ক’ৰ’না ভাইৰাছ প্ৰতিৰোধৰ বাবে দেশত অব্যাহত থকা ল’কডাউনৰ মাজতে অসমৰ এগৰাকী প্ৰৱাসী মহিলা শ্ৰমিকে পশ্চিমবংগত এটা সন্তান জন্ম দিছে।
কোভিড১৯এ সমগ্ৰ বিশ্বতে নৰ সংহাৰ চলোৱা সময়ত সন্তান জন্ম দিয়াৰ বাবে নৱজাতকটিৰ নাম ৰখা হৈছে কোভিড।
ঘটনাৰ বিৱৰণিৰ মতে দিন হাজিৰা কৰা আতাউৰ ৰহমান নামৰ প্ৰৱাসী শ্ৰমিকজনে জলপাইগুৰিৰ পৰা কোকৰঝাৰ জিলাৰ নিজ গৃহলৈ ২১ বছৰীয়া গৰ্ভৱতী পত্নীকলৈ অন্য কেইজনমান শ্ৰমিকৰ সৈতে এখন ট্ৰাকত উঠি আহি আছিল।
আলিপুদুৱাৰৰ এথালবাৰীৰ চেকপইণ্টত আৰক্ষীয়ে ট্ৰাকখনত তেওঁলোক দেখা পায় তাতে ৰখাই দেখে যে আকমল বিবি গৰ্ভৱতী।
লগে লগে আৰক্ষীৰ বাহনেৰে গৰ্ভৱতী আকমল বিবিক স্থানীয় চিকিৎসালয়লৈ নিয়ে আৰক্ষীয়ে।
ইয়াৰ পিছত আলিপুৰদুৱাৰ জেনেৰেল হাস্পতালত আকমল বিবিয়ে এটি পুত্ৰ সন্তান জন্ম দিয়ে।
হাস্পতালৰ কতৃপক্ষই নৱজাতক সন্তানটোৰ নাম কোভিড ৰাখি আকমল বিবিৰ সৈতে মাতৃ দিৱস উদযাপন কৰে।
‘আৰক্ষীৰ সহায়ৰ বাবে মোৰ পত্নীয়ে সুস্থ সন্তান জন্ম দিব পাৰিলে। আৰক্ষীয়ে নৱজাতকৰ বাবে চাবোন কাপোৰকে আদি কৰি সকলোবোৰ আমাক যোগান ধৰিছে। আনকি পইচাও দিছে। তেওঁলোকক মই কেতিয়াও পাহৰিব নোৱাৰিম।’ নৱজাতকৰ পিতৃ ৰহমানে কয়।
‘নৱজাতকটি দেওবাৰে দিনৰ ১১.২৫ বজাত জন্ম লাভ কৰে আৰু তেওঁৰ ওজন ২.৪৪ কিলোগ্ৰাম। শিশুটি আৰু মাক দুয়ো এতিয়া সুস্থ। ইয়াৰ সমস্ত খৰচ ৰাজ্যৰ স্বাস্থ্য বিভাগে বহন কৰিছে।’ আলিপুৰদুৱাৰ জিলাৰ মুখ্য স্বাস্থ্য বিষয়া পুৰণ শৰ্মাই কয়।
চিকিৎসালয়ৰ পৰা মুকলি কৰি দিয়াৰ পাছত এম্বুলেঞ্চেৰে তেওঁলোকক কোকৰঝাৰৰ ঘৰত থোৱা ব্যৱস্থা কৰা হ’ব বুলি জিলা প্ৰশাসনে জানিবলৈ দিছে।
ইফালে পশ্চিমবংগ আৰক্ষীয়ে অসমৰ কোকৰঝাৰ আৰক্ষীৰ সৈতে যোগাযোগ আন শ্ৰমিককেইজনক নিজ গৃহলৈ প্ৰেৰণ কৰে।
