ফিফা বিশ্বকাপ ২০২৬ত আলজেৰিয়াৰ বিৰুদ্ধে লিঅ‘নেল মেছিয়ে অৰ্জন কৰা আকৰ্ষণীয় হেট্ৰিকৰ পাছতেই সমগ্ৰ ফুটবল বিশ্বত তেওঁৰ বন্দনা আৰম্ভ হৈছে। আৰ্জেণ্টিনাৰ অধিনায়কগৰাকীৰ এই চমকপ্ৰদ প্ৰদৰ্শনৰ পাছত ব্ৰাজিলৰ কিংবদন্তি ফুটবল খেলুৱৈ তথা ২০০২ চনৰ বিশ্বকাপ বিজয়ী ৰোনাল্ডোৱে মেছিক সৰ্বকালৰ শ্ৰেষ্ঠ খেলুৱৈ হিচাপে মানি ল‘বলৈ বিশ্ববাসীৰ প্ৰতি আহ্বান জনাইছে। মঙলবাৰে অনুষ্ঠিত মেচখনত আৰ্জেণ্টিনাই আলজেৰিয়াক ৩-০ গ‘লত পৰাস্ত কৰাৰ সমান্তৰালকৈ মেছিয়ে বিশ্বকাপৰ ইতিহাসত সৰ্বাধিক গ‘লৰ অভিলেখ স্পৰ্শ কৰি এক নতুন ইতিহাস ৰচনা কৰে।
মেছিৰ প্ৰদৰ্শনত মুগ্ধ হৈ ৰোনাল্ডোৱে কয় যে বিশ্ববাসীয়ে এতিয়া আৰু লুকুৱাই নাথাকি মেছি যে সৰ্বকালৰ শ্ৰেষ্ঠ খেলুৱৈ, সেই সত্য মানি লোৱাৰ সময় আহি পৰিছে। প্ৰতিটো ছিজনৰ লগতে বিশ্বকাপতো ধাৰাবাহিকভাৱে উন্নত প্ৰদৰ্শন কৰাৰ পাছতো মেছিক লৈ সন্দেহ থকা কথাত আশ্চৰ্য প্ৰকাশ কৰি ৰোনাল্ডোৱে আলজেৰিয়াৰ বিৰুদ্ধে মেচখনক ইতিহাসৰ পাতত চিৰদিনৰ বাবে লিপিবদ্ধ হৈ ৰোৱা এক পাহৰিব নোৱাৰা ঐতিহাসিক নিশা বুলি অভিহিত কৰে। এই মেচখনত মেছিয়ে ১৭ মিনিটত ৰড্ৰিগো ডি পলৰ ফ্ৰী-কিকৰ পৰা অহা বলত এক শক্তিশালী দূৰৈৰ শ্বটেৰে প্ৰথমটো গ‘ল, পাছত মেক এলিষ্টাৰৰ প্ৰয়াসৰ পৰা উভতি অহা বলত ওচৰৰ পৰা দ্বিতীয়টো গ‘ল আৰু ৭৬ মিনিটত এক সুন্দৰ কাৰ্লিং ফিনিশ্বেৰে নিজৰ বিশ্বকাপ কেৰিয়াৰৰ প্ৰথমটো হেট্ৰিক সম্পূৰ্ণ কৰে।
এই হেট্ৰিকৰ লগে লগে মেছিয়ে বিশ্বকাপত সৰ্বাধিক গ‘ল দিয়া জাৰ্মানীৰ মিৰ‘শ্লাভ ক্ল‘জৰ অভিলেখ স্পৰ্শ কৰাৰ লগতে ব্ৰাজিলৰ ৰোনাল্ডো (১৫ টা গ‘ল), জাৰ্মানীৰ গাৰ্ড মুলাৰ আৰু ফ্ৰান্সৰ কিলিয়ান এমবাপ্পেক অতিক্ৰম কৰে। উল্লেখযোগ্য যে সেইদিনাই ফ্ৰান্সে চেনেগালক ৩-১ গ‘লত পৰাস্ত কৰা মেচখনত এমবাপ্পেই দুটা গ‘ল দি ১৪ টা গ‘লেৰে মুলাৰৰ অভিলেখ স্পৰ্শ কৰিছিল। অৱশ্যে প্লেয়াৰ অৱ দ্য মেচৰ সন্মান লাভ কৰা মেছিয়ে এই অভিলেখ সন্দৰ্ভত এক বিনম্ৰ প্ৰতিক্ৰিয়া প্ৰকাশ কৰি কয় যে সংখ্যাৰ কোনো বিশেষ অৰ্থ নাই, এয়া কেৱল এক পৰিসংখ্যামাত্ৰ। আৰ্জেণ্টিনাৰ সংবাদ মাধ্যম ‘লা নেচিয়ন‘ৰ আগত তেওঁ কয় যে এমবাপ্পে আৰু ৰোনাল্ডোৰ দৰে খেলুৱৈৰ সৈতে এই তালিকাত থকাটো সন্মানৰ কথা, কিন্তু ৰোনাল্ডোৰ দৰে শ্ৰেষ্ঠ খেলুৱৈ এজনো প্ৰথম স্থানত নাই, সেয়েহে এই পৰিসংখ্যাক তেওঁ অধিক গুৰুত্ব নিদিয়ে।
মেচখনত প্ৰথমটো গ‘ল দিয়াৰ পাছতে মেছিক আৱেগিক হৈ চকুলো টোকা দেখা গৈছিল। এই আৱেগৰ কাৰণ ব্যাখ্যা কৰি তাৰকাগৰাকীয়ে জনায় যে শেহতীয়াকৈ তেওঁ খেলপথাৰৰ বাহিৰৰ কিছু কঠিন আৰু জটিল সময়ৰ মাজেৰে পাৰ হ‘বলগীয়া হৈছিল। এনে পৰিস্থিতিত তেওঁক নিৰন্তৰ শক্তি আৰু সাহস প্ৰদান কৰাৰ বাবে তেওঁ দলটোৰ লগতে সতীৰ্থসকলৰ প্ৰতি গভীৰ কৃতজ্ঞতা জ্ঞাপন কৰে।
বিশ্বকাপৰ আৰম্ভণিতেই মেছিৰ এনে দুৰ্দান্ত ফৰ্মে আৰ্জেণ্টিনাৰ সমৰ্থকসকলৰ মাজত খিতাপ ৰক্ষাৰ আশাক অধিক দৃঢ় কৰি তুলিছে। ব্যক্তিগত অভিলেখতকৈ দলীয় সফলতাক অগ্ৰাধিকাৰ দিয়া মেছিয়ে পৰৱৰ্তী মেচসমূহত কেনে প্ৰদৰ্শন আগবঢ়ায় আৰু বিশ্ববাসীয়ে ৰোনাল্ডোৰ মন্তব্যক কিদৰে গ্ৰহণ কৰে, সেয়া বৰ্তমান ক্ৰীড়ামহলৰ বাবে আটাইতকৈ চৰ্চিত বিষয় হৈ পৰিছে।
