উত্তৰাখণ্ডৰ হালদ্বানীত কংগ্ৰেছ সভাপতি তথা ৰাজ্যসভাৰ বিৰোধী দলপতি মল্লিকাৰ্জুন খাৰ্গেৰ এখন সভাৰ পিছত অনুষ্ঠিত হোৱা বিতৰ্কিত ‘শুদ্ধিকৰণ’ কাৰ্যসূচীৰ তদন্ত বিচাৰি দাখিল কৰা আৱেদন খাৰিজ কৰিছে উত্তৰাখণ্ড উচ্চ ন্যায়ালয়ে। ৰাজ্য চৰকাৰৰ মহাধিবক্তাই আৰক্ষীয়ে সমগ্ৰ ঘটনাটোৰ এক নিৰপেক্ষ আৰু উচিত তদন্ত কৰিব বুলি আশ্বাস প্ৰদান কৰাৰ পিছতেই ন্যায়ালয়ে এই ৰায়দান কৰে।
৭ ছেপ্টেম্বৰ, সোমবাৰে ন্যায়াধীশ সিদ্ধাৰ্থ শ্বাহ আৰু মনোজ কুমাৰ তিৱাৰীৰ বিচাৰপীঠে কয়, “যিহেতু মহাধিবক্তাই গোচৰটোৰ নিৰপেক্ষ তদন্তৰ আশ্বাস দিছে, সেয়েহে তেওঁৰ মন্তব্য অবিশ্বাস কৰাৰ কোনো কাৰণ আমি দেখা নাই। বৰ্তমান পৰ্যায়ত ন্যায়ালয়ৰ ফালৰ পৰা আন কোনো নিৰ্দেশনাৰ প্ৰয়োজন নাই।”
বৈজ নাথ নামৰ এগৰাকী দলিত সম্প্ৰদায়ৰ অধিবক্তাই উচ্চ ন্যায়ালয়ত এই আৱেদন দাখিল কৰিছিল। তেওঁ ঘটনাটোৰ সময়সীমা নিৰ্ধাৰিত নিৰপেক্ষ তদন্ত, চিচিটিভি ফুটেজ সংৰক্ষণ আৰু খাৰ্গেৰ সভা তথা পৰৱৰ্তী ‘শুদ্ধিকৰণ’ যজ্ঞৰ সৈতে জড়িত নথিপত্ৰ সুৰক্ষিত কৰিবলৈ নিৰ্দেশ বিচাৰিছিল। লগতে, অস্পৃশ্যতাক অপৰাধ বুলি গণ্য কৰা নাগৰিক অধিকাৰ সুৰক্ষা আইন আৰু অনুসূচিত জাতি/জনজাতি (অত্যাচাৰ নিবাৰণ) আইনৰ অধীনত গোচৰ ৰুজু কৰাৰো দাবী জনাইছিল। উল্লেখযোগ্য যে মল্লিকাৰ্জুন খাৰ্গে ঐতিহাসিকভাৱে অস্পৃশ্যতাৰ বলি হৈ অহা দলিত সম্প্ৰদায়ৰ অন্তৰ্গত।
ৰাজ্যৰ মহাধিবক্তা এছ. এন. বাবুলকাৰে ন্যায়ালয়ক জনায় যে হালদ্বানী আৰক্ষীয়ে অমিত কুমাৰ নামৰ এজন ব্যক্তিৰ অভিযোগৰ ভিত্তিত ইতিমধ্যে এখন এজাহাৰ পঞ্জীয়ন কৰিছে। আনহাতে, বেংগালুৰুতো এখন ‘জিৰ’ এফ আই আৰ’ ৰুজু কৰা হৈছে, যিখন অতি সোনকালেই হালদ্বানীলৈ হস্তান্তৰ কৰা হ’ব বুলি তেওঁ জানিবলৈ দিয়ে।
প্ৰকাশিত এক প্ৰতিবেদন অনুসৰি, হালদ্বানীত ৰুজু হোৱা গোচৰটোত ৰাহুল গান্ধীৰ নামো সাঙোৰ খাইছে। আনহাতে বেংগালুৰুত ৰুজু হোৱা জিৰ’ এফ আই আৰখনত উত্তৰাখণ্ড বিজেপিৰ সভাপতি মহেশ ভাটৰ নাম উল্লেখ আছে। অভিযোগ কৰা হৈছিল যে এগৰাকী দলিত নেতাই ভাষণ দিয়াৰ বাবে ঠাইখন ‘অশুদ্ধ’ হোৱা বুলি প্ৰচাৰ চলোৱা হৈছিল।
১৩ আগষ্টত ‘শ্ৰী ৰাম সেনা ধৰ্মাৰ্থ সেৱা ন্যাস’ নামৰ সংগঠনটোৰ সদস্যসকলে হালদ্বানীৰ সেই খেলপথাৰখনত এক ‘শুদ্ধিকৰণ’ যজ্ঞ পাতিছিল। সংগঠনটোৰ সভাপতিয়ে সংবাদ মাধ্যমৰ আগত যুক্তি দিছিল যে খাৰ্গেই হিন্দু সংগঠনসমূহক সাপৰ লগত তুলনা কৰি মুছলমানসকলক সেইবোৰ শেষ কৰিবলৈ আহ্বান জনাইছিল, যাৰ ফলত হিন্দুসকলৰ আৱেগত আঘাত লাগিছে আৰু সেইবাবেই তেওঁলোকে এই যজ্ঞ পাতিছে।
এই সমগ্ৰ ঘটনাক লৈ ৰাজনৈতিক মহল উত্তপ্ত হৈ পৰে। কেন্দ্ৰীয় মন্ত্ৰী জে. পি. নড্ডাই ইয়াক এক “অত্যন্ত দুখজনক ঘটনা” বুলি অভিহিত কৰে। অৱশ্যে উত্তৰাখণ্ডৰ মুখ্যমন্ত্ৰী পুষ্কৰ সিং ধামী আৰু বিজেপিৰ ৰাজ্যিক সভাপতি মহেশ ভাটে এই ঘটনাৰ লগত খাৰ্গেৰ জাতিগত পৰিচয়ৰ কোনো সম্পৰ্ক নুই কৰিছে। তেওঁলোকৰ মতে, খাৰ্গেৰ সভাত দিয়া “জিহাদী শ্লোগান”ৰ বাবেহে এই যজ্ঞ পতা হৈছিল।
ইফালে, কংগ্ৰেছ সাংসদ মাল্লু ৰবিয়ে জনোৱা মতে, দলটোৰ অনুসূচিত জাতি আৰু জনজাতিৰ সাংসদসকলে এটা সংসদীয় ফ’ৰাম গঠন কৰি মঙলবাৰে ৰাষ্ট্ৰপতি দ্ৰৌপদী মুৰ্মুক সাক্ষাৎ কৰিব আৰু এই ‘শুদ্ধিকৰণ’ অনুষ্ঠানৰ বিৰুদ্ধে এখন স্মাৰকপত্ৰ প্ৰদান কৰিব।
