খালিস্তানী বিচ্ছিন্নতাবাদী হৰদীপ সিং নিজ্জৰৰ হত্যাকাণ্ডক লৈ কানাডাত নতুনকৈ আলোড়নৰ সৃষ্টি হৈছে। এটা ফাদিল হোৱা অডিঅ’ ক্লিপত গেংষ্টাৰ সতীন্দৰজিৎ সিং ওৰফে গোল্ডি ব্ৰাৰে নিজৰ দলটো নিজ্জৰ হত্যাকাণ্ডৰ লগত জড়িত বুলি দাবী কৰিছে বুলি বিভিন্ন প্ৰতিবেদনত প্ৰকাশ পাইছে। কিন্তু অডিঅ’টোৰ সত্যতা আৰু কথোপকথনত ব্ৰাৰৰ কণ্ঠ আছে নে নাই সেয়া স্বতন্ত্ৰভাৱে পৰীক্ষা কৰিব পৰা হোৱা নাই।
অডিঅ’ত খালিস্তানী উগ্ৰপন্থী পৰমজিৎ সিং পামাৰ সৈতে ব্ৰাৰক বাৰ্তালাপ কৰা শুনা বুলি দাবী কৰা হৈছে। নিজ্জৰক কিয় টাৰ্গেট কৰা হৈছিল তাৰ এটা কাৰণো তেওঁ উল্লেখ কৰিছে বুলি প্ৰতিবেদনত কোৱা হৈছে।
ইয়াৰ পূৰ্বে ২০২৬ চনৰ জুলাই মাহত আমেৰিকাৰ আদালতত প্ৰকাশ পোৱা চাৰ্জশ্বীটত লৰেন্স বিষ্ণোই আৰু গোল্ডি ব্ৰাৰক ২০২৩ চনত নিজ্জৰক হত্যাৰ নিৰ্দেশ দিয়াৰ অভিযোগ উত্থাপন হৈছিল। আমেৰিকাৰ চাৰ্জশ্বীটত ভাৰত চৰকাৰৰ কোনো ভূমিকাৰ অভিযোগ উত্থাপন কৰা হোৱা নাছিল।
ফাদিল হোৱা অডিঅ’টোত ব্ৰাৰে দাবী কৰিছে যে নিজ্জৰে যুৱক-যুৱতীক ড্ৰাগছ ব্যৱসায়ত ব্যৱহাৰ কৰা আৰু তেওঁলোকৰ জৰিয়তে ড্ৰাগছ বিক্ৰী কৰাত জড়িত একাংশ লোকক সমৰ্থন কৰিছিল। তেওঁ দাবী কৰে যে এই কাৰণেই নিজ্জৰক হত্যাৰ সিদ্ধান্ত লোৱা হৈছিল।
অডিঅ’টোত ব্ৰাৰে লগতে দাবী কৰিছে যে তেওঁৰ দলটোৱে বিশ্বাস কৰিছিল যে নিজ্জৰে এই লোকসকলক শক্তিশালী কৰি তুলিছে আৰু ভৱিষ্যতে তেওঁলোকক ব্যৱহাৰ কৰিব পাৰিব। অৱশ্যে এই বক্তব্যক বৰ্তমান গোল্ডি ব্ৰাৰৰ নিজৰ দাবী হিচাপে দেখা গৈছে। অডিঅ’টোৰ উৎস, সম্পাদনা কৰা হৈছে নে নাই, কথা-বতৰা প্ৰকৃত নে সেই সন্দৰ্ভত এতিয়াও কোনো স্বতন্ত্ৰ আনুষ্ঠানিক নিশ্চিতকৰণ হোৱা নাই।
২০২৩ চনৰ ১৮ জুনত কানাডাৰ ব্ৰিটিছ কলম্বিয়াৰ ছাৰেত গুৰদ্বাৰাৰ বাহিৰত হৰদীপ সিং নিজ্জৰক গুলীয়াই হত্যা কৰা হৈছিল।হত্যাৰ পিছত কানাডাৰ তদানীন্তন প্ৰধানমন্ত্ৰী জাষ্টিন ট্ৰুডোৱে ভাৰত চৰকাৰৰ এজেণ্টৰ সম্ভাৱ্য জড়িত থকাৰ অভিযোগ উত্থাপন কৰিছিল।
নতুন দিল্লীয়ে এই অভিযোগ সম্পূৰ্ণৰূপে নাকচ কৰি কানাডাৰ মাটিত খালিস্তান সমৰ্থক সংগঠন আৰু ব্যক্তিৰ কাৰ্যকলাপৰ ওপৰত আপত্তি উত্থাপন কৰিছিল। নিজ্জৰ হত্যাৰ অভিযোগক লৈ দীৰ্ঘদিন ধৰি ভাৰত আৰু কানাডাৰ মাজত দ্বিপাক্ষিক সম্পৰ্ক নিম্নগামী হৈ আছে।
২০২৬ চনৰ জুলাই মাহত আমেৰিকাই লৰেন্স বিষ্ণোই আৰু তেওঁৰ সহযোগী গোল্ডি ব্ৰাৰক নিজ্জৰক হত্যাৰ ষড়যন্ত্ৰ কৰাৰ অভিযোগ উত্থাপন কৰিছিল। আমেৰিকাৰ আদালতত প্ৰকাশ পোৱা অভিযোগনামা অনুসৰি কাৰাগাৰত থকা বিষ্ণোইক হত্যাৰ নিৰ্দেশ দিয়াৰ আৰু উত্তৰ আমেৰিকাত গেঙৰ কাৰ্যকলাপ ব্ৰাৰক চলোৱাৰ অভিযোগ উত্থাপন হৈছে।
এই তদন্ত আছিল আন্তঃৰাষ্ট্ৰীয় সংগঠিত অপৰাধ দমনৰ বাবে চলোৱা বৃহত্তৰ অভিযানৰ অংশ হিচাপে। আমেৰিকা কৰ্তৃপক্ষই অভিযোগ কৰিছে যে এটা সংগঠিত অপৰাধৰ চক্ৰ হত্যা, ধন দাবী আৰু ড্ৰাগছ সৰবৰাহকে ধৰি একাধিক অপৰাধৰ সৈতে জড়িত।
নিজ্জৰ হত্যাকাণ্ডৰ অন্তিমটো উল্লেখযোগ্য পৰিঘটনা ২০২৬ চনৰ জুলাই মাহত হৈছিল।ৰয়েল কানাডিয়ান মাউণ্টেড পুলিচৰ (আৰ চি এম পি) উপ আয়ুক্ত লিজা ম’ৰলেণ্ডে কয় যে সংগঠিত অপৰাধৰ তদন্ত আৰু উত্থাপিত অভিযোগৰ ভিত্তিত ভাৰত চৰকাৰৰ বিষয়াসকল হত্যাকাণ্ডৰ লগত জড়িত থকাৰ কোনো প্ৰমাণ পোৱা নাই। তেওঁ লগতে ভাৰত চৰকাৰে তদন্তত সহযোগিতা আগবঢ়োৱা বুলিও কয়। এই বক্তব্যই তদানীন্তন প্ৰধানমন্ত্ৰী জাষ্টিন ট্ৰুডোৰ পূৰ্বৰ অভিযোগৰ প্ৰত্যক্ষ বিৰোধিতা কৰিছে। ট্ৰুডোৰ এই অভিযোগেই ভাৰত-কানাডাৰ সম্পৰ্কৰ বৃহৎ সংকটৰ অন্যতম কাৰণ আছিল।
ইপিনে, গোল্ডি ব্ৰাৰ এতিয়াও পলাতক। আমেৰিকাৰ ফেডাৰেল ব্যুৰো অৱ ইনভেষ্টিগেশ্যনে (এফ বি আই) ঘোষণা কৰিছে যে তেওঁক গ্ৰেপ্তাৰ কৰা তথ্যৰ বাবে ৫০ হাজাৰ ডলাৰ পৰ্যন্ত পুৰস্কাৰ দিয়া হ’ব। এফ বি আইৰ তথ্য অনুসৰি সতীন্দৰজিৎ সিং ওৰফে গোল্ডি ব্ৰাৰ লৰেন্স বিষ্ণোইৰ সংগঠিত অপৰাধ চক্ৰৰ সৈতে জড়িত আৰু এই চক্ৰটো আমেৰিকা আৰু কানাডাৰ বিভিন্ন ঠাইত হিংসাত্মক অপৰাধৰ সৈতে জড়িত বুলি অভিযোগ উঠিছে।
ইতিমধ্যে নিজ্জৰ হত্যাকাণ্ড সন্দৰ্ভত আমেৰিকাৰ অভিযোগনামাত বিষ্ণোই আৰু ব্ৰাৰৰ বিৰুদ্ধে গুৰুতৰ অভিযোগ উত্থাপন হৈছে। এই ফাদিল অডিঅ’ৰ প্ৰকাশে এই গোচৰটোক কেন্দ্ৰ কৰি এক নতুন আলোচনাৰ সূচনা কৰিছে। কিন্তু সাংবাদিকতাৰ দৃষ্টিকোণৰ পৰা গুৰুত্বপূৰ্ণ কথাটো হ’ল অডিঅ’টো এতিয়াও স্বতন্ত্ৰভাৱে পৰীক্ষা কৰা হোৱা নাই। গতিকে ইয়াক নিৰ্ণায়ক প্ৰমাণ বা ব্ৰাৰৰ চৰকাৰী স্বীকাৰোক্তি হিচাপে দাঙি ধৰাটো সঠিক বুলি ক’ব নোৱাৰি।
