দেশত কৰ’না ভাইৰাছ সংক্ৰমণৰ বিষয়টোক লৈ অহা সোমবাৰে ৰাজ্যসমূহৰ মুখ্য মন্ত্ৰীসকলৰ সৈতে ভিডিঅ’ কনফাৰেন্সিঙৰ জৰিয়তে এখন বৈঠকত মিলিত হ’ব প্ৰধান মন্ত্ৰী নৰেন্দ্ৰ মোদী।
ইয়াৰ পূৰ্বে লকডাউন বৃদ্ধিৰ বিষয়টোক লৈ চলিছে ব্যাপক চৰ্চা।
জানিব পৰা মতে অহা ১৬ মে’লৈকে কেন্দ্ৰীয় চৰকাৰে লকডাউন বৃদ্ধি কৰিব পাৰে। চৰকাৰীভাৱে এনে কোনো মন্তব্য অহা নাই যদিও এই প্ৰক্ৰিয়াৰ সৈতে জড়িতসকলৰ উদ্ধৃতিৰে শুকুৰবাৰে নিশা একাংশ ৰাষ্ট্ৰীয় সংবাদ মাধ্যমত বাতৰি প্ৰকাশ পাইছে।
যদিও ভাৰতত বৰ্তমান পৰিস্থিতি নিয়ন্ত্ৰণাধীন বুলি কোৱা হৈছে, তথাপি কৰ’না আক্ৰান্তৰ সংখ্যা বৃদ্ধি পাই আছে।
শেহতীয়া তথ্য অনুসৰি যোৱা ২৪ ঘন্টাত দেশত ১,৭৫২জন নতুনকৈ এই কৰ’না ভাইৰাছত আক্ৰান্ত হৈছে।
এতিয়ালৈকে দেশত মুঠ আক্ৰান্তৰ সংখ্যা ২৩,৪৫২জনলৈ বৃদ্ধি পাইছে। সেইদৰে মৃত্যু হৈছে ৭২৩জন লোকৰ।
কৰ’না সংক্ৰমণৰ চেইন ভাঙিবলৈ লকডাউন যে অপৰিহাৰ্য সেয়া বিশেষজ্ঞসকলে প্ৰায়ে দোহাৰি আহিছে।
স্বাভাৱিকতে লকডাউনৰ ফলত অৰ্থনীতি ব্যাপকভাৱে ক্ষতিগ্ৰস্ত হৈছে। এনে সময়ত কৰ’নাৰ সংক্ৰমণ ৰোধ কৰাৰ সমান্তৰালভাৱে অৰ্থনীতি ধৰি ৰখাৰ বাবে কেন্দ্ৰীয় চৰকাৰৰ সন্মুখত এক ডাঙৰ প্ৰত্যাহ্বান আহি পৰিছে।
অহা ৩ মে’লৈকে বৃদ্ধি কৰা লকডাউনৰ ম্যাদ প্ৰায় শেষ হোৱাৰ পথত। সেয়েহে প্ৰধান মন্ত্ৰী মোদীয়ে অহা সোমবাৰে কৰ’না পৰিস্থিতিক লৈ পুনৰ মুখ্য মন্ত্ৰীসকলৰ সৈতে আলোচনা কৰিব।
উক্ত বৈঠকৰ পাছতে প্ৰধান মন্ত্ৰীয়ে কোনো ডাঙৰ ঘোষণা কৰাৰ সম্ভাৱনা আছে।ইয়াৰ ভিতৰত লকডাউন বৃদ্ধিৰ বিষয়টো অন্যতম।
গোটেই প্ৰক্ৰিয়াটোৰ সৈতে জড়িত বিষয়াসকলৰ মতে সংক্ৰমণ বৃদ্ধি পাই অহালৈ চাই দেশত লকডাউন প্ৰত্যাহাৰ কৰাৰ দৰে ৰিস্ক কেন্দ্ৰই নোলোৱাৰ সম্ভাৱনাই বেছি। সেয়ে হ’লে অহা ১৬ মে’লৈকে বৃদ্ধি পাব পাৰে লকডাউনৰ ম্যাদ।
অৱশ্যে মুখ্য মন্ত্ৰীসকলৰ সৈতে বৈঠকৰ পাছতে এই বিষয়টো বহুখিনি স্পষ্ট হৈ পৰিব বুলি কওৱা হৈছে।
