ফিফা বিশ্বকাপ ২০২৬ ৰ মাজতেই স্পেইনৰ ৰাষ্ট্ৰীয় দলৰ অন্যতম তাৰকা ডিফেণ্ডাৰ মাৰ্ক কুকোৰেয়াই নিজৰ পেছাদাৰী ক্লাব সলনি কৰিছে। সোমবাৰে কেপ ভাৰ্ডেৰ বিৰুদ্ধে স্পেইনৰ প্ৰথমখন মেচ অনুষ্ঠিত হোৱাৰ ঠিক পূৰ্বেই ইংলিছ প্ৰিমিয়াৰ লীগৰ ক্লাব চেলচি এৰি স্পেনিছ তাৰকাগৰাকীয়ে স্পেইনৰ শীৰ্ষ শাৰীৰ ক্লাব ৰিয়েল মাদ্ৰিদৰ সৈতে আনুষ্ঠানিক চুক্তি সম্পন্ন কৰে। এই চুক্তি অনুসৰি কুকোৰেয়াই বিশ্বকাপৰ পাছত লা লিগাত অৱতীৰ্ণ হ’ব। ৰিয়েল মাদ্ৰিদ কৰ্তৃপক্ষই সোমবাৰে আনুষ্ঠানিকভাৱে এই চুক্তিৰ কথা সদৰী কৰিছে।
সাতাইশ বছৰ বয়সীয়া লেফ্ট বেক ডিফেণ্ডাৰ কুকোৰেয়া বৰ্তমান বিশ্বৰ অন্যতম শ্ৰেষ্ঠ লেফ্ট বেক হিচাপে পৰিচিত। ইংলেণ্ডৰ সংবাদ মাধ্যম বিবিচিয়ে প্ৰকাশ কৰা অনুসৰি, ৰিয়েল মাদ্ৰিদৰ সৈতে তেওঁৰ ছবছৰৰ বাবে ছকোটি ইউৰোৰ এক বৃহৎ চুক্তি সম্পন্ন হৈছে, যিটো ভাৰতীয় মুদ্ৰাত প্ৰায় ৬৬০ কোটি টকাৰ সমতুল্য। ২০২২ চনত ব্ৰাইটনৰ পৰা চেলচিত যোগদান কৰা কুকোৰেয়াই শেহতীয়াকৈ চেলচি কৰ্তৃপক্ষৰ কিছুমান সিদ্ধান্তক লৈ অসন্তুষ্ট হৈ আছিল। যাৰ বাবেই তেওঁ ইংলিছ প্ৰিমিয়াৰ লীগ এৰি নিজ দেশৰ ক্লাবৰ সৈতে চুক্তিবদ্ধ হোৱাৰ সিদ্ধান্ত গ্ৰহণ কৰে। উল্লেখযোগ্য যে, প্ৰখ্যাত প্ৰশিক্ষক হোছে ম’ৰিনহোৱে ৰিয়েল মাদ্ৰিদৰ দায়িত্ব গ্ৰহণ কৰাৰ পাছত এয়াই হৈছে ক্লাবটোৰ প্ৰথমটো খেলুৱৈ নিযুক্তি।
ৰিয়েল মাদ্ৰিদৰ সভাপতি ফ্ল’ৰেণ্টিনো পেৰেজৰ নেতৃত্বত ক্লাবটোৱে তেওঁলোকৰ ডিফেঞ্চ অধিক শক্তিশালী কৰাৰ উদ্দেশ্যে আন কেইগৰাকীমান খেলুৱৈকো চুক্তিবদ্ধ কৰাৰ পৰিকল্পনা কৰিছে। ইয়াৰ ভিতৰত লিভাৰপুলৰ চেণ্টাৰ বেক ইব্ৰাহিমা কোনাটে আৰু ইণ্টাৰ মিলানৰ ৰাইট বেক ডেনজেল ডামফ্ৰিজৰ নাম বিশেষভাৱে চৰ্চাত আছে। আনহাতে, বৰ্তমান আমেৰিকা যুক্তৰাষ্ট্ৰ, কানাডা আৰু মেক্সিকোত যুটীয়াভাৱে অনুষ্ঠিত হৈ থকা আৰু ৪৮ খন দেশৰ অংশগ্ৰহণৰে চলিত এই ফিফা বিশ্বকাপৰ যোৱা ১১ জুনত মেক্সিকো আৰু দক্ষিণ আফ্ৰিকাৰ মাজৰ মেচখনেৰে শুভাৰম্ভণি ঘটিছিল। অহা ১৯ জুলাইলৈকে এই প্ৰতিযোগিতাখন চলিব বুলি ফিফাই জানিবলৈ দিছে।
বৰ্তমান কুকোৰেয়াই স্পেইনৰ ৰাষ্ট্ৰীয় দলৰ সৈতে বিশ্বকাপৰ মেচসমূহৰ বাবে প্ৰস্তুতি চলাই আছে। চলিত বিশ্বকাপৰ যাত্ৰা সমাপ্ত হোৱাৰ পাছতহে তেওঁ আনুষ্ঠানিকভাৱে ৰিয়েল মাদ্ৰিদৰ শিবিৰত যোগদান কৰিব আৰু স্পেনিছ লা লিগাত নিজৰ নতুন ফুটবল যাত্ৰা আৰম্ভ কৰিব।
