খোজত খালী ভৰি। পিন্ধনত এখন সাধাৰণ শাড়ী। সোঁহাতত এযোৰ ক্ষয় যোৱা চেণ্ডেল। লক্ষ্য মাত্ৰ এটাই যিকোনো প্ৰকাৰে দৌৰ প্ৰতিযোগিতাত জয়লাভ কৰা। নিজৰ বাবে নহয়, দুই কন্যাৰ ভৱিষ্যতৰ বাবে এই জয় তেওঁৰ বাবে অপৰিহাৰ্য আছিল। এইগৰাকী মহিয়সী মাতৃ হৈছে মহাৰাষ্ট্ৰৰ ৪৭ বছৰীয়া ৰমাবাই ৰণবীৰ, যি কেৱল কন্যাৰ স্কুলৰ মাচুল যোগাৰ কৰাৰ স্বাৰ্থত খালী ভৰিৰে মাৰাথন দৌৰি সকলোকে আচৰিত কৰি তুলিলে।
মহাৰাষ্ট্ৰৰ বীড় জিলাৰ আম্বাজোগাই গাঁৱৰ বাসিন্দা ৰমাবাই। স্বামীৰ মৃত্যুৰ পাছত পৰিয়ালটোৰ একমাত্ৰ উপাৰ্জনকাৰী তেৱেঁই। ঘৰে ঘৰে ৰন্ধা-বঢ়াৰ কাম কৰি তেওঁ দুই কন্যাক পঢ়ুৱাই আছে। পৰিস্থিতি যিমানেই বেয়া নহওক কিয়, কন্যাৰ পঢ়া-শুনাত যাতে কোনো ব্যাঘাত নজন্মে, তাৰ বাবে তেওঁ সকলো কষ্ট স্বীকাৰ কৰিবলৈ প্ৰস্তুত। এইবাৰো তাৰেই প্ৰমাণ দিলে ৰমাবাইয়ে।
কন্যাৰ স্কুলৰ মাচুল দিব নোৱাৰি উপায়হীন হৈ পৰা ৰমাবাইয়ে তেনে সময়তে জানিব পাৰে যে আম্বাজোগাই চহৰৰ খোলেশ্বৰ এডুকেচনেল কমপ্লেক্সৰ ৭৫ সংখ্যক বৰ্ষপূৰ্তি উপলক্ষে ‘অমৃত দৌৰ’ নামৰ এক মাৰাথনৰ আয়োজন কৰা হৈছে। প্ৰতিযোগিতাত প্ৰথম পুৰস্কাৰ হিচাপে ৩০০০ টকা দিয়া হ’ব বুলি জানিব পাৰি তেওঁ পলম নকৰি নাম পঞ্জীয়ন কৰে। কাৰণ এই টকাৰে তেওঁ কন্যাৰ স্কুলৰ মাচুল দিব পাৰিব।
দৌৰিবলৈ তেওঁৰ কোনো বিশেষ প্ৰশিক্ষণ নাছিল, নাছিল কোনো স্প’ৰ্টছ জোতা। পিন্ধনত শাড়ী আৰু ভৰিত চেণ্ডেল পিন্ধিয়েই তেওঁ দৌৰিবলৈ সাজু হয়। তেওঁক দেখি বহুতে ইতিকিং কৰিছিল যদিও দৌৰ আৰম্ভ হোৱাৰ লগে লগে সকলোৰে চকু কপালত উঠে। দৌৰ আৰম্ভ হোৱাৰ লগে লগেই ভৰিৰ পৰা চেণ্ডেলযোৰ সোঁহাতত লৈ খালী ভৰিৰেই দৌৰিবলৈ আৰম্ভ কৰে ৰমাবাইয়ে। একেবাৰে শেষত সকলো প্ৰতিযোগীক পিছ পেলাই ৰমাবাইয়ে প্ৰথম স্থান অধিকাৰ কৰে। বিজয়ীৰ পুৰস্কাৰ হিচাপে লাভ কৰা ৩০০০ টকা তেওঁৰ হাতত তুলি দিয়া হয়, যি ধন তেওঁ কন্যাৰ পঢ়া-শুনাৰ খৰচত ব্যৱহাৰ কৰিব বুলি জানিবলৈ দিয়ে। ৰমাবাইৰ এই অদম্য সাহসে এতিয়া ছ’চিয়েল মিডিয়াতো সকলোৰে হৃদয় জিনিছে।
