কাজিৰঙা ৰাষ্ট্ৰীয় উদ্যানৰ পৰা অতি সংগোপনে ১১ টা অতি বিৰল প্ৰজাতিৰ ফুটুকী চেং বা চানা বাৰ্কা মাছ লৈ যোৱাৰ সময়তে জখলাবন্ধাত এজন লোকক আটক কৰে স্থানীয় লোকে ৷ সন্দেহবশত এক স্থানীয়লোকে কৰায়ত্ত কৰা লোকজন দৰং জিলাৰ দলগাওঁ থানা এলেকাৰ শিয়ালমাৰী গাওঁৰ মহম্মদ মাৰুপ বুলি জানিব পৰা গৈছে ৷
বোকাখাতৰ পৰা বিৰল প্ৰজাতিৰ এই ১১ টা মাছ লৈ যোৱা লোকজনে জখলাবন্ধাত সন্দেহজনকভাৱে ঘুৰি ফুৰা প্ৰত্যক্ষ কৰি স্থানীয় লোকে কৰায়ত্ত কৰি বন বিভাগক অৰ্পণ কৰে ৷ বন বিভাগৰ লোকে ব্যক্তিজনৰ পৰা ১১ টা ফুটুকী চেং বা চানা বাৰ্কা মাছ উদ্ধাৰ কৰে ৷
ঘটনা সন্দৰ্ভত বন্যপ্ৰাণী প্ৰতিৰক্ষা আইনৰ অধীনত এটা গোচৰ ৰজু কৰি অধিক তথ্যৰ বাবে ধৃত লোকজনক জেৰা চলাই আছে বন বিভাগে ৷
সাপৰ মূৰৰ আকৃতিৰ আৰু দেখাত চেঙেলী মাছৰ দৰে এই চানা বাৰ্কা মাছ ব্ৰহ্মপুত্ৰ উপত্যকা, নেপাল আৰু বাংলাদেশৰ ঠাই বিশেষে পোৱা এবিধ বিৰল প্ৰজাতিৰ মাছ৷ বিৰল প্ৰজাতি এই চানা বাৰ্কা মাছৰ আন্ত:ৰাষ্ট্ৰীয় বজাৰত চাহিদা থকাৰ বাবেই ইয়াৰ এখন চোৰাং বজাৰ গঢ়ি উঠিছে ৷
কাজিৰঙাৰ জলাশয়ত চানা বাৰ্কা মাছ পোৱা যায় ৷ শেষতীয়াকৈ কাজিৰঙাৰ পৰা অতি সংগোপনে দীৰ্ঘ দিনৰ পৰা এই মাছৰ গোপন ব্যৱসায় চলি আছে ৷ ধৃত মহম্মদ মাৰুপৰ স্বীকাৰেক্তি মতে এই ব্যৱসায়ত বোকাখাতৰ কাষৰীয় অঞ্চলৰ লোকো জড়িত আছে ৷
