ৰাষ্ট্ৰদ্ৰোহৰ অভিযোগত কাৰাবন্দী হৈ থকা বৰ্ষাশ্ৰী বুঢ়াগোহাঁইৰ মুকলিৰ দাবী কৰিছে মহিলা কংগ্ৰেছৰ সভানেত্ৰী মীৰা বৰঠাকুৰে।
আজি ৰাজীৱ ভৱনত সাংবাদিকৰ সৈতে এক সাক্ষাৎকাৰত মীৰা বৰঠাকুৰে কয় যে বৰ্ষাশ্ৰীক কাৰাগাৰত পৰীক্ষা দিবলৈ দি মুখ্যমন্ত্ৰীয়ে বাহ: বাহ: ল’লেই নহ’ব।
“উচিত তথ্য প্ৰমাণ নথকাকৈ কেৱল বিদ্ৰোহী কবিতা লিখাৰ বাবেই বর্ষাশ্ৰীক জেলত ৰখা হৈছে। তাৰ পিছতো কাৰাগাৰত পৰীক্ষা দিয়াৰ সুবিধা দিয়েই মুখ্যমন্ত্ৰীয়ে বাহ: বাহ: লোৱাৰ কোনো যুক্তি নাই।”- বৰঠাকুৰে কয়।
আনহাতে আৰক্ষী সঞ্চালক প্ৰধান ভাস্কৰজ্যোতি মহন্তই বৰ্ষাশ্ৰী সন্দৰ্ভত কৰা মন্তব্যৰ বাবে “তেখেতে নিজৰ ল’ৰা-ছোৱালী হোৱা হ’লে এনেদৰে জেলত ৰাখিলেহেঁতেন জানো” বুলিও প্ৰশ্ন কৰে কংগ্ৰেছ নেত্ৰীগৰাকীয়ে।
তেওঁ কয় ‘বর্ষাশ্ৰীক প্ৰকৃততে জেলৰ নহয়, উপযুক্ত কাউন্সিলিংৰ প্ৰয়োজন। গণতন্ত্ৰত আমাৰ সংবিধানে এক বাক স্বাধীনতা দিছে। প্ৰতিবাদ কৰা গণতান্ত্ৰিক ধিৰা বিভিন্ন ধৰণৰ হ’ব পাৰে। কোনোবাই কবিতাৰে প্ৰতিবাদ কৰিব পাৰে কোনোবাই বিভিন্ন কথাৰে প্ৰতিবাদ কৰিব পাৰে।”
এটা কবিতা লিখা বাবেই এগৰাকী মেধাৱী ছাত্ৰীক পৰীক্ষা দিয়াৰ নামত এনে এটা লঘু শাস্তি দিয়া হৈছে বুলি অভিযোগ কৰি মীৰা বৰঠাকুৰে বৰ্ষাশ্ৰী আলফা বা কোনো নিষিদ্ধ সংগঠনত যোগদান কৰা ছোৱালী নহয় বুলি মন্তব্য কৰে।
আনহাতে চৰকাৰখনে হাল এৰি শিয়াল খেদিছে বুলিও উপহাস কৰি অসমৰ বিভিন্ন সমস্যাসমূহৰ ওপৰত চৰকাৰখনে মনোযোগ দিয়া উচিত বুলি মহিলা কংগ্ৰেছৰ সভানেত্ৰী গৰাকীয়ে উপদেশ দিয়ে।
