ভাৰতীয় সেনাত বৰ্তমান অবৈতনিক লেফটেনেন্ট কৰ্ণেল হিচাপে সেৱা আগবঢ়োৱা মহেন্দ্ৰ সিং ধোনীয়ে আজি লাডাখত স্বাধীনতা দিৱস উদযাপন কৰে।
ভাৰতীয় ক্ৰিকেট দলৰ প্ৰাক্তন অধিনায়কগৰাকীয়ে বৰ্তমান অৰ্দ্ধ সামৰিক বাহিনীৰ ১০৬ টি এ বেটেলিয়নত সেৱা আগবঢ়াই আছে।
ধোনীয়ে আজি দেশৰ ৭৩ তম স্বাধীনতা দিৱস লাডাখত তাৰ স্থানীয় জনসাধাৰণৰ সৈতে উদযাপন কৰে।
নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে যোৱা ৫ আগষ্টত জম্মু আৰু কাশ্মীৰক বিশেষ মৰ্যাদা দিয়া ভাৰতীয় সংবিধানৰ ধাৰা ৩৭০ আৰু ৩৫এ প্ৰত্যাহাৰ কৰে।
কেন্দ্ৰীয় চৰকাৰে ৰাজ্যখনক দুখন কেন্দ্ৰীয় শাসিত অঞ্চল জম্মু আৰু কাশ্মীৰ আৰু লাডাখ হিচাপে বিভক্ত কৰে।
ধোনীয়ে বুধবাৰে লাডাখনত গৈ উপস্থিত হৈছিল।
লাডাখনত ধোনীক সেনা বিষয়াসকলে উষ্ম আদৰণি জনায় আৰু তেওঁৰ সৈতে মত বিনিময় কৰে।
বাতৰি অনুসৰি, ৩৮ বৰ্ষীয় প্ৰসিদ্ধ ক্ৰিকেটাৰ গৰাকীয়ে সেনাৰ হাস্পাতাল পৰিদৰ্শন কৰে আৰু ৰোগীসকলৰ সৈতে বাৰ্তালাপ কৰে।
সেনা বাহিনীৰ লোকসকলৰ সৈতে প্ৰাক্তন ক্ৰিকেটাৰ গৰাকীয়ে মত বিনিময় কৰা ফটো ছচিয়েল মিডিয়াতো প্ৰকাশ পাইছে।
ইয়াৰ পূৰ্বে ধোনীয়ে তেওঁৰ টেৰিটৰিয়েল আৰ্মি বেটেলিয়নৰ সদস্যসকলৰ সৈতে ভলীবল খেলি থকা তথা জোতা পলিচ কৰি থকা ফটো ভাইৰেল হৈছিল।
ভাৰতীয় ক্ৰিকেট দলৰ প্ৰসিদ্ধ উইকেটকীপাৰ-বেটছমেনগৰাকীয়ে ভাৰতীয় ক্ৰিকেট দলৰ পৰা দুমাহৰ বাবে বিৰতি লৈছে।
ধোনীৰ উক্ত সিদ্ধান্তৰ বাবে তেওঁক ৱেষ্টইণ্ডিজ ভ্ৰমণৰত ভাৰতীয় ক্ৰিকেট দলৰ সদস্য হিচাপে অন্তৰ্ভুক্ত কৰা হোৱা নাছিল।