পুনৰ উগ্ৰপন্থীৰ আক্ৰমণত কঁপি উঠিল অৰুণাচলৰ চাংলাং অঞ্চল।
দেওবাৰে পুৱা চাংলাং অঞ্চলৰ হেটলং গাওঁত আছাম ৰাইফলছৰ এখন বাহনৰ ওপৰত সন্দেহযুক্ত আলফা আৰু এনএছচিএনৰ খাপলাং গোটৰ ৩০-৩৫ জনীয়া দল এটাই অত্যাধুনিক মাৰণাস্ত্ৰৰে আক্ৰমণ চলায়।
চৰকাৰী সূত্ৰই প্ৰকাশ কৰা অনুসৰি আজি পুৱা জয়ৰামপুৰ আৰক্ষী থানাৰ অন্তৰ্গত উক্ত অঞ্চলত সেনাৰ বাহন খনৰ ওপৰত হোৱা আক্ৰমণত এজন সেনা জোৱানৰ মৃত্যু ঘটাৰ লগতে আন এজন জোৱান গুৰুতৰ বাবে আহত হয়।
নিহত জোৱান জনৰ গৰ বিহাৰত বুলি জানিব পৰা গৈছে।
আছাম ৰাইফলৰ পানী কঢ়িওৱা বাহন খনে হেটলঙৰ ওচৰৰে এখন গাৱৰ পৰা পানী আনিবলৈ গৈছিল।
সেই সময়তে আক্ৰমণৰ ঘটনাটো সংঘটিত হয়।চাংলাঙৰ জিলা দণ্ডাধীশ দেৱাংশ যাদবে প্ৰকাশ কৰা মতে আক্ৰমণ সংঘটিত হোৱা স্থানৰ কাষতে এটা আইইডিৰো বিস্ফোৰণ ঘটা বুলি খবৰ আহিছে।
অৱশ্যে সেনা জোৱান জনৰ মৃত্যু বিস্ফোৰণত হৈছে নে নাই সেয়া মৰণোত্তৰ পৰীক্ষাৰ পিছতহে জানিব পৰা যাব।
আহত জোৱান জনক চাংলাঙৰ চৰকাৰী চিকিৎসালয়ত ভৰ্তি কৰোৱা হৈছে যদিও তেওঁক চিকিৎসাৰ বাবে হেলিকপ্তাৰেৰে অসমলৈ অনা হ’ব বুলি যাদবে প্ৰকাশ কৰে।
উল্লেখ্য চলিত বৰ্ষৰ মে’ মাহতো নাগালেণ্ডৰ মন জিলাত এনএছচিএনৰ আক্ৰমণত তিনিজন লোক নিহত হৈছিল।
আজিৰ আক্ৰমণৰ ঘটনাটোৰ দায়িত্ব এতিয়ালৈকে কোনো সংগঠনে স্বীকাৰ কৰা নাই।