দেশৰ শিক্ষাব্যৱস্থাৰ পুতৌলগা অৱস্থাক লৈ এইবাৰ প্ৰতিবাদত ফাটি পৰিছে ফ্ৰান্সৰ বিদ্যালয়ৰ ছাত্ৰ-ছাত্ৰীসকল। শিক্ষাব্যৱস্থাৰ চৰম দুৰৱস্থাৰ বিৰুদ্ধে ৰাজপথলৈ ওলাই আহিছে দেশখনৰ হাজাৰ হাজাৰ শিক্ষাৰ্থী। যোৱা কেইমাহমানৰ ভিতৰতে দেশৰ অন্যতম বৃহৎ ছাত্ৰ আন্দোলনৰ সন্মুখীন হৈছে ফ্ৰান্স চৰকাৰ। ৰাজপথ অৱৰোধ কৰাৰ লগতে শতাধিক বিদ্যালয় বন্ধ কৰি ছাত্ৰ-ছাত্ৰীসকল এই প্ৰতিবাদত চামিল হৈছে। প্ৰতিবাদকাৰী আৰু আৰক্ষীৰ মাজত হোৱা কেইবালানিও সংঘৰ্ষৰ পিছত আৰক্ষীয়ে শতাধিক প্ৰতিবাদকাৰীক আটক কৰিছে।
সংবাদ মাধ্যমৰ খবৰ অনুসৰি, প্ৰথমতে ফ্ৰান্সৰ কেইখনমান চহৰত বিদ্যালয় বন্ধ কৰি এই আন্দোলনৰ সূত্ৰপাত হৈছিল। ইয়াৰ পিছতে আন্দোলনৰ উত্তাপ ক্ৰমান্বয়ে বৃদ্ধি পাবলৈ ধৰে। কেইবাখনো চহৰত আৰক্ষীৰ সৈতে সংঘৰ্ষ আৰু অগ্নিসংযোগৰ দৰে ঘটনাও সংঘটিত হয়। আগতীয়া প্ৰস্তুতি নথকাৰ বাবে এই বিক্ষোভে ফৰাচী প্ৰশাসনক অপ্ৰস্তুত অৱস্থাত পেলাইছে। প্ৰশাসনে ছাত্ৰ-ছাত্ৰীসকলৰ উদ্বেগক মান্যতা দিলেও তেওঁলোকৰ হিংসাত্মক আন্দোলন আৰু বিশৃংখলতাক তীব্ৰ নিন্দা কৰিছে।
এই আন্দোলনৰ মূলতে আছে ফৰাচী চৰকাৰী শিক্ষা ব্যৱস্থাৰ প্ৰতি বছৰ বছৰ ধৰি চলা চৰকাৰী অৱহেলা আৰু ইয়াৰ বিৰুদ্ধে শিক্ষাৰ্থীসকলৰ তীব্ৰ ক্ষোভ। ছাত্ৰ-ছাত্ৰীসকলৰ অভিযোগ অনুসৰি, বিদ্যালয়ৰ একোটা শ্ৰেণীকোঠাত শিক্ষক আৰু শিক্ষাৰ্থীৰ অতিৰিক্ত হেঁচা, বিদ্যালয় ভৱনৰ জৰাজীৰ্ণ অৱস্থা, কৰ্মচাৰীৰ সংকট আৰু শিক্ষকৰ অনুপস্থিতিয়ে ব্যাপক সমস্যাৰ সৃষ্টি কৰিছে। ইয়াৰ সমান্তৰালকৈ শিক্ষকৰ কম দৰমহা, সামাজিক বৈষম্য আৰু বিশ্ববিদ্যালয়সমূহত নামভৰ্তি প্ৰক্ৰিয়াৰ জটিলতা তথা অস্বচ্ছতাক লৈয়ো চৰম ক্ষোভৰ সৃষ্টি হৈছে। আনকি গৰমৰ দিনত তীব্ৰ তাপপ্ৰৱাহৰ মাজত পঢ়াশুনাৰ বাবে উপযুক্ত পৰিৱেশ নথকাৰ বাবেও সমস্যা গুৰুতৰ হৈ পৰিছে।
শুক্ৰবাৰে ছাত্ৰ-ছাত্ৰীসকলৰ এই আন্দোলনে অধিক তীব্ৰতৰ ৰূপ ধাৰণ কৰে। ৰাজধানী পেৰিছৰ পৰা আৰম্ভ কৰি লিঅঁ, ষ্ট্ৰাছবাৰ্গ আৰু মঁপেলিয়েৰ দৰে ডাঙৰ চহৰসমূহত শতাধিক হাইস্কুল সম্পূৰ্ণৰূপে বন্ধ কৰি দিয়া হয়। বিদ্যালয়ৰ মূল তোৰণসমূহত বেৰিকেড দি অৱৰোধ কৰা হয়। পেৰিছৰ বিখ্যাত লিচে ভলটেয়াৰকে ধৰি একাধিক প্ৰতিষ্ঠানৰ বাহিৰত ইয়াৰ বাবে আৰক্ষী মোতায়েন কৰা হৈছে।
আন্দোলনৰ সময়ছোৱাত অধিকাংশ এলেকাত পৰিস্থিতি শান্তিপূৰ্ণ আছিল যদিও কিছুমান ঠাইত ই হিংসাত্মক ৰূপ লয়। শুক্ৰবাৰে পেৰিছৰ দুখন বিদ্যালয়ৰ মূল তোৰণত জুই লগাই দিয়াৰ ঘটনা পোহৰলৈ আহে। কেইবাখনো ঠাইত প্ৰতিবাদকাৰীয়ে ডাষ্টবিনত জুই লগোৱাৰ লগতে ফটকা ফুটায়। আন্দোলনকাৰীসকলক ছত্ৰভংগ দিয়াবলৈ আৰক্ষীয়ে কন্দুৱা গেছ নিক্ষেপ কৰিবলগীয়া হয়। আনহাতে, ছাত্ৰ-ছাত্ৰী আৰু তেওঁলোকৰ সমৰ্থকসকলে আৰক্ষীৰ বিৰুদ্ধে অতিৰিক্ত বলপ্ৰয়োগৰ অভিযোগ উত্থাপন কৰিছে। চৰকাৰৰ তৰফৰ পৰা ইয়াক চহৰীয়া হিংসা হিচাপে অভিহিত কৰি কটাক্ষ কৰা হৈছে আৰু আন্দোলনৰ এই ৰূপক কঠোৰ ভাষাৰে নিন্দা কৰিছে। অৱশ্যে একে সময়তে প্ৰশাসনে শিক্ষাৰ্থীসকলৰ ক্ষোভৰ কথাও স্বীকাৰ কৰি লৈছে। হঠাতে বিয়পি পৰা এই ব্যাপক ছাত্ৰ বিক্ষোভে বৰ্তমান ফৰাচী প্ৰশাসনক একপ্ৰকাৰ সংকটত কৰি পেলাইছে। পৰিস্থিতি নিয়ন্ত্ৰণলৈ আনিবলৈ নিৰাপত্তা ব্যৱস্থা অধিক কটকটীয়া কৰা হৈছে।
