গুজৰাটৰ মেহছানাৰ সমীপৱৰ্তী নুগাৰ গাঁৱত এক অতি মৰ্মান্তিক ঘটনা সংঘটিত হৈছে। গাঁৱৰ পুখুৰীত ডুব গৈ এটা পৰিয়ালে হেৰুৱালে তেওঁলোকৰ ২৪ বছৰীয়া সন্তান শচীন ৰাৱলক। আটাইতকৈ দুখজনক কথাটো হ’ল, মাত্ৰ তিনি মাহ পূৰ্বে শচীনৰ আন এগৰাকী ভাতৃৰো একেটা পুখুৰীতে ডুব গৈ মৃত্যু হৈছিল।
জানিব পৰা মতে, শচীনে শৌচ কৰিবলৈ পুখুৰীৰ পাৰলৈ গৈছিল। তেনে সময়তে হঠাৎ ভৰি পিচলি তেওঁ দ-পানীত সোমাই পৰে। খবৰ পোৱাৰ লগে লগে স্থানীয় অগ্নিনিৰ্বাপক বাহিনী আৰু উদ্ধাৰকাৰী দল ঘটনাস্থলীত উপস্থিত হৈ বহু সময় ধৰি অভিযান চলোৱাৰ অন্তত শচীনৰ মৃতদেহ উদ্ধাৰ কৰিবলৈ সক্ষম হয়। পুখুৰীটোৰ গভীৰতা যথেষ্ট বেছি হোৱাৰ বাবে উপস্থিত ৰাইজ বা উদ্ধাৰকাৰী দলে তেওঁক জীৱন্তে উদ্ধাৰ কৰিব নোৱাৰিলে।
শচীনে পুৱা মোটাপস্থিত নিজৰ কৰ্মক্ষেত্ৰলৈ গৈছিল আৰু দৰমহা পোৱাৰ পাছত বেংকৰ পাছবুকখন নিবলৈ খন্তেকৰ বাবে ঘৰলৈ উভতি আহিছিল। ইয়াৰ পাছতেই তেওঁ গাঁৱৰ পুখুৰীটোৰ দিশে গৈছিল, য’ত এই শোকাবহ ঘটনাটো সংঘটিত হয়।
মাত্ৰ তিনি মাহৰ ব্যৱধানত একেটা পুখুৰীতে দুই পুত্ৰক হেৰুৱাই পৰিয়ালটো এতিয়া দিশহাৰা হৈ পৰিছে। ইয়াৰ পূৰ্বে তেওঁলোকৰ আনজন পুত্ৰই পুখুৰীটোত গা ধুবলৈ গৈ সলিল সমাধি ঘটিছিল। ইয়াৰোপৰি, পৰিয়ালটোৱে পূৰ্বেই পিতৃকো হেৰুৱাইছিল। বৰ্তমান পৰিয়ালটোত কেৱল মাতৃ আৰু আন এজন সৰু পুত্ৰহে জীৱিত আছে। একেখন গাঁৱৰে দুজনকৈ যুৱকৰ এনেদৰে মৃত্যু হোৱাত সমগ্ৰ নুগাৰ গাঁৱত এক শোকৰ ছাঁ পৰিছে।
