সাম্প্ৰতিক সময়ত বহু সাধাৰণ ৰোগীয়ে হাস্পাতললৈ বা চিকিৎসকৰ ওচৰলৈ যাবলৈ ভয় কৰাৰ অন্যতম কাৰণ হৈছে খৰচৰ শংকা। তাতেই কৰ’না সংকটৰ মাজত বেচৰকাৰী হাস্পাতলৰ বিয়াগোম বিলৰ কথাটো নকলেও চলে।
সাধাৰণ লোকৰ বাবে বেমাৰত পৰাটো ডাঙৰ চিন্তাৰ কাৰণ হৈ পৰিছে। দেশৰ সকলোতে এইখন এখন সাধাৰণ ছবি।
ইয়াৰ মাজতো চিকিৎসকৰ বৃত্তিতো যে মানৱতা হেৰাই যোৱা নাই সেয়া প্ৰমান কৰিছে অন্ধ্ৰপ্ৰদেশৰ এইগৰাকী যুৱতী চিকিৎসকে।
অন্ধ্ৰ প্ৰদেশৰ কাড়াপ্পা জিলাৰ এখন বেচৰকাৰী মেডিকেল কলেজৰ পৰা চিকিৎসা শাস্ত্ৰৰ ডিগ্ৰী গ্ৰহণ কৰে ডাঃ নুৰী পাৰভিনে। তেতিয়াই তেওঁ ঠিক কৰিছিল যে তেওঁৰ লক্ষ্য কেবল টকা নহয়, সকলোকে চিকিৎসাৰ সুবিধা প্ৰদান কৰাহে।
কোনোৱে যাতে চিকিৎসাৰ পৰা বিমুখ হ’বলগীয়া নহয় তাৰ বাবে তেওঁ গ্ৰহণ কৰিছে চিকিৎসা বৃত্তি।দুখীয়া লোকসকল যাতে সমস্যাত পৰিবলগীয়া নহয় তাৰ বাবে মাত্ৰ ১০ টকাৰ বিনিময়তে নুৰীয়ে আগবঢ়াই আহিছে চিকিৎসা সেৱা।
কাড়াপ্পাৰ দুখীয়া লোকৰ বসতি অঞ্চলতে তেওঁ খুলি লৈছে এখন নিজৰ ক্লিনিক। যিসকলে টকাৰ অভাৱত চিকিৎসকৰ ওচৰলৈ যাব নিবিচাৰে তেওঁলোকে যেন তেওঁৰ কাষলৈ আহিব পাৰে সেয়া পাৰভিনে নিশ্চিত কৰে।
বিজয়ৱাড়াৰ কন্যা পাৰভিনে সেই ভিতৰুৱা অঞ্চলত ক্লিনিক খোলাৰ কথা পিতৃ-মাতৃক জনাই দিয়ে। তেওঁলোকে কন্যাৰ এনে সিদ্ধান্তৰ বিৰোধিতা নকৰি এনে মানৱতাৰ সেৱাৰ প্ৰয়াসৰ বাবে আশীৰ্বাদ কৰে।
দহটকীয়া চিকিৎসকগৰাকীৰ ভাষাৰে,’’আচলতে মই সৰুৰে পৰা এইদৰে ডাঙৰ হৈছো। মা-দেউতাক বহু সমাজসেৱামূলক কাম কৰা দেখিছো। আনকি, তিনিজন অনাথক আশ্ৰয় দি তেওঁলোকৰ পঢ়াশুনাৰ দায়িত্বও লৈছিল। তেওঁলোকৰ পৰাই মানুহৰ সেৱা কৰাৰ এই অনুপ্ৰেৰণা লাভ কৰিছো।‘’
ডাঃ নুৰী পাৰভিনৰ তাত ১০ টকাত ৰোগী চোৱাৰ উপৰি ৫০টকাত তেওঁৰ ক্লিনিকত বেডতো থাকিব পোৱা যায়। সেয়াই নহয়, ক্লিনিক খোলাৰ পূৰ্বে পাৰভিনে দুটাকৈ স্বেচ্ছাসেৱী সংস্থাও গঢ়ি তুলিছে। তাত যুৱ প্ৰজন্মক সুস্থ কৰি ৰখাৰ বিভিন্ন ব্যৱস্থা কৰা হৈছে।
ডাঃ পাৰভিনৰ এনে প্ৰচেষ্টাই সকলোৰে প্ৰশংসা বুটলিছে। ভৱিষ্যতে আৰু জন কল্যাণৰ কামত আত্মনিয়োগ কৰাৰ পৰিকল্পনা আছে এই মনৱদৰদী চিকিৎসকগৰাকীৰ।