মধ্যপ্ৰাচ্যত তীব্ৰতৰ হৈ উঠা সংঘাতৰ প্ৰভাৱ এতিয়া ভাৰতৰ ঘৰুৱা বজাৰতো স্পষ্ট হৈ পৰিছে। ইয়াৰ এক জ্বলন্ত উদাহৰণ হিচাপে, বাণিজ্যিক ৰন্ধন গেছৰ তীব্ৰ নাটনিৰ বাবে আজি অৰ্থাৎ ১০ মাৰ্চৰ পৰা ৰেষ্টুৰেণ্টসমূহ পৰিচালনা কৰিবলৈ অক্ষম হ‘ব বুলি বেংগালুৰু হোটেল সন্থাই ঘোষণা কৰিছে। যোৱা ২৮ ফেব্ৰুৱাৰীৰ পৰা আমেৰিকা যুক্তৰাষ্ট্ৰ, ইজৰাইল আৰু ইৰাণৰ মাজত আৰম্ভ হোৱা আক্ৰমণ-প্ৰত্যাক্ৰমণৰ ফলত বিশ্বজুৰি শক্তিৰ বজাৰ আৰু ইন্ধন যোগান শৃংখলা বেয়াকৈ ব্যাহত হৈছে। এই যুদ্ধৰ ফলত হৰমুজ প্ৰণালীৰে (Strait of Hormuz) জাহাজ চলাচল বন্ধ হৈ পৰিছে, যিটো পথেৰে ভাৰতলৈ প্ৰায় ৮৫-৯০ শতাংশ এল পি জি (LPG) আৰু ৪০-৫০ শতাংশ খাৰুৱা তেল আমদানি কৰা হয়। ফলস্বৰূপে, ভাৰতৰ দৰে বৃহৎ অৰ্থনীতিও ইয়াৰ প্ৰভাৱৰ পৰা মুক্ত হৈ থাকিব পৰা নাই।
বজাৰত হ’ব পৰা এনে সাম্ভাৱ্য সংকট, কৃত্ৰিম নাটনি আৰু অবৈধ মজুতকৰণ ৰোধ কৰিবলৈ কেন্দ্ৰীয় চৰকাৰে ইতিমধ্যে তৎকালীন পদক্ষেপ গ্ৰহণ কৰিছে। ইয়াৰ অংশ হিচাপে ঘৰুৱা ৰন্ধন গেছ বুকিঙৰ ন্যূনতম ব্যৱধান পূৰ্বৰ ২১ দিনৰ পৰিৱৰ্তে ২৫ দিন নিৰ্ধাৰণ কৰা হৈছে। অৱশ্যে চৰকাৰী সূত্ৰই জনোৱা মতে, সাধাৰণ ৰাইজ আতংকিত হোৱাৰ কোনো কাৰণ নাই, কিয়নো পৰৱৰ্তী ৬-৮ সপ্তাহৰ বাবে প্ৰয়োজনীয় খাৰুৱা তেল আৰু ইন্ধনৰ পৰ্যাপ্ত মজুত দেশত উপলব্ধ আছে। তদুপৰি, ৰন্ধন গেছৰ যোগান নিয়মীয়া কৰি ৰাখিবলৈ দেশৰ শোধনাগাৰসমূহক পেট্ৰ’কেমিকেল উৎপাদনৰ সলনি সৰ্বোচ্চ পৰিমাণৰ এল পি জি উৎপাদন কৰিবলৈ চৰকাৰে কঠোৰ নিৰ্দেশ দিছে।
ইফালে, যুদ্ধৰ প্ৰভাৱত আন্তঃৰাষ্ট্ৰীয় বজাৰত খাৰুৱা তেলৰ দৰ প্ৰতি বেৰেলত ১০০ ডলাৰ অতিক্ৰম কৰি সাময়িকভাৱে ১২০ ডলাৰৰ কাষ পালেও, ভাৰতত বৰ্তমান পেট্ৰ‘ল আৰু ডিজেলৰ মূল্য বৃদ্ধিৰ কোনো তাৎক্ষণিক পৰিকল্পনা নাই বুলি চৰকাৰে স্পষ্ট কৰি দিছে। চৰকাৰী সূত্ৰই প্ৰকাশ কৰা মতে, বৰ্তমানৰ এই বৰ্ধিত ব্যয়ৰ বোজা ভাৰতীয় তেল কোম্পানীসমূহে (যেনে- IOC, BPCL, HPCL) নিজে বহন কৰিব। যোৱা বিত্তীয় বৰ্ষত এই কোম্পানীসমূহে অভিলেখ পৰিমাণৰ লাভ (প্ৰায় ৮১,০০০ কোটি টকা) অৰ্জন কৰিছিল, যাৰ বাবে বৰ্তমানৰ পৰিস্থিতি চম্ভালিবলৈ তেওঁলোকৰ হাতত পৰ্যাপ্ত পুঁজি মজুত আছে। সেয়েহে গ্ৰাহকসকলক সুৰক্ষা প্ৰদান কৰি সমগ্ৰ দেশতে পেট্ৰ‘ল পাম্প আৰু চি এন জি (CNG) ষ্টেচনসমূহ স্বাভাৱিকভাৱে পৰিচালিত হৈ আছে বুলি চৰকাৰে দেশবাসীক আশ্বস্ত কৰিছে।
