তিৱা স্বায়ত্ত পৰিষদৰ আগন্তুক নিৰ্বাচনৰ প্ৰচাৰ শাসক-বিৰোধী দলসমূহৰ মাজত সমষ্টিয়ে সমষ্টিয়ে তুংগত উঠাৰ সময়তে শুকুৰবাৰে কোঁৱৰগাঁও সমষ্টিত ভোটাৰ ৰাইজক বিতৰণ কৰিব লৈ যোৱা তাঁতশাল, যঁতৰ আদি সামগ্ৰীসহ এখন গাড়ী স্থানীয় লোকে আটক কৰি আৰক্ষীক চমজাই দিয়ে।
জানিব পৰা মতে, দুপৰীয়া ১ মান বজাত এ এছ ০১ এল চি -৬২৫৪ নম্বৰৰ এখন ট্ৰাকত তাঁতশাল কঢ়িয়াই লৈ যোৱা প্ৰত্যক্ষ কৰে কোঁৱৰগাঁও সমষ্টিৰ কোঁৱৰগাঁও আলিচিঙাৰ একাংশ লোকে।
তাৰপাছতেই ইয়াৰ ৰাস মন্দিৰৰ সমীপত তেওঁলোকে উক্ত গাড়ীখন ৰখাই তাঁতশাল সমূহৰ সন্দৰ্ভত জানিব বিচাৰে।
গাড়ীখনৰ চালক আৰু লগত অহা ব্যক্তি কেইগৰাকীয়ে তেওঁলোকক উক্ত তাঁতশাল সমূহ হস্ততাঁত বিভাগৰ বুলি কয় আৰু সেইবোৰ গছৰগুৰি, আলিচিঙা আদি গাঁৱত বিতৰণৰ বাবে লৈ যোৱা বুলি জানিব দিয়ে।
নিৰ্বাচনৰ প্ৰাকমুহূৰ্তত পৰিষদীয় সমষ্টিটোত এনে চৰকাৰী-বেচৰকাৰী কোনো সামগ্ৰী বিতৰণ কৰিব নোৱাৰিব বুলি কৈ স্থানীয় একাংশ লোকে গাড়ীসহ তাঁতশাল সমূহ আটক কৰি মৰিগাঁও সদৰ আৰক্ষীক খবৰ দিয়ে।
পাছত ঘটনাস্থলীত আৰক্ষী উপস্থিত হৈ গাড়ীসহ বিভাগটোৰ তাঁতশালসমূহ থানালৈ লৈ যায় বুলি জানিব পৰা গৈছে।
ইপিনে, বিজেপি নেতা সকলে ভোট সংগ্ৰহৰ বাবে পৰিষদীয় সমষ্টিটোত সম্প্ৰতি শিপিনী সকলৰ মাজত বিভাগটোৰ জৰিয়তে তাঁতশাল বিতৰণ কৰিব অহা বুলি একাংশ কংগ্ৰেছ কৰ্মীয়ে অভিযোগ তুলিছে।
