বতাহত হালি থকাৰ বাবে নিৰাপত্তাজনিত কাৰণত কলকাতাৰ বুকুত স্থাপন কৰা আৰ্জেণ্টিনাৰ কিংবদন্তি ফুটবলাৰ লিঅ’নেল মেছিৰ ৭০ ফুট ওখ বিশাল প্ৰতিমূৰ্তিটো আঁতৰাই পেলোৱাৰ সিদ্ধান্ত গ্ৰহণ কৰা হৈছে। সোমবাৰে স্থানীয় ৰাইজৰ অভিযোগৰ ভিত্তিত গড়কাপ্তানি বিভাগৰ (PWD) এটা দলে পৰিদৰ্শন কৰাৰ পিছতেই এই সিদ্ধান্ত লোৱা হয়। ইএছপিএনৰ এক প্ৰতিবেদন অনুসৰি, বতাহত প্ৰতিমূৰ্তিটো অস্থিৰ হৈ পৰা পৰিলক্ষিত হোৱাৰ পিছত বিশেষজ্ঞৰ দলে ইয়াৰ গাঁথনিগত দুৰ্বলতা ধৰা পেলায় আৰু কোনো সম্ভাৱ্য দুৰ্ঘটনা বা অঘটনৰ পূৰ্বেই ইয়াক স্থানান্তৰ কৰাটো জৰুৰী বুলি মত প্ৰকাশ কৰে।
যোৱা বছৰৰ ডিচেম্বৰ মাহত ফিফা বিশ্বকাপ জয়ী তাৰকাগৰাকীৰ ভাৰতৰ ‘গোট ট্যুৰ’ (GOAT Tour)ৰ পূৰ্বে তেওঁৰ অনুৰাগীসকলে এই প্ৰতিমূৰ্তিটো নিৰ্মাণ কৰিছিল। মাত্ৰ ২৭ দিনৰ ভিতৰত নিৰ্মাণ কৰি উলিওৱা এই প্ৰতিমূৰ্তিটোত মেছিয়ে ২০২২ চনৰ ফিফা বিশ্বকাপৰ ট্ৰফী হাতত লৈ থকাৰ দৃশ্য উপস্থাপন কৰা হৈছিল। এই সন্দৰ্ভত পশ্চিমবংগৰ বিধায়ক শৰদ্বত মুখাৰ্জীয়ে সংবাদ মাধ্যমৰ আগত উদ্বেগ প্ৰকাশ কৰি কয় যে আৰ্জেণ্টিনাৰ কিংবদন্তি ফুটবলাৰগৰাকীৰ এই প্ৰতিমূৰ্তিটো নিৰাপদ অৱস্থাত নাই আৰু বতাহত ই হালি থকাটো সকলোৰে দৃষ্টিগোচৰ হৈছে। সম্প্ৰতি কৰ্তৃপক্ষই ইয়াক পুনৰ নিৰাপদভাৱে স্থাপন কৰিবলৈ বিকল্প স্থানৰ সন্ধান অব্যাহত ৰাখিছে।
উল্লেখযোগ্য যে যোৱা বছৰ মেছিয়ে তেওঁৰ ইণ্টাৰ মিয়ামিৰ সতীৰ্থ লুইছ সুৱাৰেজ আৰু ৰড্ৰিগো ডি পলৰ সৈতে পশ্চিমবংগ, হায়দৰাবাদ, মুম্বাই আৰু দিল্লী ভ্ৰমণ কৰিছিল। কিন্তু তেওঁৰ এই ভ্ৰমণৰ পিছৰে পৰা বিতৰ্কই লগ এৰা নাই। মাত্ৰ এসপ্তাহ পূৰ্বে মেছিৰ ভাৰত ভ্ৰমণৰ মুখ্য আয়োজক শতদ্ৰু দত্তই পশ্চিমবংগৰ প্ৰাক্তন ক্ৰীড়ামন্ত্ৰী অৰূপ বিশ্বাসৰ বিৰুদ্ধে অসদাচৰণ আৰু মেছিৰ অনুষ্ঠানৰ টিকটৰ অপব্যৱহাৰৰ অভিযোগ তুলি এখন এজাহাৰ দাখিল কৰিছিল। আয়োজকগৰাকীয়ে প্ৰৱেশ পত্ৰ প্ৰদানক লৈ প্ৰাক্তন মন্ত্ৰীগৰাকীৰ পৰা তীব্ৰ হেঁচাৰ সন্মুখীন হোৱা বুলিও অভিযোগ উত্থাপন কৰিছিল।
ইয়াৰ পূৰ্বেও কলকাতাৰ চল্ট লেক ষ্টেডিয়ামত অনুষ্ঠিত মেছিৰ অনুষ্ঠানত তীব্ৰ উত্তেজনাময় পৰিস্থিতিৰ সৃষ্টি হৈছিল। উচ্চ মূল্যৰ টিকট ক্ৰয় কৰিও অনুষ্ঠানৰ মাজভাগতে মেছিয়ে স্থান ত্যাগ কৰাত ক্ষুব্ধ অনুৰাগীসকলে পানীৰ বটল দলিয়াবলৈ আৰম্ভ কৰিছিল। ভিআইপি আৰু ৰাজনীতিবিদসকলে মেছিক লগ পোৱাৰ সুযোগ একচেটিয়াভাৱে দখল কৰাৰ অভিযোগ তুলি একাংশ দৰ্শকে ষ্টেডিয়ামৰ ভিতৰত ব্যাপক ধ্বংসলীলা চলায়। পৰিস্থিতি ইমানেই ভয়ংকৰ হৈ পৰিছিল যে একাংশ অনুৰাগীয়ে নিষিদ্ধ এলেকাত প্ৰৱেশ কৰি তম্বু আৰু গ’লপ’ষ্টৰ বিস্তৰ ক্ষতিসাধন কৰে। পৰৱৰ্তী সময়ত আৰক্ষীয়ে লঘু বল প্ৰয়োগ কৰি পৰিস্থিতি নিয়ন্ত্ৰণলৈ আনিবলগীয়া হৈছিল।
