তিনিচুকীয়া জিলাৰ ৮৩ নং মাৰ্ঘেৰিটা বিধানসভা সমষ্টিৰ অন্তৰ্গত লিডু মাউলাঙত চাহ জনজাতি সম্প্ৰদায়ৰ এটি পৰিয়ালৰ ভূমি অবৈধভাৱে দখল কৰি এটা ইটা ভাটা স্থাপন কৰাক লৈ তীব্ৰ প্ৰতিক্ৰিয়াৰ সৃষ্টি হৈছে। অসম চাহ জনজাতি ছাত্ৰ সন্থাই (আটছা) এই সন্দৰ্ভত গুৰুতৰ অভিযোগ উত্থাপন কৰিছে। আটছাৰ মাৰ্ঘেৰিটা শাখা সমিতিয়ে দাখিল কৰা অভিযোগ অনুসৰি, যুগেশ দাস আৰু জামিনুল ৰহমান ওৰফে পিটকা নামৰ দুজন ব্যক্তিয়ে প্ৰয়োজনীয় অনাপত্তি প্ৰমাণপত্ৰ আৰু আন আন বাধ্যতামূলক চৰকাৰী নথিপত্ৰ নোহোৱাকৈয়ে এই অবৈধ ইটা ভাটাটো চলাই আছে।
ছাত্ৰ সংগঠনটোৱে অভিযোগ কৰা মতে, অভিযুক্ত ব্যক্তি দুজনে লিডু মাউলাঙৰ নিবাসী চাহ জনজাতি সম্প্ৰদায়ৰ চানু মুৰা নামৰ লোকজনৰ ৯ বিঘা ২ কঠা মাটি বে-আইনীভাৱে নিজৰ দখললৈ নি এই ইটা ভাটাটো নিৰ্মাণ কৰিছে। আটছাই লগতে অভিযোগ কৰিছে যে এই ভূমিৰ নামত ভুৱা লীজৰ নথিপত্ৰও প্ৰস্তুত কৰা হৈছিল। এই সন্দৰ্ভত আটছাৰ কেন্দ্ৰীয় কাৰ্যনিৰ্বাহক সমিতিৰ নেতা প্ৰাঞ্জল বৰাইকে প্ৰকাশ কৰে যে, লীজৰ চুক্তিমৰ্মে চানু মুৰাই বছৰি ৯ লাখ টকাকৈ চাৰি বছৰত মুঠ ৩৬ লাখ টকা লাভ কৰিবলগীয়া আছিল যদিও তেওঁক এই ধনৰাশি প্ৰদান কৰা হোৱা নাই।
এই গুৰুতৰ অভিযোগৰ ভিত্তিত মাৰ্ঘেৰিটা ৰাজহ চক্ৰ কাৰ্যালয়ত বিষয়টোৰ দ্বিতীয়’টো শুনানি সম্পন্ন হৈছে। শুনানিৰ অন্তত মাৰ্ঘেৰিটা সহ-জিলা প্ৰশাসনে অভিযুক্ত যুগেশ দাসক অহা এমাহৰ ভিতৰত লীজ সম্পৰ্কীয় সকলো বৈধ নথিপত্ৰ প্ৰশাসনৰ ওচৰত দাখিল কৰিবলৈ কঠোৰ নিৰ্দেশ দিছে। এই ঘটনাৰ এক পুংখানুপুংখ তদন্তৰ বাবে বৰ্তমান বিভিন্ন মহলৰ পৰা দাবী উত্থাপন হোৱাৰ সময়তে চৰকাৰী কৰ্তৃপক্ষই সমগ্ৰ বিষয়টোৰ ওপৰত তীক্ষ্ণ নজৰ ৰাখিছে আৰু প্ৰশাসনিক পৰ্যায়ত ইয়াৰ সূক্ষ্ম পৰীক্ষা অব্যাহত আছে।
