ছল্ট লেকস্থিত যুৱ ভাৰতী ক্ৰীড়াংগণত লিয়নেল মেছিৰ ‘GOAT ভ্ৰমণ’ কাৰ্যসূচীত হোৱা তীব্ৰ বিশৃংখলতাৰ পিছতে পশ্চিমবংগ আৰক্ষীয়ে অনুষ্ঠান ব্যৱস্থাপক (Event Manager) শতদ্ৰু দত্তক গ্ৰেপ্তাৰ কৰিছে। “প্ৰিন্স অৱ ফুটবল” হিচাপে খ্যাত মেছিক ভালদৰে দেখা নাপাই অনুৰাগীসকল ক্ষোভিত হৈ পৰে, যাৰ ফলত খেলপথাৰত এক অবৰ্ণনীয় পৰিৱেশৰ সৃষ্টি হয়।
জানিব পৰা মতে অনুৰাগীসকলে ৪৫০০ টকাৰ পৰা ১০ হাজাৰ টকালৈকে দামী টিকট ক্ৰয় কৰাৰ পাছতো মেছিক এক মুহূৰ্তৰ বাবেও স্পষ্টকৈ দেখিবলৈ নাপালে। দৰ্শকৰ অভিযোগ অনুসৰি, সভাস্থলীত উপস্থিত থকা নেতা-মন্ত্ৰী আৰু ভিআইপি লোকসকলে মেছিক এনেদৰে ঘেৰি ধৰিছিল যে সাধাৰণ দৰ্শকৰ বাবে তেওঁক দেখা পোৱাটো সম্ভৱ নহ’ল। ইয়াৰ ফলত বিশৃংখল পৰিৱেশৰ সৃষ্টি হয় আৰু উপায়ন্তৰ হৈ মেছিয়ে খেলপথাৰ এৰি যাবলৈ বাধ্য হয়।
আৰক্ষীয়ে এই অপব্যৱস্থাপনাৰ বাবেই ক্ৰীড়া প্ৰমোটাৰ আৰু অনুষ্ঠান আয়োজক হিচাপে কাম কৰা দত্তক নিজৰ জিম্মাত লয়।
এই সমগ্ৰ ঘটনাৰ পিছতে ৰাজ্যপাল চি ভি আনন্দ বসুৱে ৰাজ্য চৰকাৰক অনুষ্ঠানৰ আয়োজকক গ্ৰেপ্তাৰ কৰিবলৈ নিৰ্দেশ দিয়ে। তেওঁ এই দিনটোক কলকাতাৰ ক্ৰীড়াপ্ৰেমী লোকৰ বাবে “ক’লা দিন” বুলি আখ্যা দিয়ে।
ইফালে পশ্চিমবংগৰ মুখ্যমন্ত্ৰী মমতা বেনাৰ্জীয়ে এই ঘটনাৰ তদন্তৰ বাবে এখন উচ্চ পৰ্যায়ৰ সমিতি গঠন কৰাৰ কথা ঘোষণা কৰে। লগতে তেওঁ দৰ্শকক টিকটৰ ধন ঘূৰাই দিব লাগে বুলিও মন্তব্য কৰে।
ৰাজ্যিক আৰক্ষীৰ ডি জি ৰাজীৱ কুমাৰে এখন সংবাদমেলত কয়, “যুৱ ভাৰতী ষ্টেডিয়ামত দৰ্শকে মেছিক দেখা নোপোৱাৰ পিছতে এক অবৰ্ণনীয় পৰিৱেশৰ সৃষ্টি হ’ল। ইতিমধ্যে মূল আয়োজকক গ্ৰেপ্তাৰ কৰা হৈছে। দৰ্শকৰ ধন ঘূৰাই নিদিলে আইনী ব্যৱস্থা গ্ৰহণ কৰা হ’ব। আয়োজকসকলৰ গাফিলতিৰ তদন্ত কৰা হ’ব। এনে অপব্যৱস্থাপনা সহ্য কৰিব নোৱাৰি।”
অতিৰিক্ত আৰক্ষী সঞ্চালক প্ৰধান জাভেদ ছামিমে নিশ্চিত কৰি কয় যে নিৰ্দিষ্ট ধাৰাত গোচৰ ৰুজু কৰা হৈছে আৰু সমগ্ৰ ঘটনাৰ তদন্ত আৰম্ভ কৰা হৈছে। তেওঁ লগতে জনায় যে চৰকাৰে গঠন কৰা তদন্ত সমিতিয়ে উদ্যোক্তাসকলক লিখিতভাৱে উত্তৰ দিবলৈ নিৰ্দেশ দিছে।
এই প্ৰসংগত আয়োজক শতদ্ৰু দত্তই প্ৰথমতে ফেচবুকত এটা পোষ্ট কৰিছিল যে সকলো দৰ্শককে টিকটৰ মূল্য ঘূৰাই দিয়া হ’ব। কিন্তু আচৰিতভাৱে, কিছু সময়ৰ পাছতে তেওঁ সেই পোষ্টটো ডিলিট কৰি দিয়ে, যাৰ ফলত অনুৰাগীসকলৰ মাজত ধন ঘূৰাই পোৱাৰ সন্দৰ্ভত অধিক সন্দেহৰ সৃষ্টি হৈছে।
