বুধবাৰে ভাইৰেল হোৱা মণিপুৰত দুগৰাকী কুকি মহিলাক উলংগ কৰি পেৰেড কৰা ভয়ানক ভিডিঅ’ ভাইৰেল হোৱাৰ পাছতে মণিপুৰৰ হিংসাত্মক ঘটনাক লৈ আজি প্ৰধানমন্ত্ৰী নৰেন্দ্ৰ মোদীয়ে মুখ খুলিছে।
সংসদৰ বৰ্ষাকালীন অধিৱেশন আৰম্ভ হোৱাৰ পূৰ্বে প্ৰধানমন্ত্ৰী মোদীয়ে কয়, “মই জাতিটোক আশ্বস্ত কৰিব বিচাৰো, কোনো দোষীক ৰেহাই দিয়া নহ’ব। আইন অনুসৰি ব্যৱস্থা গ্ৰহণ কৰা হ’ব। মণিপুৰৰ কন্যাৰ লগত যি হ’ল সেয়া কেতিয়াও ক্ষমা কৰিব নোৱাৰি।”
“গণতন্ত্ৰৰ এই মন্দিৰৰ কাষত থিয় হৈ থাকোঁতে মোৰ হৃদয়খন যন্ত্ৰণা আৰু ক্ষোভেৰে ভৰি পৰিছে। মণিপুৰৰ কাণ্ডটো যিকোনো সভ্য জাতিৰ বাবে লজ্জাজনক। সমগ্ৰ দেশ লজ্জানত হৈ পৰিছে।”
মণিপুৰৰ ভয়াবহতাক গৰিহণা দি প্ৰধানমন্ত্ৰী মোদীয়ে কংগ্ৰেছ শাসিত ৰাজস্থান আৰু ছত্তীশগড়ৰ ঘটনাৰ কথাও উল্লেখ কৰি কয় যে, “মই সকলো মুখ্যমন্ত্ৰীক তেওঁলোকৰ ৰাজ্যত আইন-শৃংখলা শক্তিশালী কৰিবলৈ আহ্বান জনাইছো, বিশেষকৈ আমাৰ মাতৃ-ভগ্নীসকলৰ সন্দৰ্ভত, আৰু কঠোৰতম ব্যৱস্থা গ্ৰহণ কৰক, ৰাজস্থান, চত্তীশগড় বা মণিপুৰ য’তে হওক। ভাৰতৰ প্ৰতিটো কোণতে আমি ৰাজনীতিৰ উৰ্ধলৈ গৈ এনে জঘন্য অপৰাধৰ বিৰুদ্ধে কাম কৰা উচিত।”
উল্লেখ্য যে যোৱা মে’ মাহৰ পৰা ভাতৃঘাটি সংঘৰ্ষত মণিপুৰৰ জ্বলি আছে। হিংসাত্মক ঘটনাত প্ৰায় ১৪০ গাৰকী লোক নিহত হোৱাৰ লগতে হাজাৰো অধিক লোক আহত হৈছে। প্ৰায় ৭০ হাজাৰ লোক আশ্ৰয় শিবিৰত আশ্ৰয় ল’বলৈ বাধ্য হৈছে। মণিপুৰৰ হিংসাত্মক ঘটনাই আন্তঃৰাষ্ট্ৰীয় ৰাজনীতিটো চৰ্চা লাভ কৰিছে। ইউৰোপীয়ান সংসদে মণিপুৰৰ হিংসাত্মক ঘটনাৰ সন্দৰ্ভত প্ৰস্তাৱ গ্ৰহণো কৰিছে।
কিন্তু প্ৰায় আঢ়ৈটা মাহে নিশ্চুপ হৈ আছিল দেশৰ প্ৰধানমন্ত্ৰী নৰেন্দ্ৰ মোদী। মণিপুৰত হিংসাত্মক ঘটনা সূত্ৰপাত হোৱাৰ সময়ত প্ৰধানমন্ত্ৰী মোদী কৰ্ণাটকত নিৰ্বাচনী প্ৰচাৰত ব্যস্ত আছিল। ইয়াৰ পাছতো জাপান, আমেৰিকা, ফ্ৰান্স আদি দেশ ভ্ৰনণ কৰি আহিল প্ৰধানমন্ত্ৰী মোদীয়ে। অন্য সময়খিনিত বিজেপিৰ মহাজনসম্পৰ্ক ৰেলীত অংশগ্ৰহণ কৰি ২০২৪ৰ নিৰ্বাচনৰ ৰণশিঙা বজাই ফুৰিছে তেওঁ। কিন্তু অশান্তজৰ্জৰ মণিপুৰলৈ এবাৰ অহাটো বাদেই, মণিপুৰবাসীক শান্তি বৰ্তাই ৰাখিবলৈ এটা আহ্বানো দিয়া নাছিল প্ৰধানমন্ত্ৰী মোদীয়ে।
দুগৰাকী কুকি মহিলাক উলংগ কৰি পেৰেড কৰাৰ ভিডিঅ’ ভাইৰেল হোৱাৰ পাছতহে প্ৰধানমন্ত্ৰী নৰেন্দ্ৰ মোদীয়ে মৌনতা ভংগ কৰিছে। প্ৰকাশিত খবৰ অনুসৰি ভুক্তভোগী কুকি মহিলা দুগৰাকীক যোৱা ৪ মে’ত গণধৰ্ষণ কৰি উলংগ কৰি একাংশ লোকে পেৰেড কৰিছিল।
এই ঘটনাটো পোহৰলৈ অহাৰ পাছতে সমগ্ৰ দেশতে চাঞ্চল্যৰ সৃষ্টি হোৱাই নহয়, এই ঘটনাই বিজেপি শাসিত ৰাজ্যখনত যে চূড়ান্তভাৱে মানৱতাৰ ভুলুণ্ঠিত হৈছে তাকেই প্ৰমাণ কৰিছে।
এই ঘটনাক লৈ হৃদয়ৰ যন্ত্ৰণা আৰু ক্ষোভ প্ৰকাশ কৰা প্ৰধানমন্ত্ৰী মোদীৰ মানৱতা আৰু সততা সন্দেহ আৱৰ্তত সোমাই পৰিছে। কাৰণ প্ৰায় ১৪০ গৰাকী লোকৰ মৃত্যু হোৱাৰ পাছতো হৃদয় নগ’লা প্ৰধানমন্ত্ৰী মোদীৰ দুগৰাকী নাৰীৰ ওপৰত চলা দানৱীয় অত্যাচাৰতে সঁচাই হৃদয় ভাঙি চুৰমাৰ হৈছে নে এই প্ৰশ্নৰো উদয় হৈছে।
