পৰিবৰ্তনৰ শ্ল’গানেৰে ৰাজ্যত শাসনৰ গাদীলৈ অহা বিজিপি চৰকাৰে দুবছৰৰ কাৰ্যকাল অতিক্ৰম কৰাৰ পিছতো পৰিৱৰ্তন নহ’ল পথৰ দুৰৱস্থা। খোদ মুখ্য মন্ত্ৰী সৰ্বানন্দ সোণোৱালৰ সমষ্টি মাজুলীতে পথৰ বিধস্ত অৱস্থাই অঞ্চলবাসীক জীয়াতু ভোগাইছে। তাতকৈ পৰিতাপৰ কথা হ’ল মুখ্য মন্ত্ৰী গৰাকীয়ে নিজেই পথ নিৰ্মাণৰ প্ৰতিশ্ৰুতি দিয়াৰ পিছতো আজি পৰ্যন্ত কোনোধৰণৰ পদক্ষেপ গ্ৰহণ কৰা পৰিলক্ষিত নহ’ল।
ইয়াৰ প্ৰতিবাদত অঞ্চলটোৰ শ শ পুৰুষ-মহিলাই আজি এক অভিনৱ প্ৰতিবাদী কাৰ্যসূচী গ্ৰহণ কৰে। অতিষ্ঠ হৈ পৰা ৰাইজে পথৰ ওপৰৰ খালত চালনী বাই বিচাৰিলে মুখ্য মন্ত্ৰীয়ে দিয়া প্ৰতিশ্ৰুতি! পিছে চালনিত প্ৰতিশ্ৰুতি ঠাইত উঠিল কেৱল বোকা আৰু পলস!
উল্লেখযোগ্য যে উজনি মাজুলীৰ অতি ব্যস্ত টেঙাপনীয়াৰ পৰা মোৱামাৰি হৈ নতুন বজাৰ সংযোগী পথটো বিধস্ত হৈ ইয়াৰ ওপৰত প্ৰকাণ্ড প্ৰকাণ্ড খাল সৃষ্টি হৈছে। প্ৰখৰ ৰ’দ দি থকাৰ পিছতো পথটোৰ বিভিন্ন অংশত বৰ্তমানো একাঁঠু পৰ্যন্ত পানী বোকাই ৰাইজক জ্বলা কলা খোৱাইছে।
এজাক বৰষুণ দিলেই চাইকেল, মটৰচাইকেল টো বাদেই খোজ কাঢ়িও পথটোৰে যাব নোৱাৰা অৱস্থা হয়। আনহাতে নিৰ্বাচনী প্ৰচাৰৰ সময়ত পথটোৰ কথা ৰাইজে অৱগত কৰোৱাত নিৰ্বাচনত জয়ী হ’লে পথটো পকী কৰি দিয়া হ’ব বুলি কথা দিয়া মুখ্য মন্ত্ৰীজনে এতিয়া নিজৰেই প্ৰতিশ্ৰুতি পাহৰিলে বুলি ৰাইজে ক্ষোভ প্ৰকাশ কৰে।
যাৰ ফলত অহা ১০ দিনৰ ভিতৰত এই পথটো মেৰামতি কৰিবলৈ দাবী জনাইছে উজনি মাজুলীবাসীয়ে। অন্যথা গড়কাপ্তানি বিভাগৰ বিৰুদ্ধে গাঁওবাসীয়ে জংগী আন্দোলন গঢ়ি তুলিব বুলি হুংকাৰ কাৰ দিয়ে।
