প্ৰথমে গ্ৰীণফিল্ড এয়াৰপ’ৰ্টৰ নামত বাগিচাত উচ্ছেদ আৰু এইবাৰ লক আউট। এনেদৰেই ডলু বাগিচাৰ সৈতে জড়িত সহস্ৰাধিক চাহ শ্ৰমিকৰ জীৱিকাৰ পথ বন্ধ কৰি ঠেলি দিয়া হৈছে অন্ধকাৰলৈ। চাহ শ্ৰমিকক এইদৰে অৰ্থনৈতিক নিৰাপত্তাহীনতালৈ ঠেলি আজি কাছাৰস্থিত ডলু চাহ বাগিচাৰ পৰিচালনা কৰ্তৃপক্ষই বাগিচাখনত লকআউট ঘোষণা কৰিছে।
বাগিচা কৰ্তৃপক্ষৰ এই সিদ্ধান্তৰ ফলত প্ৰায় ১৫০ স্থায়ী শ্ৰমিক আৰু ১০০০ অস্থায়ী শ্ৰমিকক নিবনুৱা কৰি তুলিছে। চাহ বাগিচাখনৰ উপ-প্ৰৱন্ধক সুপ্ৰিয়া সিকদাৰে আজি এই জাননী জাৰি কৰি চাহ বাগিচাৰ বৃহৎ সংখ্যক শ্ৰমিকে বাগিচা পৰিচালনাৰ দৈনিক নিযুক্তিৰ আদেশ অমান্য কৰিছে বুলি অভিযোগ তুলিছে।
“সম্পূৰ্ণ অনিয়ম আৰু কৰ্মক্ষেত্ৰত শ্ৰমিকসকলৰ দ্বাৰা ৰাউণ্ড প্লাকিং কৰাত পলম হোৱাৰ বাবে ৰাউণ্ড প্লাকিং অব্যাহত ৰাখিব পৰা নহ’ব আৰু উৎপাদিত চাহৰ পৰিমাণ তথা মানদণ্ডৰ ক্ষেত্ৰত ডালু চাহ ইষ্টেটৰ পৰিচালনাৰ এক অপূৰণীয় ক্ষতি হৈছে।”— জাননীখনত এইদৰে উল্লেখ কৰা হৈছে।
কৰ্তৃপক্ষই লগতে কয় যে চিকিৎসালয়, ৱাৰ্ড আৰু নিৰাপত্তা, পানী যোগান আৰু বিদ্যুতকে ধৰি জৰুৰীকালীন সেৱাৰ বাহিৰে চাহ বাগিচাখনৰ সকলো কাৰ্যকলাপ তাৎক্ষণিকভাৱে বন্ধ কৰি দিয়া হৈছে।
লক-আউটৰ সময়ছোৱাত কৰ্মচাৰীসকল কোনো মজুৰি, ৰেচন আৰু অন্যান্য সম্পৰ্কিত সুবিধাৰ অধিকাৰী নহ’ব বুলিও জাননীখনত উল্লেখ কৰা হৈছে।
উল্লেখ্য যে ইয়াৰ পূৰ্বে কাছাৰ জিলা প্ৰশাসনে গ্ৰীণফিল্ড বিমানবন্দৰৰ বাবে বাগিচাখনৰ প্ৰায় ৩০ লাখ চাহ গছ উচ্ছেদ কৰিছিল। অসম চৰকাৰেও বিমানবন্দৰ নিৰ্মাণৰ নামত ডলু বাগিচাৰ মাটি মুকলি কৰিবলৈ নিৰ্দেশ প্ৰদান কৰিছিল। কিন্তু কিছুদিন পূৰ্বে এক আৰ টি আইৰ উত্তৰত অসামৰিক বিমান পৰিবহন মন্ত্ৰালয়ে শিলচৰ বিমানবন্দৰৰ বাবে কোনো প্ৰস্তাৱ লাভ কৰা নাই বুলি স্পষ্ট কৰি দিছিল।
মন্ত্ৰালয়ৰ এই উত্তৰৰ পিছতে গ্ৰীণ ফিল্ড এয়াৰপ’ৰ্ট নিৰ্মাণৰ নামত ডলু চাহ বাগিছাত চলোৱা উচ্ছেদ অসম চৰকাৰৰ এক উদ্দেশ্যপ্ৰণোদিত পৰিকল্পনা আছিল বুলি প্ৰমাণিত হৈ পৰিছিল।
উল্লেখ্য যে গ্ৰীণ ফিল্ড এয়াৰপ’ৰ্ট নিৰ্মাণৰ পৰিকল্পনাৰ অজুহাত দেখুৱাই অসম চৰকাৰে ডলু চাহ বাগিছাৰ এক বৃহৎ অংশ উচ্ছেদ কৰিছিল। চৰকাৰৰ এই স্বৈৰাচ্ছাৰী সিদ্ধান্তৰ বিৰুদ্ধে ৰাজ্যজুৰি সৃষ্টি হৈছিল তীব্ৰ প্ৰতিক্ৰিয়াৰ।
উচ্ছেদৰ বিৰোধিতাৰে ডলু চাহ বাগিছাৰ লগতে সমগ্ৰ ৰাজ্যতে চাহ কৰ্মচাৰীসকলে প্ৰতিবাদ সাব্যস্ত কৰিছিল। কিন্তু এনে প্ৰতিবাদৰ পিছতো গা লৰা নাছিল অসম চৰকাৰৰ।
কিন্তু এয়াৰপ’ৰ্ট অৰ্থৰিটি অৱ ইণ্ডিয়াই প্ৰকাশ কৰা ৰিপ’ৰ্টে ডলু চাহ বাগিছাত কোনো এয়াৰপ’ৰ্ট নিৰ্মাণ নহয় বুলি নিশ্চিত কৰিছিল। কিন্তু এয়াৰপ’ৰ্ট নিৰ্মাণৰ কোনো পৰিকল্পনা নথকাৰ পাছতো অসম চৰকাৰে মিথ্যাচাৰিতাৰ আশ্ৰয় লৈ এইদৰে ভুৱা প্ৰচাৰ কিয় চলাইছিল সেই লৈ সন্দেহৰ সৃষ্টি হৈছিল।
কোনো বৃহৎ পুঁজিপতিৰ স্বাৰ্থত অসম চৰকাৰে বাগিছাৰ মাটি মুকলি কৰাৰ ষড়যন্ত্ৰত লিপ্ত হৈছে বুলি অভিযোগ উত্থাপিত হৈছিল। কিন্তু এয়াৰপ’ৰ্ট অথৰিটিৰ ৰিপ’ৰ্টৰ পাছতো অসম চৰকাৰে এই বিষয়ত কোনো স্পষ্টীকৰণ প্ৰকাশ নকৰি বিষয়টো সম্পূৰ্ণৰূপে গাপ দিছিল।
এতিয়া চাহ বাগিচাখনত হঠাতে লক আউটৰ ঘোষণাও চৰকাৰৰ এই পৰিকল্পনাৰে অংশ বুলি চৰ্চিতহৈছে। ইতিমধ্যে লক আউটৰ ঘোষণাই বাগিচাখনৰ শ্ৰমিক সকলৰ মাজত ক্ষোভৰ উদগীৰণ ঘটাইছে।
