মোডী চৰকাৰৰ চাৰে ৯ বছৰ হ’ল। প্ৰধানমন্ত্ৰী হিচাপে এই চাৰে ৯ বছৰত নৰেন্দ্ৰ মোদীয়ে এনে হাজাৰ হাজাৰ সিদ্ধান্ত গ্ৰহণ কৰিছে, যিবোৰক বিৰোধীয়ে সমালোচনা কৰিছে। বিমুদ্ৰাকৰণৰ পৰা আৰম্ভ কৰি কৃষক আইনলৈকে প্ৰাক্তন প্ৰধানমন্ত্ৰী মনমোহন সিঙেও তেওঁক একাধিক বিষয়ত সমালোচনা কৰিছে। কিন্তু এই চাৰে ৯ বছৰৰ পাছত প্ৰথমবাৰৰ বাবে মনোমোহনৰ মুখত শুনা গ’ল মোডী চৰকাৰৰ এটা নীতিৰ প্ৰশংসা।
ৰাছিয়া-ইউক্ৰেইন যুদ্ধত পক্ষ নোলোৱাকৈ ভাৰতে নিজৰ অৰ্থনৈতিক স্বাৰ্থক অগ্ৰাধিকাৰ দিয়াৰ সিদ্ধান্ত লোৱাৰ বিষয়টোক প্ৰশংসা কৰিছে প্ৰাক্তন প্ৰধানমন্ত্ৰীগৰাকীয়ে। মনমোহনে কয় যে ৰাছিয়া-ইউক্ৰেইন যুদ্ধ পৰিস্থিতিত ভাৰতৰ স্থিতি একেবাৰে শুদ্ধ।
লগতে পঢ়ক: দুৰ্নীতিৰ গোচৰত গ্ৰেপ্তাৰ অন্ধ্ৰ প্ৰদেশৰ প্ৰাক্তন মুখ্যমন্ত্ৰী চন্দ্ৰবাবু নাইডু
প্ৰাক্তন প্ৰধানমন্ত্ৰীগৰাকীয়ে কয়, ‘বিশ্বৰ যিকোনো দুটা শক্তিয়ে যেতিয়া ইজনে সিজনৰ বিৰুদ্ধে যুঁজ দিয়ে, তেতিয়া ই আন দেশৰ বাবে এক অতি জটিল পৰিস্থিতিৰ সৃষ্টি কৰে। কাৰ পক্ষ ল’ব সেইটো নিৰ্ণয় কৰাটো অতি কঠিন সিদ্ধান্ত হৈ পৰে। ৰাছিয়া-ইউক্ৰেইন যুদ্ধ পৰিস্থিতিত ভাৰতে নিৰপেক্ষ হৈ আছে, আৰু নিজৰ অৰ্থনৈতিক স্বাৰ্থ অক্ষত ৰখাৰ লগতে শান্তিৰ বাৰ্তাও দিছে, এয়া একেবাৰে সঠিক সিদ্ধান্ত।”
তদুপৰি, দেশত জি-২০ সন্মিলনৰ আয়োজনত সুখী হৈ পৰিছে প্ৰাক্তন প্ৰধানমন্ত্ৰীগৰাকী। তেওঁ কয়, “মই সুখী যে ভাৰতে মোৰ জীৱনকালত এই সন্মিলন আয়োজন কৰাৰ সুযোগ পালে। আমি বিভিন্ন দেশৰ ৰাষ্ট্ৰনেতাসকলক আদৰণি জনোৱাৰ সুযোগ পালোঁ।’
অৱশ্যে তেওঁ সোঁৱৰাই দিয়ে যে এই সুযোগ ভাৰতৰ বাবে প্ৰাপ্যই আছিল। ইয়াত চৰকাৰৰ কোনো অতিৰিক্ত কৃতিত্ব নাই। ইয়াৰ উপৰিও চৰকাৰে বৈদেশিক নীতিক ভোটৰ ৰাজনীতিৰ বাবে ব্যৱহাৰ কৰিবলৈ যিদৰে চেষ্টা কৰিছে তাৰো বিৰোধিতা কৰে প্ৰাক্তন প্ৰধানমন্ত্ৰীগৰাকীয়ে।
লগতে পঢ়ক: দিল্লী বিমানবন্দৰত নামিয়েই নাবালিকাক আলিংগন বাইডেনৰ; কোন এইজনী মায়া?
বৰ্তমান চৰকাৰলৈ তেওঁৰ পৰামৰ্শ, “আমাৰ সময়ছোৱাত ভোটৰ ৰাজনীতিত এনেদৰে বৈদেশিক নীতিৰ ব্যৱহাৰ হোৱা নাছিল। চৰকাৰৰ কূটনৈতিক সফলতা নিশ্চয় এটা ইছ্যু হ’ব পাৰে। কিন্তু বৈদেশিক নীতিক সদায় ভোটৰ ৰাজনীতিৰ সৈতে মিহলি কৰা উচিত নহয়।”
