পত্নী বিবাহ বহিৰ্ভূত প্ৰেমত জড়িত হোৱাৰ সন্দেহ কৰিছিল স্বামীয়ে। মানুহজনে পত্নীৰ ‘প্ৰেমিক’ক নিজৰ ঘৰলৈ মাতিছিল। একেলগে মদ খোৱাৰ অজুহাতত তেওঁক মাতি আনিছিল। ইয়াৰ পিছতে মহিলাগৰাকীৰ স্বামীয়ে লোকজনক হত্যা কৰাৰ অভিযোগ উঠিছে। মুম্বাইৰ গোৰেগাঁও অঞ্চলত সংঘটিত হৈছে এই ঘটনা। হত্যাকাণ্ডৰ গোচৰত অভিযুক্তক গ্ৰেপ্তাৰ কৰা হৈছে।
আৰক্ষীৰ সূত্ৰ অনুসৰি মৃত লোকজনৰ নাম বিকাশ অশোক ভুছাৰে (৪৮)। ভীমৰাজ ওমপ্ৰকাশ শৰ্মাৰ বিৰুদ্ধে তেওঁক হত্যা কৰাৰ অভিযোগ উঠিছে।
বৃহস্পতিবাৰে আৰক্ষীয়ে জনোৱা মতে, পত্নীৰ সৈতে বিকাশে সম্পৰ্ক গঢ়ি তুলিছিল বুলিপত্নীক ভীমৰাজে সন্দেহ কৰিছিল। ভীমৰাজে তেওঁক ফোন কৰিছিল। ভীমৰাজে তেওঁক দুয়ো একেলগে বহি মদ খাব বুলি গোৰেগাঁৱৰ আৰে অঞ্চলত থকা নিজৰ ঘৰলৈ আমন্ত্ৰণজনাইছিল।
নিমন্ত্ৰণ পোৱাৰ পিছত বুধবাৰে বিকাশ তেওঁৰ ঘৰলৈ আহে। তাতেই বিকাশৰ লগত ভীমৰাজ আৰু তেওঁৰ পত্নীয়ে সুৰাপান কৰিছিল। তাৰ পিছতে বিকাশক হত্যা কৰা বুলি অভিযোগ উত্থাপন হৈছে।
আৰে অঞ্চলৰ এজন আৰক্ষী বিষয়াই জনোৱা মতে, ভীমৰাজ ওমপ্ৰকাশ শৰ্মাই তেওঁৰ পত্নীয়ে বিকাশৰ সৈতে প্ৰেমৰ সম্পৰ্ক স্থাপন কৰা বুলি সন্দেহ কৰিছিল। ভীমৰাজে তেওঁক নিজৰ বাসগৃহলৈ মাতিলে। তেওঁ, পত্নী আৰু বিকাশে একেলগে সুৰাপান কৰিছিল। ইয়াৰ পিছত ভীমৰাজে বিকাশক সকীয়াই দিলে যে পুনৰ পত্নীক যাতে লগ নকৰে। ইয়াৰ কিছু সময়ৰ পাছতে ভীমৰাজে পত্নীৰ সন্মুখতে দাৰে বিকাশৰ ডিঙি কাটি পেলোৱাৰ অভিযোগ উত্থাপন হৈছে।
আৰক্ষীয়ে জনোৱা মতে, ইয়াৰ পিছতে ভীমৰাজে তাৰ পৰা পলায়ন কৰে। তেওঁ ওচৰৰ বনাঞ্চলত আত্মগোপন কৰি আছিল। আৰক্ষীয়ে তথ্য লাভ কৰাৰ লগে লগে তালৈ যায় আৰু অভিযুক্তই পুনৰ পলায়নৰ চেষ্টা কৰে। প্ৰায় তিনি ঘণ্টা খেদি যোৱাৰ পিছত তেওঁক গ্ৰেপ্তাৰ কৰা হয়।
আৰক্ষীৰ দাবী যে ভীমৰাজে নিজৰ অপৰাধ স্বীকাৰ কৰিছে। তেওঁ আৰক্ষীক জনাইছে যে বিকাশে আগতেও পত্নীক হাৰাশাস্তি কৰিছিল। এই বিষয়ে তেওঁক কেইবাবাৰো সকীয়াই দিছিল। ইয়াৰ পিছতো বিকাশে পত্নীক লগ পাই আছিল।
এই সন্দৰ্ভত তদন্ত চলি থকা বুলিও বিষয়াসকলে জানিবলৈ দিয়ে। অভিযুক্তৰ পত্নীৰ ভূমিকাৰো তদন্ত চলি থকা বুলি জানিবলৈ দিয়ে।
