সততে উন্নয়নৰ ঢাক ঢোল বজাই থকা চৰকাৰে আচলতে গাওঁ অঞ্চলত কিমান উন্নয়ন কৰিবলৈ সক্ষম হৈছে তাৰ বাস্তৱ প্ৰতিচ্ছবি উদঙাই দিছে বঙাইগাঁও জিলাৰ নাম্বাৰপাৰাত।
বঙাইগাঁও জিলাৰ ৩৪ নং অভয়াপুৰী উত্তৰ বিধানসভা সমষ্টিৰ অন্তৰ্গত নাম্বাৰপাৰা-অ’দলাগুৰী সংযোগী গড়কাপ্তানি পথটো দীৰ্ঘদিন ধৰি জৰাজীৰ্ণ হৈ থকাৰ ফলত বৃহত্তৰ অঞ্চলৰ ৰাইজে দুৰ্ভোগ ভুগিবলগীয়া হৈছে।
এজাক বৰষুণতে পুখুৰী সদৃশ গাতৰ সৃষ্টি হয় পথটোত। অতি ব্যস্ততাপূৰ্ণ পথটো জৰাজীৰ্ণ হৈ থকাৰ ফলত জৰুৰীকালিন সেৱাৰ পৰা বঞ্চিত হৈছে বৃহত্তৰ অঞ্চলৰ ৰাইজে।
পথটো মেৰামতি বা পকীকৰণৰ বাবে চৰকাৰ বা জিলা প্ৰশাসনে কোনো গুৰুত্ব নিদিয়াত পথটোৰ ওপৰত স্থানীয় ৰাইজে ভূঁই ৰুই প্ৰতিবাদ সাব্যস্ত কৰে।
পথটো মেৰামতি বা পকীকৰণৰ বাবে লোক নিৰ্মাণ বিভাগৰ মন্ত্ৰী পীযুষ হাজৰিকা তথা নৱ নিৰ্বাচিত স্থানীয় বিধায়ক আব্দুল বাতিন খন্দকাৰক দাবী জনাইছে স্থানীয় ৰাইজে।