তৃতীয় পৰ্যায়ৰ ল’কডাউনৰ সময়ত দেশৰ বিভিন্ন প্ৰান্তত আৱদ্ধ হৈ থকা প্ৰব্ৰজিত শ্ৰমিক সকলে যিকোনো প্ৰকাৰে স্বগৃহলৈ উভতি অহাৰ বাবে প্ৰচেষ্টা অব্যাহত ৰাখিছে।
কিছু সংখ্যক শ্ৰমিক খোজকাঢ়ি ঘৰলৈ উভতি অহাৰ সময়তে ৰাজপথত নিজৰ প্ৰাণ বিসৰ্জন দিবলগীয়া হৈছে।
উত্তৰপ্ৰদেশৰ এগৰাকী ২৬ বছৰীয়া মহিলা প্ৰব্ৰজিত শ্ৰমিকে আজি উত্তৰপ্ৰদেশৰ ললিতপুৰত ৰাজপথৰ দাতিতে গছৰ তলত সন্তান প্ৰসৱ কৰে।
সন্তান জন্মদিয়া গৰ্ভৱতী মহিলা গৰাকীয়ে মধ্যপ্ৰদেশৰ ধাৰৰ পৰা ৫০০ কিলোমিটাৰ খোজকাঢ়ি আহি ৰাজপথতে সন্তান জন্ম দিয়ে।
মধ্যপ্ৰদেশৰ ধাৰৰ এটা ফেক্টৰীত মহিলা শ্ৰমিক গৰাকী আৰু তেওঁৰ স্বামীয়ে কাম কৰিছিল কিন্তু ল’কডাউনৰ বাবে ফেক্টৰীৰ কাম বন্ধ হৈ থকাত তেওঁলোক ঘৰলৈ উভতিব বাধ্য হয়।
উত্তৰপ্ৰদেশৰ নিজ গাঁৱলৈ খোজকাঢ়ি আহি থকা অৱস্থাতে আজি ললিতপুৰত মহিলা শ্ৰমিক গৰাকীয়ে সন্তান প্ৰসৱ কৰে।
অৱশ্যে পৰৱৰ্তী সময়ত স্থানীয় প্ৰশাসনে মহিলা গৰাকীক নৱজাতক শিশুটোৰ সৈতে চিকিৎসা কেন্দ্ৰলৈ লৈ যায়।
উল্লেখযোগ্য যে, ১ মে’ শ্ৰমিক দিৱসৰ দিনাখনৰ পৰা কেন্দ্ৰ চৰকাৰে দেশৰ বিভিন্ন স্থানত আৱদ্ধ হৈ থকা শ্ৰমিক সকলক নিজ নিজ ঘৰলৈ উভতাই অনাৰ বাবে বিশেষ শ্ৰমিক ৰে’ল চলোৱাৰ সিদ্ধান্ত গ্ৰহণ কৰিছিল।