আগন্তুক ৯ ডিচেম্বৰত অনুষ্ঠিত হ’বলগীয়া দ্বিতীয় পৰ্যায়ৰ পঞ্চায়ত নিৰ্বাচনৰ দিন চমু চাপি অহাৰ লগে লগে গোৱালপাৰা জিলাৰ বিভিন্ন জিলা পৰিষদ তথা গাওঁ পঞ্চায়ত এলেকাত ৰাজনৈতিক দল সমূহৰ মাজত নিৰ্বাচনী তৎপৰতা বৃদ্ধি পোৱা পৰিলক্ষিত হৈছে ৷ জিলাখনৰ মুঠ ১৬ খন জিলা পৰিষদৰ অন্যতম ৭ নং বদাহপুৰ জিলা পৰিষদৰ আসন খন দখলৰ বাবেও আৰম্ভ হৈছে তীব্ৰ প্ৰতিদ্বন্দ্বিতা ৷ এইবেলি জিলা পৰিষদ খনত মুঠ চাৰি গৰাকী প্ৰাৰ্থীয়ে নিৰ্বাচনী যুঁজত অৱতীৰ্ণ হৈছে ৷ তেওঁলোক হৈছে বিজেপিৰ ৰূপালী ৰাভা,অগপৰ মজৰুল ইছলাম,কংগ্ৰেছৰ ছিৰাজুল হক আৰু নিৰ্দলীয় ফাৰুক আহমেদ ৷
টুকুৰা- বৰমোহৰা, ফফংগা, মেছেলখোৱা, বদাহপুৰ তথা মানিকপুৰ-ভেলাখামাৰ গাওঁ পঞ্চায়তৰে গঠিত বদাহপুৰ জিলা পৰিষদৰ সদস্যৰ আসনখন দখল কৰিবলৈ ইতিমধ্যে প্ৰতিগৰাকী প্ৰাৰ্থীয়ে ৰণ-কৌশল যুগুত কৰিছে৷ প্ৰতি গৰাকী প্ৰাৰ্থীয়ে গাৱেঁ ভূঞে নিৰ্বাচনী কাৰ্যালয় মুকলি কৰি সঘনাই অনুষ্ঠিত কৰিছে নিৰ্বাচনী সভা ৷ প্ৰায় ৩৯ হেজাৰ ভোটাৰ থকা বদাহপুৰ জিলা পৰিষদৰ সদস্যৰ আসনখনত অগপ আৰু বিজেপিৰ প্ৰাৰ্থী দুগৰাকীৰ মাজতে মূল যুঁজখন অনুষ্ঠিত হোৱাৰ সম্ভাৱনা প্ৰকট হৈ উঠিছে ৷
বিশেষকৈ অগপ,কংগ্ৰেছ আৰু নিৰ্দলীয় প্ৰাৰ্থী কেইগৰাকী সংখ্যালঘু শ্ৰেণীৰ প্ৰাৰ্থী হোৱাৰ পৰিপ্ৰেক্ষিতত সংখ্যালঘু ভোট বিভাজনৰ সম্ভাৱনা প্ৰবল ৷ আনহাতে পৰিষদখনত ৰূপালী ৰাভা একমাত্ৰ মহিলা প্ৰাৰ্থী হোৱাৰ সুবাদতে তেওঁ মহিলা ভোটাৰ সকলৰ সমৰ্থন আদায় কৰাৰ পূৰ্ণ সুযোগ লাভ কৰিব ৷ অবশ্যে অগপৰ প্ৰবল গণভিত্তি থকা পৰিষদখন নিজৰ হাতলৈ অনাৰ বাবে জিলা অগপৰ শীৰ্ষ কাণ্ডাৰীসকলে দিনে নিশাই ব্যস্ত হৈ পৰিছে ৷
ইফালে ৩৭ নং গোৱালপাৰা পূৱ সমষ্টিৰ কংগ্ৰেছী বিধায়কগৰাকীয়ে নিজ সমষ্টিৰ অন্তৰ্গত জিলা পৰিষদখন নিজ দলৰ অধীনতে ৰখাৰ বাবে প্ৰচেষ্টা অব্যাহত ৰাখিছে ৷ এয়া তেওঁৰ সন্মান ৰক্ষাৰ যুঁজ হিচাপে গ্ৰহণ কৰাত নিৰ্বাচনী প্ৰচাৰ কাৰ্য আকৰ্ষণীয় হৈ উঠিছে ৷
আনহাতে, পূৰ্বৰ আঞ্চলিক পঞ্চায়তৰ সদস্য হিচাপে কাৰ্যনিৰ্বাহ কৰা নিৰ্দলীয় প্ৰাৰ্থী গৰাকীয়েও নিজৰ সমৰ্থনত সভা সমিতি অনুষ্ঠিত কৰি ৰাইজৰ দৃষ্টি আকৰ্ষণ কৰিবলৈ সক্ষম হৈছে ৷ ইয়াৰ বিপৰীতে ৬০ নং মাণিকপুৰ ভেলাখামাৰ গাওঁ পঞ্চায়তৰ নিৰ্বাচনী যুঁজখনো ক্ৰমে আকৰ্ষণীয় ৰূপ ধাৰণ কৰিছে ৷ পঞ্চায়ত খনৰ অন্তৰ্গত ভোটাৰৰ ঘৰে ঘৰে গৈ বিভিন্ন ৰাজনৈতিক দলৰ প্ৰাৰ্থীৰ লগতে নিৰ্দ্দলীয় প্ৰাৰ্থী সকলে নিজৰ নিজৰ সমৰ্থনত প্ৰচাৰ চলাই গৈছে ৷ মুঠ ৫৪৩৯ গৰাকী ভোটাৰ থকা পঞ্চায়তখনত সভাপতি পদৰ বাবে প্ৰতিদ্বন্দ্বিতা কৰা প্ৰাৰ্থী সকল হৈছে নাজিয়া হুছেইন (কংগ্ৰেছ),আঞ্জুৱাৰা বেগম(অগপ), আছমা বেগম( নিৰ্দ্দলীয়) আৰু জায়দা খাতুন(নিৰ্দ্দলীয়) ৷
পঞ্চায়ত খনত আটাই কেইগৰাকী প্ৰাৰ্থীয়ে নিৰ্বাচনী প্ৰচাৰ কাৰ্য জোৰদাৰ কৰি তুলিছে যদিও মূল যুঁজ খন অগপ আৰু কংগ্ৰেছৰ মাজতে সীমাবদ্ধ থাকিব বুলি সচেতন মহলে মত ব্যক্ত কৰিছে ৷ আনহাতে মানিকপুৰ ভেলাখামাৰ গাওঁ পঞ্চায়তৰ আঞ্চলিক পঞ্চায়তৰ সদস্য পদৰ বাবে কংগ্ৰেছৰ খুশিদা আহমেদ আৰু অগপৰ হৈ তুহিন ৰহমানে প্ৰতিদ্বন্দ্বিতা কৰিছে ৷ উল্লেখ্য যে তুহিন ৰহমান আৰ্থিক ভাবে দুৰ্বল হোৱাত অগপ দলৰ কৰ্মকৰ্তা একাংশই নিজৰ পকেটৰ ধনেৰে পোষ্টাৰ , বেনাৰ আদি ছপাই প্ৰাৰ্থীগৰাকীক প্ৰচাৰ কাৰ্য চলোৱাত সহায় কৰা পৰিলক্ষিত হৈছে আৰু এই প্ৰচাৰকাৰ্যই পঞ্চায়তখনৰ সাধাৰণ ভোটাৰৰ দৃষ্টি আকৰ্ষণ কৰিবলৈ সক্ষম হোৱা দেখা গৈছে ৷
