হত্যা-হিংসাৰ দাবানলত জাহ গৈছে মণিপুৰ। দুমাহতকৈ অধিক সময় ধৰি অগ্নিগৰ্ভৰ হৈ থকা মণিপুৰত এতিয়া শান্তি দূৰ নিলগত! ৰাজ্যখনত এতিয়াও শাম কটা নাই হিংসাত্মক পৰিস্থিতিৰ। হত্যা-হিংসাৰ এই অগ্নিগৰ্ভৰ পৰিস্থিতিৰ মাজতে কালি পুনৰ জ্বলি উঠে মণিপুৰ।
কালি ৰাজ্যখনৰ ইম্ফল পশ্চিম জিলাত তিনিখন খালী গেছ চিলিণ্ডাৰ ভৰ্তি ট্ৰাকত অগ্নিসংযোগ কৰে অচিনাক্ত দুষ্কৃতিকাৰীয়ে। কালি দিনৰ ভাগতে মিছাও গেছ এজেন্সীৰ ট্ৰাক কেইখনত অস্ত্ৰধাৰী অচিনাক্ত দুৰ্বৃত্তৰ দলটোৱে অগ্নিসংযোগ কৰে।
এই ঘটনাৰ খবৰ লাভ কৰাৰ পিছতে চেকামি আৰক্ষীৰ এটা দল আৰু দুখন অগ্নিনিৰ্বাপক বাহন তাৎক্ষণিকভাৱে ঘটনাস্থলীত উপস্থিত হয় যদিও তাৰ পূৰ্বেই বিস্তৰ ক্ষতিসাধন হয় বাহনসমূহৰ। ঘটনা সন্দৰ্ভত আৰক্ষীয়ে গোচৰ ৰুজু কৰি তদন্ত অব্যাহত ৰাখিছে।
ইফালে ইম্ফল পূৱ জিলাত আততায়ীৰ গুলীৰ চিকাৰ হয় এগৰাকী আদবয়সীয়া মহিলা। কেই হেইকাক মাপাল মানিং লেইকাইৰ সমীপৰ এক স্থানত উদ্ধাৰ হয় মহিলাগৰাকীৰ মৃতদেহ। মণিপুৰ আৰক্ষীয়ে মহিলাগৰাকীৰ পৰিচয় অথবা হত্যাৰ কাৰণ কি সেয়া এতিয়াও প্ৰকাশ কৰা নাই।
এই দুই ঘটনাই ৰাজ্যখনত উত্তেজনা অধিক বৃদ্ধি কৰে আৰু পৰিস্থিতিৰ সম্ভাৱ্য ভয়াৱহতাৰ প্ৰতি লক্ষ্য ৰাখি সষ্টম হৈ উঠিছে আৰক্ষী। ঘটনা সংঘটিত হোৱা অঞ্চলকেইটাত আৰক্ষীৰ টহল তীব্ৰতৰ কৰি তোলা হৈছে আৰু অধিক তথ্য সংগ্ৰহৰ বাবে স্থানীয় লোকসকলক সোধা-পোছা কৰা হৈছে।
উল্লেখ্য যে, বিগত ৩ মে’ৰ পৰা অপৰিৱৰ্তিত আছে আছে মণিপুৰৰ এই হিংসাত্মক পৰিস্থিতি। এই ধ্বংসলীলাত মণিপুৰত শতাধিক লোকৰ ইতিমধ্যে প্ৰাণহানি হৈছে; গৃহহাৰা হৈ পৰিছে হাজাৰ হাজাৰ লোক।
