মহানগৰীৰ পাণ্ডু অঞ্চলত সোমবাৰে বিয়লি এটা নাহৰফুটুকীৰ বিচৰণ ধৰা পৰাৰ পাছত অঞ্চলটোৰ ৰাইজ শংকিত হৈ পৰিছে। ব্ৰহ্মপুত্ৰৰ পাৰৰ ‘টেম্পল ঘাট’ত এটা নাহৰফুটুকী বিচৰণ প্ৰত্যক্ষ কৰা হয়।
কামাখ্যা মন্দিৰলৈ এটা নতুন পথ নিৰ্মাণৰ কামত নিয়োজিত হৈ থকা গড়কাপ্তানি বিভাগৰ কৰ্মীয়ে নাহৰফুটুকীটোৰ বিচৰণ প্ৰত্যক্ষ কৰে যদিও বাঘটোৱে অঞ্চলটোত কোনো ধৰণৰ আক্ৰমণৰ ঘটনা সংঘটিত কৰা নাই।
গড়কাপ্তানি বিভাগৰ কৰ্মীসকলৰ লগতে স্থানীয় ৰাইজে বন বিষয়াক বাঘটোৰ উপস্থিতিৰ বিষয়ে অৱগত কৰে যদিও বন বিভাগে বাঘটো কৰাৰ বাবে কোনো তৎপৰতা প্ৰদৰ্শন কৰা দেখা নগ’ল।
উল্লেখযোগ্য যে যোৱা ২৬ মাৰ্চ পুৱা কামাখ্যাত এটা নাহৰফুটুকী বাঘে সন্ত্ৰাস চলাই তিনিজনকৈ লোকক গুৰুতৰভাৱে আহত কৰিছিল।
নিশাৰে পৰা কামাখ্যাৰ শংকু শৰ্মা নামৰ লোক এজনৰ ষ্ট’ৰ ৰুমত নাহৰফুটুকী বাঘ এটা সোমাই থকাৰ পাছত পুৱা শংকু শৰ্মাৰ ভগ্নী গীতা দেৱীয়ে ষ্ট’ৰ ৰুমটোত প্ৰৱেশ কৰিব খোজাৰ সময়তেই বাঘটোৱে আক্ৰমণ কৰিছিল।
বাঘটোৰ আক্ৰমণত গীতা দেৱী আহত হোৱাৰ লগতে বাঘটোৰ আক্ৰমণৰ পৰা ভগ্নী গীতা দেৱীক ৰক্ষা কৰিবলৈ যোৱা শংকু শৰ্মাও আহত হৈছিল। ইয়াৰ পাছতে বাঘটোৱে কামাখ্যা মন্দিৰৰ কৰ্মচাৰী ক্ষিতীশ শৰ্মাৰ ঘৰত প্ৰৱেশ কৰি তেওঁৰ পত্নীকো আক্ৰমণ কৰিছিল।
ঘটনাৰ পাছতে তাত উপস্থিত হোৱা স্থানীয় ৰাইজে নাহৰফুটুকীটোক কৌশলেৰে ঘৰটোৰ ভিতৰতে আবদ্ধ কৰিবলৈ সক্ষম হৈছিল।
সেইদৰে ইয়াৰ পূৰ্বে ৮ মাৰ্চৰ নিশাও মালিগাঁৱত এটা নাহৰফুটুকী বাঘৰ আক্ৰমণত দীপক হুজুৰী আৰু কমলা হুজুৰী নামৰ এহাল দম্পতী গুৰুতৰভাবে আহত হৈছিল। মালিগাঁৱৰ শংকৰদেৱ নগৰত নিশা পাহাৰৰ পৰা নামি অহা নাহৰফুটুকী বাঘটোৱে ঘৰৰ ভিতৰত প্ৰবেশ দম্পতীক আক্ৰমণ কৰিছিল।
অৱশেষত বন বিভাগে ট্ৰেংকুলাইজাৰেৰে অচেতন কৰি কৰায়ত্ত কৰিছিল নাহৰফুটুকী বাঘটো।
উল্লেখযোগ্য যে মহানগৰীৰ বিভিন্ন অঞ্চলত বনৰীয়া জীৱ-জন্তুই প্ৰায়ে খাদ্যৰ সন্ধানত মানুহৰ বসতিস্থললৈ ঢাপলি মেলিবলৈ লৈছে। ব্যাপক বনধ্বংসৰ পৰিণতিতে এনে ঘটনা সংঘটিত হৈ আহিছে বুলি সচেতন মহলে মত প্ৰকাশ কৰে।
