মধ্য মেক্সিকোৰ ছালামংকা চহৰৰ এখন ফুটবল খেলপথাৰত দেওবাৰে এক ভয়াৱহ গুলীচালনাৰ ঘটনা সংঘটিত হয়। কোনো উচতনি নোহোৱাকৈ বন্দুকধাৰীয়ে চলোৱা এই আক্ৰমণত কমেও ১১ জন লোক নিহত হোৱাৰ লগতে ১২ জন গুৰুতৰভাৱে আহত হৈছে। এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।
ছালামংকাৰ মেয়ৰ চেজাৰ প্ৰিয়েটোৱে ছ’চিয়েল মিডিয়াযোগে জনোৱা মতে, এখন ফুটবল মেচ প্ৰায় শেষ হোৱাৰ পথত থকাৰ সময়তে হঠাতে এদল বন্দুকধাৰী খেলপথাৰত উপস্থিত হয়। তেওঁলোকে তাত থকা লোকসকলৰ ওপৰত নিৰ্বিচাৰভাৱে গুলীচালনা আৰম্ভ কৰে। আক্ৰমণৰ ফলত থিতাতে ১০ জন লোকৰ মৃত্যু হয় আৰু চিকিৎসালয়ত চিকিৎসাধীন অৱস্থাত আন এজনৰ মৃত্যু ঘটে। আহতসকলৰ ভিতৰত এগৰাকী মহিলা আৰু এজন নাবালকো থকা বুলি জানিব পৰা গৈছে।
গুৱানাজুৱাটো (Guanajuato) ৰাজ্যৰ অন্তৰ্গত এই অঞ্চলটো দীৰ্ঘদিন ধৰি গেং ৱাৰৰ বাবে কুখ্যাত। উল্লেখ্য যে যোৱা বছৰো মেক্সিকোৰ ভিতৰত গুৱানাজুৱাটোতেই সৰ্বাধিক হত্যাকাণ্ডৰ ঘটনা সংঘটিত হৈছিল। স্থানীয় অপৰাধী গোট ‘ছাণ্টা ৰোজা ডি লিমা’ আৰু শক্তিশালী ‘জালিস্কো নিউ জেনেৰেচন কাৰ্টেল’ৰ মাজত চলি থকা ৰক্তক্ষয়ী সংঘৰ্ষৰ বাবে এনে হিংসাত্মক পৰিস্থিতিৰ সৃষ্টি হোৱা বুলি ধাৰণা কৰা হৈছে।
মেয়ৰ প্ৰিয়েটোৱে এই ঘটনাক চহৰখনত চলি থকা নিৰ্বিচাৰ অপৰাধৰ এক অংশ বুলি অভিহিত কৰিছে। তেওঁ কয়, “দুৰ্ভাগ্যজনকভাৱে কিছুমান অপৰাধী গোটে কৰ্তৃপক্ষক বশ কৰিবলৈ চেষ্টা কৰি আছে, কিন্তু তেওঁলোকে সফল হ’ব নোৱাৰিব।”
হিংসা নিয়ন্ত্ৰণৰ বাবে মেয়ৰগৰাকীয়ে মেক্সিকোৰ ৰাষ্ট্ৰপতি ক্লাউডিয়া শ্বেইনবামৰ জৰুৰী হস্তক্ষেপ আৰু সহায়ৰ বাবে আবেদন জনাইছে। বৰ্তমান ৰাজ্যিক প্ৰচিকিউটৰ অফিচে ফেডাৰেল কৰ্তৃপক্ষৰ সৈতে মিলি সমগ্ৰ ঘটনাৰ তদন্ত আৰম্ভ কৰিছে আৰু অঞ্চলটোৰ নিৰাপত্তা ব্যৱস্থা কটকটীয়া কৰি তুলিছে।
চৰকাৰী পৰিসংখ্যা অনুসৰি, ২০২৫ চনত মেক্সিকোত হত্যাৰ হাৰ ২০১৬ চনৰ পিছত সৰ্বনিম্ন (প্ৰতি এক লাখ বাসিন্দাৰ বিপৰীতে ১৭.৫ টা হত্যাকাণ্ড) বুলি দাবী কৰা হৈছে। অৱশ্যে, শেহতীয়া এই ঘটনাই প্ৰমাণ কৰিছে যে দেশখনৰ অপৰাধী চক্ৰসমূহ এতিয়াও সক্ৰিয় হৈ আছে। বিশেষজ্ঞসকলে মত প্ৰকাশ কৰিছে যে চৰকাৰী সংখ্যাই দেশখনৰ প্ৰকৃত হিংসাত্মক পৰিস্থিতিক সম্পূৰ্ণৰূপে প্ৰতিফলিত নকৰিবও পাৰে।
