কেৰালাৰ মাল্লাপুৰমত গৰ্ভৱতী হাতী এজনীক বৰ্বৰভাৱে হত্যা কৰাৰ পাছতো কোনোধৰণৰ পদক্ষেপ গ্ৰহণ নকৰাকলৈ বিজেপিৰ জেষ্ঠ নেত্ৰী তথা পশু অধিকাৰ কৰ্মী মেনকা গান্ধীয়ে কেৰালা চৰকাৰক তীব্ৰ সমালোচনা কৰিছে।
২ জুনত মাল্লাপুৰম জিলাৰ এগৰাকী বন বিষয়াই ছ’চিয়েল মিডিয়াযোগে সমগ্ৰ ঘটনা উল্লেখ কৰাত সেই বৰ্বৰ ঘটনা পোহৰলৈ আহিছিল।
বনবিষয়া গৰাকীয়ে গৰ্ভৱতী হাতীজনীয়ে খাদ্যৰ সন্ধানত বনৰ মাজৰ পৰা ওলাই আহিছিল বুলি উল্লেখ কৰে। তেওঁ লগতে গাঁওবাসীয়ে ভোকাতুৰ হাতীজনীক ফটকা ভৰ্তি আনাৰস খাব দিয়াৰ ফলত হাতীজনী গুৰুতৰভাৱে আঘাতপ্ৰাপ্ত হৈ এটা নদীলৈ গৈ মৃত্যুক আকোৱালি লয় বুলিও কয়।
এই সমগ্ৰ বৰ্বৰ ঘটনাৰ পাছতো কেৰালা চৰকাৰে এতিয়ালৈ কোনোধৰণৰ ব্যৱস্থা গ্ৰহণ নকৰাৰ বাবে বিজেপি নেত্ৰী মেনকা গান্ধীয়ে কেৰালা চৰকাৰক চোকা সমালোচনা কৰে।
মেনকা গান্ধীয়ে কেৰালাৰ মাল্লাপুৰমক ভাৰতৰ আটাইতকৈ হিংসাজৰ্জৰ জিলা বুলি উল্লেখ কৰি জিলাখনত প্ৰতি তিনি দিনৰ অন্তত এটাকৈ হাতী হত্যা কৰা হয় বুলি মন্তব্য কৰে।
‘‘এয়া হত্যা, মাল্লাপুৰম এনেধৰণৰ কাণ্ডৰ বাবে বিখ্যাত, ই ভাৰতৰ আটাইতকৈ হিংসাত্মক জিলা। মাল্লাপুৰমৰ বাসিন্দাই পথত বিষ ছটিয়াই দিয়ে আৰু ইয়াৰ ফলত এবাৰত ৩০০-৪০০ চৰাই আৰু কুকুৰৰ মৃত্যু হয়,’’ পশু অধিকাৰ কৰ্মী গান্ধীয়ে লগতে কয়।
‘‘কেৰালা চৰকাৰে মাল্লাপুৰম ঘটনাৰ বিৰুদ্ধে কোনো ব্যৱস্থা গ্ৰহণ নকৰিলে, এনে লাগিছে তেওঁলোকে ভয় খাইছে। কেৰালাত প্ৰতি তিনি দিনৰ অন্তৰে অন্তৰে এটাকৈ হাতী হত্যা কৰা হয়। ভাৰতত ২০,০০০ কৈ কম হাতী আছে আৰু ইয়াৰ সংখ্যা দ্ৰুতভাৱে হ্ৰাস পাই আহিছে,’’ মেনকা গান্ধীয়ে লগতে কয়।
মেনকা গান্ধীয়ে এই সন্দৰ্ভত ৰাহুল গান্ধীকো সমালোচনা কৰি ৰাজ্যখনৰ বন সচিৱ গৰাকীৰ পদত্যাগ দাবী কৰে।
