অসম অলিম্পিক সন্থাৰ সভাপতি হিচাপে মুখ্য মন্ত্ৰী সৰ্বানন্দ সোণোৱাল আৰু সাধাৰণ সম্পাদক পদত অসম চৰকাৰৰ ক্ৰীড়া আৰু যুৱ কল্যাণ উপদেষ্টা সমিতিৰ সদস্য সচিব, যুৱ নেতা তথা মাৰ্ঘেৰিটাৰ সন্তান লক্ষ্য কোঁৱৰ নিৰ্বাচিত হোৱাত মাৰ্ঘেৰিটা জিলা ক্ৰীড়া সন্থাৰ তৰফৰ পৰা দুয়োজনলৈ আন্তৰিক শুভেচ্ছা জ্ঞাপন কৰে।
মুখ্য মন্ত্ৰী সোণোৱাল আৰু লক্ষ্য কোঁৱৰৰ নেতৃত্বত অসমৰ ক্ৰীড়া ক্ষেত্ৰখনত এটা নতুন যুগৰ সূচনা হোৱাৰ লগতে ৰাজ্যৰ ক্ৰীড়াৰ দিশটোৰ আন্তঃগাঁথনি উন্নত তথা শক্তিশালী হ’ব বুলি প্ৰেছ বাৰ্তাৰ জৰিয়তে আশা কৰিছে মাৰ্ঘেৰিটা জিলা ক্ৰীড়া সন্থাৰ সভাপতি তথা বিধায়ক ভাস্কৰ শৰ্মা আৰু সাধাৰণ সম্পাদক সত্যৰঞ্জন বৰকাকতীয়ে।
লগতে, এই দুই সুযোগ্য যুৱ নেতা, ক্ৰীড়া সংগঠকৰ নেতৃত্বত ৰাজ্যখনত নৱ প্ৰজন্মৰ বাবে ক্ৰীড়াৰ সুস্থ বাতাবৰণ সৃষ্টিৰে এক নব্য ক্ৰীড়া বিপ্লৱৰ সূচনা কৰাত অসম অলিম্পিক সন্থাই বাটকটীয়াৰ ৰূপত অৱতীৰ্ণ হ’বলৈ সক্ষম হ’ব বুলিও আশা কৰে।
মাৰ্ঘেৰিটাৰ মাকুমকিল্লা গাঁৱৰ সন্তান লক্ষ্য কোঁৱৰে নিজ দক্ষতাৰ বাবেই অসম চৰকাৰৰ ক্ৰীড়া আৰু যুৱ কল্যাণ উপদেষ্টা সমিতিৰ সদস্য সচিব পদৰ লগতে অসম অলিম্পিক সন্থাৰ সাধাৰণ সম্পাদক হিচাপে মনোনীত হোৱাত তিনিচুকীয়া জিলা সাংবাদিক সন্থাৰ সাধাৰণ সম্পাদক ৰাণাজ্যোতি নেওগে শুভেচ্ছা জ্ঞাপন কৰাৰ লগতে ৰাজনীতিৰ উৰ্ধ্বত থাকি কোঁৱৰক ক্ৰীড়া ক্ষেত্ৰ খনক অধিক উজ্বীৱিত কৰি তুলিবলৈ আহ্বান জনায়।
মাৰ্ঘেৰিটা সাংবাদিক সংস্থাৰ হৈ মুখপাত্ৰ মানস প্ৰতিম গগৈ, লিডু শাখা সাহিত্য সভা আদিকে ধৰি বিভিন্ন দল-সংগঠন ব্যক্তিয়ে কোঁৱৰৰ লগতে অসম অলিম্পিক সন্থাৰ সভাপতি তথা মুখ্য মন্ত্ৰী সৰ্বানন্দ সোণোৱাল আৰু আন বিষয়ববীয়া সকলক শুভেচ্ছা জ্ঞাপন কৰে।