ধুবুৰীৰ সাংসদ বদৰুদ্দিন আজমলক “ব্যৰ্থ” বুলি অভিহিত কৰি আসন্ন লোকসভা নিৰ্বাচনত তেওঁৰ নিশ্চিত পৰাজয় দাবী কৰিছে অগপৰ প্ৰাৰ্থী জাবেদ ইছলামে।
“মাত্ৰ ভোটৰ সময়ত সমষ্টিত ভোট খুজিবলৈ অহা আজমলক ৰাইজে বিগত কাৰ্য্যকালত এদিনো নেদেখিলে৷ আজমলক ইয়াৰ প্ৰত্যুত্তৰ এইবাৰ ধুবুৰীৰ ভোটাৰ ৰাইজে নিশ্চয় দিব। ধুবুৰীত কংগ্ৰেছ, এ আই ইউ ডি এফক এইবেলি ৰাইজে প্ৰত্যাখ্যান কৰাটো একপ্ৰকাৰ নিশ্চিত,” কৃষ্ণাইৰ কাষৰীয়া ভেলাখামাৰ পূবালী সংঘত বুধবাৰে দুপৰীয়া এক নিৰ্বাচনী সভাত মন্তব্য ইছলামৰ।
আনহাতে কংগ্ৰেছক “দুৰ্নীতিৰ মাষ্টাৰ” বুলি সমালোচনা কৰিছে বিজেপি মিত্ৰজোঁট সমৰ্থিত প্ৰাৰ্থীগৰাকীয়ে।
“দুৰ্নীতি আৰু শোষণৰ ক্ষেত্ৰত কংগ্ৰেছ দল সদায় শীৰ্ষত। কংগ্ৰেছৰ বিগত প্ৰায় ষাঠি বছৰীয়া শাসনকালত অসমৰ একো উন্নয়ন হোৱা নাই,” মোদীৰ পাঁচ বছৰীয়া কাৰ্য্যকালত যথেষ্ট পৰিৱৰ্তন হোৱাৰ দাবী কৰি ইছলামৰ মন্তব্য৷
নিজৰ মা-দেউতাকক প্ৰকৃততে জনতাৰ সেৱক আৰু তেওঁলোকে কেতিয়াও দুৰ্নীতিক প্ৰশ্ৰয় দিয়া নাছিল বুলিও সভাত তেওঁ মন্তব্য কৰে৷
“ময়ো সেই আদৰ্শতে পৰিচালিত৷ সেয়ে নিৰ্দলীয়ভাৱে প্ৰতিদ্বন্দ্বিতা কৰিও আমি বিধায়ক নিৰ্বাচিত হৈছোঁ,” ইছলামে কয়৷
সভাখনত অগপ আৰু বিজেপি দলৰ গোৱালপাৰা জিলা সভাপতিদ্বয়, প্ৰাক্তন অগপ বিধায়ক জ্যোতিষ দাস, গৌৰাংগ প্ৰসাদ দাসকে ধৰি কেইবাজনো নেতা উপস্থিত আছিল।
লোকসভা নিৰ্বাচনৰ দ্বিতীয় পৰ্য্যায়ত অহা ২৩ এপ্ৰিলত ভোট গ্ৰহণ হ’ব লগা ধুবুৰী সমষ্টিত বৰ্তমানৰ সাংসদ তথা এ আই ইউ দি এফ মুৰব্বী বদৰুদ্দিন আজমল, কংগ্ৰেছৰ আবু তাহেৰ বেপাৰী আৰু অগপৰ ইছলামৰ মাজত ত্ৰিকোণীয়া প্ৰতিদ্বন্দ্বিতাৰ ধাৰণা কৰা হৈছে।
