দেশত অবাধ হাৰত হোৱা মূল্যবৃদ্ধিৰ বিৰুদ্ধে অভিনৱ ৰূপত প্ৰতিবাদ সাব্যস্ত কৰি গ্ৰেপ্তাৰ হোৱা বিৰিঞ্চি বৰা নামৰ ব্যক্তিজনক আজি মুকলি কৰি দিয়ে নগাঁও আৰক্ষীয়ে। মুখ্যমন্ত্ৰী হিমন্ত বিশ্ব শৰ্মাৰ হস্তক্ষেপৰ পিছত বিৰিঞ্চি বৰাক তাৎক্ষণিকভাৱে জামিনত মুকলি কৰি দিয়া হয়।
উল্লেখ্য যে শনিবাৰে অত্যাৱশ্যকীয় সামগ্ৰীৰ লগতে ইন্ধনৰ বৰ্ধিত মূল্যৰ বিৰুদ্ধে জনসাধাৰণক সজাগ কৰিবলৈ বিৰিঞ্চি বৰাই গ্ৰহণ কৰিছিল এক অভিনৱ পন্থা। শিৱৰ পোছাক পৰিধান কৰি বাটৰ নাটৰ জৰিয়তে মূল্য বৃদ্ধিৰ বিৰুদ্ধে এক প্ৰতিকী প্ৰতিবাদ সাব্যস্ত কৰিছিল বিৰিঞ্চি বৰাই।
কিন্তু মূলত: মূল্য বৃদ্ধিৰ বিৰুদ্ধে বৰাই প্ৰতিবাদ হিচাপে লোৱা এই পন্থাই হিন্দু ধৰ্মাৱলম্বীৰ ধৰ্মীয় অনুভূতিত আঘাত কৰিছে বুলি অভিযোগ কৰিছিল দুই হিন্দুত্ববাদী সংগঠন বজৰং দল আৰু বিশ্ব হিন্দু পৰিষদে।
ইয়াৰ পিছতে বিৰিঞ্চি বৰাৰ বিৰুদ্ধে নগাঁও সদৰ আৰক্ষী থানাত এখন এজাহাৰ দাখিল কৰিছিল সংগঠন দুটাই। এজাহাৰ দাখিলৰ পিছতে নগাঁও আৰক্ষীয়ে বিৰিঞ্চি বৰাক আটক কৰিছিল।
সততে বিভিন্ন সামাজিক কাৰ্যৰ জড়িত থকা তথা চৰকাৰৰ জনবিৰোধী নীতিৰ বিৰোধ কৰি অহা ব্যক্তিগৰাকীৰ গ্ৰেপ্তাৰৰ পিছত ব্যাপক প্ৰতিক্ৰিয়াৰ সৃষ্টি হয়। এনে প্ৰতিক্ৰিয়াৰ পাছতে মুখ্যমন্ত্ৰী হিমন্ত বিশ্ব শৰ্মাই বিষয়টোত হস্তক্ষেপত কৰে।
মুখ্যমন্ত্ৰী শৰ্মাই এক টুইট যোগে কয় যে সাম্প্ৰতিক বিষয়ক লৈ এনে প্ৰতিকী নাটক কৰা নিন্দনীয় নহয়। কোনো আপত্তিজনক ব্যৱহাৰ নকৰালৈকে পোছাক পিন্ধাটো অপৰাধ হ’ব নোৱাৰে। এই বিষয়ত নগাঁও আৰক্ষীক উপযুক্ত নিৰ্দেশ জাৰি কৰা হৈছে বুলিও তেওঁ লগতে কয়।
ইফালে নগাঁও আৰক্ষীয়ে মুকলি কৰি দিয়াৰ পাছত তেওঁৰ ওপৰত দিয়া গোচৰৰ সন্দৰ্ভত প্ৰতিক্ৰিয়া প্ৰকাশ কৰিছে বিৰিঞ্চি বৰাই।
এই ভিডিঅ’ বাৰ্তাযোগে তেওঁ কয় যে বাটৰ নাটৰ যোগে তেওঁ ৰাইজক মূল্যবৃদ্ধিৰ বিৰুদ্ধে সজাগ কৰিব বিচৰা কাৰ্যত অন্য কোনো বিষয় অহাৰ প্ৰশ্নই নুঠে।
নিজকে এগৰাকী শিৱ ভক্ত বুলি উল্লেখ কৰি বৰাই লগতে কয় যে বজৰং দল, বিশ্ব হিন্দু পৰিষদ আদি বিজেপিৰ ভাতৃ সংগঠনে এই বিষয়ত কোনো জ্ঞান নথকাকৈয়ে তেওঁ বিৰুদ্ধে গোচৰ তৰিছে। তেওঁলোকে ‘হৰ হৰ মহাদেৱ’ ধ্বনিক ‘হৰ হৰ মোদী’ বুলি শ্ল’গান দি নিজেই শিৱক অপমান কৰিছে।
এনে মনেসজা গোচৰত তেওঁলোকে আদালতৰ মজিয়াত মুখ থেকেচা খালহেঁতেন বুলি উল্লেখ কৰি এনে কাৰণতে তেওঁক মুকলি কৰি দিবলৈ বাধ্য হৈছে বুলি উল্লেখ কৰে।