ৰাজ্যত প্ৰথমবাৰৰ বাবে বিজেপি চৰকাৰে শপত লোৱাৰ পিছতেই এক গুৰুত্বপূৰ্ণ ঘোষণা কৰিছে তৃণমূল কংগ্ৰেছৰ মুৰব্বী মমতা বেনাৰ্জীয়ে। এক অনুষ্ঠানত অংশগ্ৰহণ কৰি তেওঁ স্পষ্টকৈ কয় যে বিজেপিৰ বিৰুদ্ধে যুঁজিবলৈ তেওঁৰ কোনো ব্যক্তিগত অহংকাৰ নাই। বংগৰ সকলো বিৰোধী ৰাজনৈতিক দলক একত্ৰিত হবলৈ আহ্বান জনাই তেওঁ কয় যে বিজেপিৰ দৰে শক্তিক ৰোধ কৰিবলৈ সকলোৱে মিলি এখন যুটীয়া মঞ্চ গঠন কৰা উচিত। আনকি যিবোৰ বামপন্থী দলৰ বিৰুদ্ধে তেওঁ ইমান দিনে যুঁজ দি আহিছিল, সেই বামপন্থীসকলকো তেওঁ এই যুঁজত অংশ লবলৈ মুকলি নিমন্ত্ৰণ জনাইছে। তেওঁৰ মতে বৰ্তমানৰ সময়ত বিজেপিই হৈছে দেশৰ আৰু ৰাজ্যৰ প্ৰধান ৰাজনৈতিক শত্ৰু।
মমতা বেনাৰ্জীয়ে অভিযোগ কৰিছে যে নিৰ্বাচনৰ ফলাফল ওলোৱাৰ পিছৰে পৰা বংগৰ মানুহৰ ওপৰত নিৰ্যাতন চলিছে। তেওঁৰ মতে এয়া নীতিৰ যুঁজ আৰু এই যুঁজ এতিয়াহে আৰম্ভ হৈছে। যিসকলে একেলগে আহিব বিচাৰে তেওঁলোকৰ বাবে পথ মুকলি আছে বুলি উল্লেখ কৰি তেওঁ কয় যে যিসকলে এৰি যাব বিচাৰে তেওঁলোক যাব পাৰে কিন্তু যিসকলে যুঁজিব বিচাৰে তেওঁলোক ঐক্যবদ্ধ হোৱাটো প্ৰয়োজন। ৰাজ্যখনত চলি থকা হিংসাত্মক পৰিস্থিতিৰ নিন্দা কৰি তেওঁ কয় যে বিজেপি চৰকাৰে শাসনভাৰ লৈয়েই পুলিচ আৰু নিৰাপত্তা ব্যৱস্থাৰ সালসলনি কৰিছে যাৰ ফলত তৃণমূলৰ কৰ্মীসকলৰ ওপৰত আক্ৰমণ বৃদ্ধি পাইছে। তেওঁ লগতে কয় যে দিল্লীৰ বহু নেতা তেওঁৰ সৈতে যোগাযোগত আছে আৰু সংখ্যাত কম হ’লেও তেওঁলোকে এই যুঁজ চলাই যাব।
আনহাতে ব্ৰিগেড পেৰেড গ্ৰাউণ্ডত প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ উপস্থিতিত পশ্চিমবংগৰ মুখ্যমন্ত্ৰী হিচাপে শপত গ্ৰহণ কৰিছে শুভেন্দু অধিকাৰীয়ে। তেওঁৰ নতুন মন্ত্ৰীসভাত ইতিমধ্যে পাঁচজন সদস্যই স্থান লাভ কৰিছে। উত্তৰ বংগৰ পৰা দুজন আৰু দক্ষিণ বংগৰ পৰা তিনিজন বিধায়কক লৈ এই মন্ত্ৰীসভা গঠন কৰা হৈছে য’ত আদিবাসী, মতুৱা আৰু ৰাজবংশী সম্প্ৰদায়ৰ প্ৰতিনিধি আছে। শুভেন্দু অধিকাৰীৰ লগতে দিলীপ ঘোষ, অগ্নিমিত্ৰা পাল, অশোক কীৰ্তনীয়া, নিশীথ প্ৰামাণিক আৰু ক্ষুদিৰাম টুডুৱে মন্ত্ৰী হিচাপে শপত লৈছে। অৱশ্যে এতিয়ালৈকে কাৰ হাতত কোনটো দপ্তৰ থাকিব সেইটো স্পষ্ট হোৱা নাই।
ৰাজনৈতিক বিশ্লেষকসকলৰ মতে ৰাজনীতিৰ খেলপথাৰত কোনো স্থায়ী বন্ধু বা শত্ৰু নাথাকে। যিদিনা বিজেপিয়ে ৰাজ্যৰ শাসনভাৰ নিজৰ হাতলৈ লৈছে সেইদিনাই মমতা বেনাৰ্জীৰ এই বাৰ্তাই এক নতুন ৰাজনৈতিক সমীকৰণৰ ইংগিত দিছে। ইমান দিনে যিবিলাক দলৰ বিৰুদ্ধে তেওঁ কঠোৰ স্থিতি গ্ৰহণ কৰিছিল, এতিয়া তেওঁলোককেই লগত লৈ আগবাঢ়িব খোজাটোৱে বংগৰ ৰাজনীতিত কি পৰিৱৰ্তন আনে সেয়া আগন্তুক সময়ত লক্ষণীয় হ’ব। বিজেপিৰ বিৰুদ্ধে এক শক্তিশালী বিৰোধী ঐক্য গঢ়ি তোলাৰ লক্ষ্যৰে মমতাই দিয়া এই আহ্বানক লৈ এতিয়া সমগ্ৰ ৰাজ্যতে চৰ্চা চলিছে।
