নিজৰ তোলনীয়া কন্যাক যৌন নিৰ্যাতন চলোৱাৰ অপৰাধত সুবিৰাম ৰায় নামৰ এজন লোকক কোকৰাঝাৰৰ বিশেষ আদালতৰ জে.কোচৰ আদালতে আজি দহ বছৰৰ কাৰাদণ্ডৰ ৰায়দান দিয়ে৷ লগতে পাঁচ হাজাৰ টকাৰ জৰিমনাও বিহে ।
তদুপৰি জৰিমনা আদায় অবিহনে অতিৰিক্তভাৱে দুমাহৰ কাৰাদণ্ড ভৰিব লাগিব বুলি আদালতে নিৰ্দেশ প্ৰদান কৰিছে ।
উল্লেখ্য যে, কোকৰাঝাৰ জিলাৰ এখন গাঁৱৰ অতি দুখীয়া পৰিয়ালৰ এগৰাকী নাবালিকাক জিলাখনৰে কাৰিগাঁও এলেকাৰ সুবিৰাম ৰায়ে নিজৰ তোলনীয়া কন্যা হিচাপে গ্ৰহণ কৰিছিল ।
২০১৮ চনৰ ৮ জুনত যেতিয়া নাবালিকা ছোৱালীজনীক তেওঁৰ মাতৃয়ে স্বগৃহলৈ কেইদিনমানৰ বাবে লৈ আহে তেতিয়াই নাবালিকা ছোৱালীজনীয়ে তাইৰ মাতৃক পালিত পিতৃ অৰ্থাৎ সুবিৰাম ৰায়ে তাইক যৌন নিৰ্যাতন চলায় বুলি অভিযোগ কৰে ।
ইয়াতেই হতভম্ব হৈ পৰিয়ালৰ লোকে ২০১৮ চনৰ ২১ জুনত বিষয়টো আৰক্ষীক অৱগত কৰে ৷ পিছত ঘটনা সন্দৰ্ভত কোকৰাঝাৰ সদৰ থানাত পকচো আইনৰ অধীনত এক গোচৰ (নং ২৯৫/১৮) ৰজু কৰা হয় ।
আৰক্ষীয়ে সুবিৰাম ৰায় আৰু তেওঁৰ পত্নী ববিতা ৰায়ৰ বিৰুদ্ধে গোচৰ ৰজু কৰি অনুসন্ধান চলায় আৰু অভিযোগনামা দাখিল কৰে । কোকৰাঝাৰ বিশেষ আদালতে সকলো বিষয়বস্তু চালি – জাৰি চাই চাৰি বছৰৰ মূৰত আজি সুবিৰাম ৰায়ৰ বিৰুদ্ধে শাস্তি ঘোষণা কৰাৰ লগতে ববিতা ৰায়ক দোষমুক্ত বুলি ঘোষণা কৰে ।
আদালতে সুবিৰাম ৰায়ক দহ বছৰৰ কাৰাদণ্ডৰেদণ্ডিত কৰাৰ লগতে পাঁচ হাজাৰ টকাৰ জৰিমনা বিহিছে ।
