প্ৰাশ্চাত্য খাদ্যৰ বিলাসী আৰু ব্যয়বহুল বিপনণ কোম্পানী মেকড’নাল্ডছে সম্প্ৰতি ভাৰতত এক বৃহৎ বজাৰ গঢ়ি তুলিছে। মেকড’নাল্ডছৰ এই বিলাসী খাদ্যৰ জুতি ল’বলৈ ইয়াৰ বিপনী সমূহত গ্ৰাহকে যথেষ্ট ভিৰ কৰে।
পিছে এই প্ৰাশ্চাত্য খাদ্যৰ সোৱাদ ল’বলৈ গৈ নিৰাশ হ’বলগীয়া হৈছে এজন গ্ৰাহক। এই গ্ৰাহকজনৰ নিৰাশাৰ পাছতেই ছীল কৰা হৈছে মেকড’নাল্ডছৰ এখন বিপনী।
প্ৰকাশিত খবৰ অনুসৰি ভাৰ্গৱ যোশী নামৰ এজন গ্ৰাহকে মেকড’নাল্ডছৰ এই বিপনীখনত খাদ্য গ্ৰহণ কৰাৰ সময়তে তেওঁৰ শীতল পানীয়ৰ গিলাচত এটা জেঠী উদ্ধাৰ কৰে।
লগে লগে তেওঁ এই কথাত আপত্তি কৰি বিপনীখনত অভিযোগ কৰাৰ লগতে জেঠীসহ শীতল পানীয়ৰ গিলাচটোৰ এখন ফটো সামাজিক মাধ্যমত শ্বেয়াৰ কৰে।
ভাৰ্গৱ যোশীয়ে শ্বেয়াৰ কৰা এই ফটোখন লগে লগে সামাজিক মাধ্যমত ভাইৰেল হৈ পৰে। গ্ৰাহকজনে লগতে বিপনীখনৰ এই অস্বাস্থ্যকৰ আৰু আপত্তিজনক খাদ্যৰ বিৰুদ্ধে আহমেদাবাদ পৌৰ নিগমৰ ওচৰত অভিযোগ কৰে।
যুৱকজনৰ এই অভিযোগৰ পিছতে কৰ্তৃপক্ষই এই বিষয়ে বিবেচনা কৰে আৰু খাদ্য সুৰক্ষা বিভাগে পৰীক্ষাৰ বাবে ৰেষ্টুৰেণ্টখনৰ পৰা খাদ্যৰ নমুনা সংগ্ৰহ কৰে।
লগতে খাদ্য সুৰক্ষা বিভাগে পৰৱৰ্তী পদক্ষেপ গ্ৰহণ নকৰা পৰ্যন্ত তৎক্ষণাৎ কাৰ্যকৰী হোৱাকৈ ৰেষ্টুৰেণ্টখন বন্ধ কৰিবলৈ নিৰ্দেশ দিয়ে। আহমেদাবাদ পৌৰ নিগমৰ এগৰাকী বিষয়াই জানিবলৈ দিয়া মতে বৃহত্তৰ ৰাজহুৱা স্বাস্থ্য সুৰক্ষাৰ স্বাৰ্থত ৰেষ্টুৰেণ্টখন বন্ধ কৰি দিয়া হৈছে।
আনহাতে এই বিতৰ্কৰ পাছতে মেকডনাল্ডছে এক বিবৃতিত কয় যে আহমেদাবাদৰ বিপনীখনত সংঘটিত হোৱা এই ঘটনা সন্দৰ্ভত তেওঁলোকে প্ৰয়োজনীয় পদক্ষেপ গ্ৰহণ কৰিছে।
তেওঁলোকে স্বতন্ত্ৰভাৱে পৰীক্ষা কৰি বিপনীখনৰ একো ভুল দেখা পোৱা নাই যদিও দায়িত্বশীল কৰ্প’ৰেট নাগৰিক বা গোষ্ঠী হিচাপে কৰ্তৃপক্ষক সহযোগিতা আগবঢ়াইছে বুলি মেকড’নাল্ডছে বিবৃতিটোত উল্লেখ কৰে।