জুবিন গাৰ্গৰ মৃত্যুত শোকবিহ্বল হৈ আছে সমগ্ৰ ৰাজ্য। এই দুখৰ মাজেৰে ৰাজ্যবাসীয়ে শাৰদীয় দুৰ্গাপূজা উদ্যাপন কৰিছে। পূজামণ্ডপসমূহত শিল্পীগৰাকীক শ্ৰদ্ধাঞ্জলি জনোৱাৰ বিশেষ ব্যৱস্থা কৰা পৰিলক্ষিত হৈছে। শেহতীয়া কৈ ডিব্ৰুগৰ খোঁৱাংত নিশা পূজামণ্ডপ দৰ্শন কৰি অসম জাতীয় পৰিষদৰ (এজেপি) সভাপতি লুৰীণজ্যোতি গগৈয়ে জুবিনৰ মৃত্যুৰ ন্যায় প্ৰদানৰ ক্ষেত্ৰত চৰকাৰৰ স্থিতিক তীব্ৰ সমালোচনা কৰিছে। তেওঁ মত পোষণ কৰিছে যে “অপৰাধীক ধৰি আনাৰ বিপৰীতে মুখ্যমন্ত্ৰীয়ে অনুনয়-বিনয় কৰিব লগা হৈছে। অপৰাধীক পূজাৰ নামত ছুটি দিয়া অসমৰ ইতিহাসত প্ৰথম দেখিছো। জুবিন গাৰ্গৰ বিষয়টোত চৰকাৰ ছিৰিয়াচ নহয়।”
লুৰীণজ্যোতি গগৈয়ে জুবিনৰ মৃত্যুৰ ন্যায়ৰ প্ৰসংগত অপৰাধীক ধৰি আনিব নোৱাৰা ৰাজ্য চৰকাৰৰ ভূমিকাক তীব্ৰভাৱে সমালোচনা কৰি কয় যে, “দিল্লীত অপৰাধীক দেখিও ধৰি আনিব নোৱাৰিলে। মুখ্যমন্ত্ৰীয়ে নিজে হত্যা হোৱা বুলি উল্লেখ কৰিছে, এই হত্যাৰ বিচাৰ অসমবাসীক লাগে।” জুবিন গাৰ্গৰ মৃত্যুক লৈ ৰাজনীতি কৰাৰ অভিযোগৰ প্ৰত্যুত্তৰত স্পষ্টভাবে উল্লেখ কৰে, “জুবিন গাৰ্গৰ মৃত্যুৰ ন্যায় বিচৰাতো যদি কোনোবাই ৰাজনীতি কৰা বুলি কয়, তেন্তে তেনে ৰাজনীতি আমি হাজাৰবাৰ কৰিম।”
উল্লেখ্য যে লুৰীণজ্যোতি গগৈয়ে জুবিনৰ মৃতদেহ অসমলৈ আনিবলৈ ছিংগাপুৰৰ প্ৰবাসী অসমীয়া ৰাইজৰ পৰা পইছা তুলি অনাৰ অভিযোগ উত্থাপন হোৱাৰ পিছত, লুৰীণক কেন্দ্ৰীয় মন্ত্ৰী পবিত্ৰ মাৰ্ঘেৰিতাই প্ৰত্যুত্তৰত জুবিনক লৈ ৰাজনীতি কৰা বুলি অভিযোগ কৰিছিল। ইয়াৰ প্ৰত্যুত্তৰত গগৈয়ে কয় যে , “জুবিনৰ মৃতদেহ বেলেগৰ পৰা পইচা তুলি অনা হ’ল বুলি চৰ্চা চলিছে, আপোনালোকে খবৰ ল’ব বুলিহে কৈছিলো। সেই কথাটোত ৰাজনীতি কৰাৰ প্ৰশ্নই আহিব নালাগে। মৃতদেহ অনা পইছা এতিয়াও দিয়া নাই, চৰকাৰে মুখ্য সচিবে দিয়া পত্ৰত সেই কথা উল্লেখ আছে। জুবিন গাৰ্গৰ বিষয়টোত চৰকাৰ ছিৰিয়াচ নহয়, সেই কথা প্ৰমাণ হৈছে।”
