অসমৰ তিনিচুকীয়া জিলাৰ ধলাত বৃহস্পতিবাৰে দুৰ্বৃত্তই পাঁচজন লোকক গুলীয়াই হত্যা কৰা ঘটনাক পশ্চিম বংগৰ মুখ্যমন্ত্ৰী মমতা বেনাৰ্জীয়ে ৰাজনৈতিক ষড়যন্ত্ৰ বুলি অভিহিত কৰিছে। তদুপৰি তেওঁৰ দল তৃণমূল কংগ্ৰেছেও এই সন্দৰ্ভত ব্যাপক প্ৰতিক্ৰিয়া প্ৰকাশ কৰিছে।
ধলাৰ ঘটনাৰ বাবে তৃণমূল কংগ্ৰেছে অসম চৰকাৰৰ লগতে ৰাষ্ট্ৰীয় নাগৰিকপঞ্জীক দোষাৰোপ কৰিছে। খোৰবাৰীৰ এই গণহত্যাৰ ঘটনাৰ পাছতে শুকুৰবাৰে দলটোৱে পশ্চিম বংগত প্ৰতিবাদী কাৰ্যসূচীও গ্ৰহণ কৰে। শুকুৰবাৰে কলকাতাকে ধৰি ৰাজ্যখনৰ বিভিন্ন জিলাত দলটোৱে বিক্ষোভ প্ৰদৰ্শন কৰে।
তৃণমূলৰ সাধাৰণ সম্পাদক পাৰ্থ চেটাৰ্জীয়ে অভিযোগ কৰে যে ৰাজনৈতিক স্বাৰ্থ সিদ্ধিৰ বাবে এন আৰ চিৰ খচৰাৰ পৰা বাচি বাচি বাংলাভাষী লোকসকলক বাদ দিয়াটোৱে সন্ত্ৰাসবাদীক উৎসাহিত কৰিছে আৰু বৃহস্পতিবাৰৰ ঘটনাটো ইয়াৰে পৰিণতি।
অসম চৰকাৰে বাঙালীসকলৰ প্ৰতি বৈষম্যমূলক আচৰণ কৰাৰ অভিযোগ তুলি চেটাৰ্জীয়ে ৰাজ্যখনৰ পৰা বঙালীসকলক অবৈধভাৱে বাহিৰ কৰাৰ প্ৰচেষ্টা চলোৱা বুলি দাবী কৰে। তেওঁ তৃণমূলে আৰম্ভণিৰ পৰাই অসমত বাস কৰা বাঙালীসকলৰ বিৰুদ্ধে এন আৰ চিৰ নামত কৰি অহা ষড়যন্ত্ৰৰ বিৰোধিতা কৰি অহা বুলিও সদৰী কৰে।
পশ্চিমবংগৰ মুখ্যমন্ত্ৰী মমতাই টুইটাৰযোগে ধলাৰ হত্যাকাণ্ডৰ ঘটনাত দুখ প্ৰকাশ কৰি গৰিহণা দিয়াৰ লগতে তেওঁ ইয়াক এন আৰ চিৰ পৰিণতি বুলি অভিযোগ কৰে। বেনাৰ্জীয়ে দোষীক শীঘ্ৰে কৰায়ত্ত কৰি কঠোৰ শাস্তি প্ৰদানৰো দাবী জনায়।