গুৱাহাটীৰ কিছুসংখ্যক উদীয়মান যুৱক যুৱতীয়ে ৰাষ্ট্রীয় জলপানি বঁটা প্ৰাপক মিনাংক ডেকাৰ নেতৃত্বত বনভোজ-সৃষ্ট আৱৰ্জনাজনিত পৰিৱেশৰ পৰা হোৱা ভাবুকিৰ প্ৰতি লক্ষ্য ৰাখি সজাগতা অভিযানৰ অংশ হিচাপে মূকাভিনয়ৰ পোছাকত দেওবাৰে দীপৰ বিলৰ পাৰত এক সজাগতা অভিযান চলায়।
‘মিছন ছেভ দীপৰ বিল’ নামেৰে নামকৰণ কৰা উক্ত সজাগতা সৃষ্টিৰ অনুষ্ঠানটোৰ জৰিয়তে বিলখনৰ পাৰলৈ বনভোজ খাবলৈ অহা প্ৰতিটো দল তথা প্ৰতিজন ব্যক্তিৰ কাষলৈ গৈ ধেমালিৰ চলেৰে বিলখনৰ চৌপাশ তথা বনভোজস্থলী পৰিষ্কাৰ কৰি ৰাখিবলৈ যুৱক যুৱতীৰ দলটোৱে আহ্বান জনায়।
মুকাভিনয় শিল্পী মিনাংক ডেকাৰ নেতৃত্বত যোৱা দলটোৰ আন আন সদস্যসকল আছিল- ভাৱনা, হিমাদ্ৰী, ৰেকিবুল আৰু তনিক্সা। দীপৰ বিলৰ লগতে পৰিভ্ৰমী পক্ষীজাকৰ প্ৰতিকূলতাবোৰ অনুকূল কৰাৰ বাবে তেওঁলোকৰ এই প্ৰয়াস বুলি জানিবলৈ দিয়ে।
ইপিনে, উপস্থিত ৰাইজে তেওঁলোকৰ এই প্ৰয়াসক শলাগ লোৱাৰ লগতে এই পদক্ষেপক আদৰণি জনায়।
উল্লেখ্য যে, মিনাংক ডেকাই পূৰ্বেও দীপৰ বিলৰ পাৰত ‘নিৰ্বাক যাত্ৰা’ নামেৰে এক অভিযানৰ জৰিয়তে “চৰাইজাক নহা হ’ল” শীৰ্ষক এক মুকাভিনয় নাট প্ৰদৰ্শন কৰিছিল।