দুৰ্নীতিৰ অভিযোগত অভিযুক্ত মহাৰাষ্ট্ৰৰ গৃহমন্ত্ৰী তথা এনচিপিৰ নেতা অনিল দেশমুখে অৱশেষত আজি পদত্যাগ কৰিবলৈ বাধ্য হয়।
বোম্বে উচ্চ ন্যায়ালয়ে দেশমুখৰ বিৰুদ্ধে চিবিআইক তদন্ত কৰিবলৈ অনুমতি প্ৰদান কৰাৰ পিছতে আজি দেশমুখে পদত্যাগ কৰে।
বোম্বে উচ্চ ন্যায়ালয়ৰ ন্যায়াধীশ দিপাংকৰ দত্ত আৰু গিৰিশ কুলকাৰ্ণিয়ে দেশমুখৰ বিৰুদ্ধে উঠা অভিযোগক বিশেষ গুৰুত্ব সহকাৰে ল’বলগীয়া অভিযোগ বুলি উল্লেখ কৰি ১৫ দিনৰ ভিতৰত চিবিআইক এই সম্পৰ্কে প্ৰাথমিক তদন্ত আৰম্ভ কৰিবলৈ নিৰ্দেশ দিয়ে।
ইয়াৰ পিছতে টুইটাৰত মহাৰাষ্ট্ৰ গৃহ মন্ত্ৰী অনিল দেশমুখে তেওঁৰ পদত্যাগপত্ৰ খন ৰাজহুৱা কৰে।
উল্লেখ্য মুম্বাইৰ প্ৰাক্তন আৰক্ষী আয়ুক্ত পৰমবীৰ সিঙে অলপতে মহাৰাষ্ট্ৰৰ গৃহমন্ত্ৰী অনিল দেশমুখৰ বিৰুদ্ধে প্ৰতি মাহে ১০০ কোটি সংগ্ৰহৰ নিৰ্দেশ দিয়া বুলি অভিযোগ উত্থাপন কৰি মুখ্যমন্ত্ৰী উদ্ধৱ থাকৰেৰলৈ পত্ৰ প্ৰেৰণ কৰিছিল।
পত্ৰখনত সদ্য নিলম্বিত আৰক্ষী বিষয়া শচীন ৱাজেক গৃহমন্ত্ৰী গৰাকীয়ে এই ধন সংগ্ৰহৰ নিৰ্দেশ দিয়া বুলি উল্লেখ কৰা হৈছে।
ইয়াৰ পিছতে মহাৰাষ্ট্ৰৰ ৰাজনীতিত ধুমুহাৰ সৃষ্টি হোৱা দেখা গৈছিল
৮ পৃষ্ঠাৰ পত্ৰখনত আৰক্ষী বিষয়াগৰাকীয়ে লগতে উল্লেখ কৰিছিল যে, প্ৰকৃত দোষীসকলৰ পৰা মনোযোগ আঁতৰবালৈ তেওঁক বলিৰ পাঠা সজোৱা হৈছে।
পত্ৰখনৰ এটা প্ৰতিলিপি উপ মুখ্যমন্ত্ৰী অজিত পাৱাৰ, অতিৰিক্ত গৃহ সচিব আৰু মহাৰাষ্ট্ৰৰ ৰাজ্যপাললৈ প্ৰেৰণ কৰা হৈছিল। ইফালে ৰাজ্যপাল ভগত সিং কোশিয়াৰিৰ কাৰ্যালয়েও পত্ৰখন লাভ কৰা বুলি প্ৰকাশ কৰিছিল।
এই বিস্ফোৰক অভিযোগৰ পিছতে মহাৰাষ্ট্ৰৰ গৃহমন্ত্ৰী অনিল দেশমুখে টুইটাৰ যোগে তেওঁৰ বিৰুদ্ধে উঠা অভিযোগ খণ্ডন কৰিছিল যদিও আদালতৰ নিৰ্দেশৰ পিছতে তেওঁ পদত্যাগ কৰিবলৈ বাধ্য হয়।।
পূৰ্বতে দেশমুখে কৈছিল—“প্ৰাক্তন আৰক্ষী আয়ুক্ত পৰমবীৰ সিঙে শচীন ৱাজে জড়িত থকা মনসুখ হেৰেনৰ গোচৰটোৰ পৰা নিজকে বচাবলৈ এই মিছা অভিযোগ কৰিছে, কাৰণ গোটৰটোৰ তদন্তত শচীন ৱাজেই জড়িত থকাটো স্পষ্ট হৈ পৰিছে।”
পত্ৰখনত অভিযোগৰাকী পৰমবীৰ সিঙে গৃহমন্ত্ৰীৰ চৰকাৰী আৱাস দ্যেনেশ্বৰীত অন্য আৰক্ষী বিষয়াৰে এই সম্পৰ্কে অৰ্থাৎ ধন সংগ্ৰহৰ বিষয়ে গৃহমন্ত্ৰী অনিল দেশমুখৰ আলোচনাৰ বিৱৰণো দিছিল।
ইফালে শচীন ৱাজেই পৰমীবৰ সিঙৰ কাৰ্যালয়লৈ আহি তেওঁক গৃহমন্ত্ৰীয়ে মাহে ১০০ কোটি টকা সংগ্ৰহ কৰিবলৈ দিয়াৰ কথা জনোৱা বুলি পত্ৰখনত উল্লেখ কৰি কৈছিল যে শচীন ৱাজেৰ মুখৰ পৰা এই কথা শুনি তেওঁ আশ্চৰ্যচকিত হৈ পৰিছিল।
“মাননীয় গৃহমন্ত্ৰীয়ে শ্ৰী ৱাজেক কৈছিল যে তেওঁ মাহত ১০০ কোটি টকা সংগ্ৰহৰ লক্ষ্য লৈছে। এই লক্ষ্য পূৰাবলৈ মাননীয় গৃহ মন্ত্ৰীয়ে শ্ৰী ৱাজেক কৈছিল যে মুম্বাইত প্ৰায় ১,৭৫০ বাৰ, ৰেষ্টুৰেণ্ট আৰু অন্যান্য প্ৰতিষ্ঠান আছে আৰু যদি তাৰ পৰা ২-৩ লাখ টকা সংগ্ৰহ কৰা হয়, তেন্তে মাহিলি ৪০-৫০ কোটি টকা সংগ্ৰহ হ’ব। মাননীয় গৃহমন্ত্ৰীয়ে লগতে কৈছিল যে বাকী টকাখিনি আন উৎসৰ পৰা সংগ্ৰহ কৰিব পাৰি।” পত্ৰখন এইদৰে উল্লেখ কৰিছিল পৰমবীৰ সিঙে।
কিছুদিন পূৰ্বে ভাৰতৰ আটাইকৈ ধনাৰ্ঢ্য ব্যক্তি মুকেশ আম্বানি বাসগৃহৰ সন্মুখত বিস্ফোৰক ভৰ্তি গাড়ী জব্দ কৰিছিল মুম্বাই আৰক্ষীয়ে। ইয়াৰ পিছতে মুকেশ নিৰাপত্তা প্ৰদানত ব্যৰ্থ হোৱাৰ অভিযোগ তুলি মুম্বাই আৰক্ষী আয়ুক্ত পদৰ পৰা পৰমবীৰ সিঙক বদলি কৰা হৈছিল।
আনফালে মনসুখ হেৰেনৰ গোচৰত জড়িত থকাৰ অভিযোগত NIA-এ শচীন ৱাজেক ইতিমধ্যে গ্ৰেপ্তাৰ কৰাৰ পিছত নিলম্বন কৰিছিল মহাৰাষ্ট্ৰৰ গৃহমন্ত্ৰীয়ে।