উন্নয়ন আৰু প্ৰগতিৰ লক্ষ্য আগত ৰাখি ৰাজ্যখনত চৰকাৰৰ প্ৰতিটো বিভাগে ইতিমধ্যে বিভিন্ন অভিলাষী আঁচনি আৰম্ভ কৰাৰ সমান্তৰালকৈ আজি যোৰহাট জিলাৰ টীয়কৰ কাৱৈমাৰীতো অসম চৰকাৰৰ জলসম্পদ বিভাগৰ গুৰুত্বপূৰ্ণ আচঁনিৰ কামৰ আধাৰশিলা স্থাপন কৰে জলসম্পদ মন্ত্ৰী কেশৱ মহন্তই।
স্থানীয় বিধায়িকা ৰেণুপমা ৰাজখোৱাৰ লগতে বিভাগীয় কেইবাগৰাকীও বিষয়ববীয়াৰ উপস্থিতত কাৱৈমাৰী গোঁহাই গাওঁ, চীনাতলি কুমাৰ গাওঁ খহনীয়া প্ৰতিৰোধৰ আঁচনি লগতে বেজৰছিগা গাঁৱৰ ব্ৰহ্মপুত্ৰৰ জাঁজীমুখৰ মাথাউৰি সৱলীকৰণ আচঁনিখনৰ আধাৰশিলা কৰে জলসম্পদ মন্ত্ৰী কেশৱ মহন্তই।
অগপৰ টীয়ক বিধান পৰিষদৰ সভাপতি বিকাশ শইকীয়া, যোৰহাট জিলা সম্পাদক দ্বিপেন বৰগোঁহাই উপস্থিত থকা এই অনুষ্ঠানত আগন্তুক দিনত এই আচঁনিৰ সফল ৰূপায়নে উক্ত নৈপৰীয়া অঞ্চলৰ সমস্যাসমূহৰ স্থায়ী সমাধান হ’ব বুলি আশা কৰিছে মন্ত্ৰীগৰাকীয়ে{
তেওঁ লগতে উক্ত কাম অধিক খৰতকীয়াকৈ সম্পূৰ্ণ কৰা হ’ব বুলি ৰাইজক আশ্বাস প্ৰদান কৰে।
তদুপৰি, অহা জানুৱাৰিৰ ভিতৰত চৰকাৰে দুইলাখ ভূমিহীন পৰিয়ালক ভূমি পট্টা প্ৰদানৰ ব্যৱস্থা কৰিব বুলিও সাংবাদিকৰ সৈতে হোৱা এক সাক্ষাতকাৰত মন্ত্ৰীগৰাকীয়ে মন্তব্য কৰে।
