কেন্দ্ৰীয় চৰকাৰে সোমবাৰে মাতৃ আৰু শিশু স্বাস্থ্য, জৰুৰীকালীন চিকিৎসা সেৱা আৰু ৰক্তহীনতা নিয়ন্ত্ৰণৰ বাবে কেবাখনো নতুন আঁচনি মুকলি কৰিছে। স্বাস্থ্য আৰু পৰিয়াল কল্যাণ পৰিষদৰ ষোড়শ সন্মিলনত এই গুৰুত্বপূৰ্ণ পদক্ষেপসমূহ গ্ৰহণ কৰা হয়। এই সন্মিলনত কেন্দ্ৰ আৰু ৰাজ্য চৰকাৰসমূহৰ মাজত সহযোগিতা বৃদ্ধি কৰি সকলোৰে বাবে উন্নত স্বাস্থ্য সেৱা নিশ্চিত কৰাৰ ওপৰত গুৰুত্ব আৰোপ কৰা হয়।
কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰী জে পি নড্ডাই এই সন্মিলনত সভাপতিত্ব কৰি কয় যে এখন সুস্থ সমাজৰ অবিহনে ২০৪৭ চনৰ ভিতৰত বিকশিত ভাৰত গঢ়াৰ সপোন বাস্তৱায়িত কৰা সম্ভৱ নহয়। তেওঁ ৰক্তহীনতা দূৰ কৰাৰ বাবে এনিমিয়া মুক্ত ভাৰত অভিযানৰ নতুন নিৰ্দেশনা মুকলি কৰে। ইয়াৰ জৰিয়তে ৰোগীৰ পৰীক্ষা, সঠিক খাদ্যাভ্যাস আৰু উন্নত চিকিৎসাৰ ওপৰত বিশেষ গুৰুত্ব দিয়া হ‘ব।
মন্ত্ৰালয়ে জৰুৰীকালীন সেৱা উন্নত কৰিবলৈ ৰাষ্ট্ৰীয় এম্বুলেন্স সেৱা, ২০২৬ৰ নতুন নিয়ম প্ৰৱৰ্তন কৰিছে, যিয়ে সমগ্ৰ দেশতে এম্বুলেন্সৰ মানদণ্ড আৰু সঁজুলিসমূহ একেধৰণৰ কৰিব। ইয়াৰ লগতে মাতৃ আৰু নৱজাতকৰ মৃত্যুৰ হাৰ কমাবলৈ আৰু স্বাস্থ্যৰ উন্নতিৰ বাবে সুমন ৰোডমেপ ২০৩০ মুকলি কৰা হৈছে। শূন্যৰ পৰা পাঁচ বছৰ বয়সৰ শিশুৰ যতনৰ বাবে সমগ্ৰ শিশু বাল স্বাস্থ্য কাৰ্যক্ৰম আৰম্ভ কৰা হৈছে, যাৰ জৰিয়তে স্বাস্থ্যকৰ্মীসকলে ঘৰলৈ গৈ শিশুৰ স্বাস্থ্য পৰীক্ষা আৰু পুষ্টিৰ পৰামৰ্শ দিব।
চৰকাৰৰ সফলতাৰ বিষয়ে উল্লেখ কৰি মন্ত্ৰীগৰাকীয়ে কয় যে ২০১৪ চনৰ পৰা ভাৰতত মাতৃৰ মৃত্যুৰ হাৰ প্ৰতি লাখত ১৩০ৰ পৰা ৮৭লৈ হ্ৰাস পাইছে আৰু শিশুৰ মৃত্যুৰ হাৰ ৭৯ শতাংশলৈ কমিছে। দেশত মানুহৰ গড় আয়ুস ৭০.৩ বছৰলৈ বৃদ্ধি পাইছে। যক্ষ্মা ৰোগ ২১ শতাংশলৈ হ্ৰাস পোৱাৰ লগতে ধনুষ্টংকাৰ, পলিঅ‘ আৰু মেলেৰিয়াৰ দৰে ৰোগ বহু পৰিমাণে নিয়ন্ত্ৰণলৈ আহিছে। মিছন ইন্দ্ৰধনুশৰ জৰিয়তে ৫.৪৬ কোটি শিশুক টিকাকৰণ কৰা হৈছে আৰু ফেব্ৰুৱাৰী মাহৰ পৰা ৫০ লাখৰো অধিক কিশোৰীক এইচ পি ভি ছিটা প্ৰদান কৰা হৈছে।
শেষত নড্ডাই কয় যে স্বাস্থ্য ৰাজ্যৰ বিষয় যদিও কেন্দ্ৰীয় চৰকাৰে নীতি, প্ৰযুক্তি আৰু আৰ্থিক সাহায্য প্ৰদান কৰি যাব। এই আঁচনিসমূহৰ সফল ৰূপায়ণৰ বাবে সকলো ৰাজ্য আৰু কেন্দ্ৰীয় শাসিত অঞ্চলৰ সক্ৰিয় অংশগ্ৰহণ অতি প্ৰয়োজনীয় বুলি তেওঁ আহ্বান জনায়।
