিছে মন্ত্ৰী পিযুষ হাজৰিকাই।
ইয়াৰোপৰি, ভূপেন বৰাৰ কবিতাটোৰ প্ৰথম শাৰীত অগ্নি দেৱতাৰ নাম উচ্চাৰণ কৰাক লৈয়ো এচাম বিতৰ্কত ব্যস্ত হৈ পৰা দেখিবলৈ পোৱা গৈছে।